Bændablaðið - 20.07.2023, Qupperneq 14

14 Bændablaðið | Fimmtudagur 20. júlí 2023
FRÉTTIR
Ólafur Lindgren Sigurðsson tekur við eggjabúi í
Noregi í haust. Hann segir bankann hafa verið
viljugan til að lána, þar sem afkoma búsins er góð.
Ólafur, sem er 25 ára, hefur dvalið löngum stundum
á Krossi í Landeyjum þar sem pabbi hans er kúabóndi.
Hann er þó alinn upp að mestu í Noregi, hjá norskri
móður sinni. Ólafur hefur alltaf viljað vera bóndi og
stefndi um tíma að því að taka við búi föður síns. Victoria,
unnusta Ólafar, hafði ekki áhuga á að flytja frá Noregi
og settu þau því stefnuna á að hefja búskap þar í landi.
Fjármögnun mikil vinna
Ólafur segir mikla vinnu liggja að baki fjármögnun
á jörðinni, en hann þurfti að eiga fyrir þriðjungi
kaupverðsins. „Það sem hjálpaði okkur er að það eru
svo góðar tekjur af búinu,“ segir Ólafur, sem gerði
lánastofnanir viljugri til að fjármagna. Hann telur að
ekki fengist fyrirgreiðsla fyrir kaupum á jafndýru búi
með verri afkomumöguleika.
Enn fremur er seljandinn tengdur Ólafi fjölskyldu-
böndum og seldi unga parinu á lægra verði en á
almennum markaði. „Hann vildi að við tækjum við.
Hann var búinn að segja að ef við tækjum ekki við, þá
myndi hann ekki selja,“ segir Ólafur, en fráfarandi bóndi
er 74 ára gamall. Ólafur og Victoria taka formlega við
búinu 1. september næstkomandi.
7.500 lausagönguhænur
Bærinn er staðsettur við Ulefoss, sem aftur er skammt
frá Skien í Þelamörk, í sunnanverðum Noregi. Á
búinu eru 7.500 hænur og er uppistaða búrekstursins
eggjaframleiðsla. Á jörðinni eru einnig gróðurhús
sem eru notuð til að rækta blóm á vorin. Þau eru með
litla sjálfsafgreiðsluverslun þar sem fólk getur keypt
afurðirnar af bænum. „Fólk kemur inn og tekur það
sem það vill fá. Þau skrifa niður hvað þau taka og borga
annaðhvort í síma eða með peningum,“ segir Ólafur.
Búðin er smá og er staðsett í gömlu útihúsi á bænum.
Þar að auki eru þau með litla krá.
Dagleg störf eggjabóndans
Núna eru þau gjarnan með fráfarandi bónda í almennum
störfum. Dagleg bústörf felast meðal annars í því að
fara í hænsnahúsin á morgnana og tína saman þau
egg sem hafa dottið úr hreiðrunum. Hænurnar ganga
lausar og verpa almennt í varpkassa og rúlla eggin þá
niður á færiband. Þaðan fara eggin í rými þar sem þau
eru með aðstöðu til að flokka og pakka afurðunum
í neytendapakkningar. Stærstu eggin eru seld heima
á bæ, á meðan flest eru seld í verslunum í gegnum
bændasamlagið Nortura.
Nokkurt ræktarland fylgir jörðinni, sem er leigt
út. Ólafur segir ekki mikinn pening fást úr ræktun
korns þessi misserin, en er áhugasamur um að stunda
slíka ræktun síðar. Ólafur mun einnig taka yfir
snjómoksturinn á svæðinu, sem fráfarandi bóndi hefur
sinnt til þessa. Ólafur segir að það sé gott að vera bóndi
í Noregi, þó hlutirnir gætu alltaf verið betri. „Þetta
eru þokkaleg laun, en mættu alveg vera meiri þegar
maður sér hversu marga tíma maður er að vinna.“ Hann
viðurkennir að starf bóndans sé líka lífsstíll.
