Morgunblaðið - 30.01.2008, Blaðsíða 9
MORGUNBLAÐIÐ MIÐVIKUDAGUR 30. JANÚAR 2008 9
FRÉTTIR
Eftir Steinþór Guðbjartsson
steinthor@mbl.is
HALLDÓR Einarsson í Henson
afhendir eftir helgi fyrrverandi
leikmanni enska knattspyrnuliðs-
ins Manchester United ágóða af
sölu minningarpeysu sem hann
gerði í tilefni þess að 6. febrúar
næstkomandi verða 50 ár liðin frá
því átta leikmenn félagsins létust í
flugslysi í Þýskalandi.
Þegar eitthvað merkilegt gerist í
fótboltanum er Halldór Einarsson
yfirleitt ekki víðs fjarri. Hann hef-
ur staðið vaktina með eiginkonunni
Esther Magnúsdóttur í framleiðslu
íþróttafata hjá Henson frá því þau
stofnuðu fyrirtækið 1969 og hefur
oft bryddað upp á ýmsum nýjung-
um.
Henson hefur framleitt íþrótta-
fatnað fyrir mörg innlend sem er-
lend íþróttalið. Á meðal enskra fót-
boltaliða sem hafa klæðst
búningum frá Henson má nefna
Aston Villa, Bristol Rovers,
Bournemouth, Torquy og Peter-
borough.
Hugmynd að veruleika
Á nýliðnu sumri hafði Guðjón
Ingi Eiríksson, mikill stuðnings-
maður