Aðspurður um frekari samanburð á búrekstri á Íslandi
og í Noregi, segir Ólafur að veðrið sé óneitanlega
mildara hjá honum, á meðan á Íslandi sé oft rok og
rigning. Þegar Bændablaðið ræddi við Ólaf var 30
gráðu hiti, sem hann sagði að væri reyndar fullmikið af
því góða. /ÁL
Ungur Íslendingur
eggjabóndi í Noregi
– Segir afkomumöguleika góða og lánakjör hagstæð
Eggjabúið er við Ulefoss. Á bænum er líka blómarækt í gróðurhúsum, krá og bændaverslun. Myndir / Aðsendar
Ólafur Lindgren Sigurðsson og Victoria Bjune taka við
eggjabúi í Þelamörk í Noregi í haust. Ólafur á ættir að
rekja til Landeyjanna.
Góð aðstaða er til að flokka og pakka eggjunum.
Auðhumla mun aftur taka upp
viðmið varðandi úrvalsmjólk og
verðfellingar á grundvelli líftölu-
mælinga frá og með 1. ágúst nk.
Í tilkynningu frá samvinnu-
félaginu er sagt að vel hafi verið fylgst
með mælingum líftöluvélarinnar
og að undanfarnar vikur hafi hún
gengið mjög vel og mælingar verið
stöðugar og án vandkvæða. Því muni
félagið aftur miða við að greiða fyrir
úrvalsmjólk og verðfella hrámjólk
miðað við hefðbundin viðmið sem
má nálgast á vefsíðu Auðhumlu.
Í mars sl. gaf félagið það út að
vafi léki á réttmæti á niðurstöðum
líftölumælinga og því notaði það
ekki þær tölur til verðfellingar
á hrámjólk frá 16. janúar sl. Á
sama tíma var viðmiðunum vegna
úrvalsmjólkur breytt tímabundið.
Frá 1. ágúst nk. mun Auðhumla
miða við að greiða fyrir úrvalsmjólk
sem er undir 20.000 ein/ml og
verðfella hrámjólk miðað við
hefðbundin viðmið, þ.e. hrámjólk
sem fær hærri líftölugildi en
80.000 ein/ml falli í 2. flokk með
16% verðfellingu af lágmarksverði
mjólkur, hrámjólk sem fari yfir
200.000 ein/ml falli í 3. flokk með
36% verðfellingu af lágmarksverði
mjólkur og hrámjólk sem fer yfir
500.000 ein/ml falli í 4. flokk með
60% verðfellingu af lágmarksverði
mjólkur. /ghp
Tekur aftur upp verðviðmið
Ráðgjafarmiðstöð landbúnaðarins
(RML) og Landbúnaðarháskóli
Íslands (LbhÍ) munu efla samstarf
sín á milli á næstu misserum.
Í því felst að faghópar munu
vinna að málefnum búgreina
og faglegra þátta sem snerta
landbúnað, landnýtingu, umhverfis-
og loftslagsmál. Sérstaklega
verður hugað að samstarfi um ný
rannsóknarverkefni BS, MS og PhD
nema og leiðir til fjármögnunar
slíkra verkefna.
„Endurmenntun LbhÍ hefur eflst
mikið á undanförnum misserum og
lögð er áhersla á að standa saman
um áframhaldandi uppbyggingu
námskeiða sem svara best þörfum
bænda og annarra hagaðila,“ segir
í tilkynningu.
Þar kemur jafnframt fram
að í ágúst verði sameiginlegur
ráðunautafundur RML og LbhÍ þar
sem starfsmönnum gefst kostur
á að setja sig inn í verkefni hver
annars ásamt því að ræða nýja
samstarfsfleti.
„Sérfræðiþekking einstakra
greina í landbúnaði byggir á mjög
fáu fólki og því mikilvægt að
samvinnan sé góð á milli aðila. Mikil
tækifæri eru til að efla enn frekar
samstarfið og þá ekki síst til að sækja
fram og auka enn frekar samstarf í
rannsóknum og nýsköpun,“ segir í
tilkynningu frá RML og LbhÍ. /ghp
Samstarf RML og LbhÍ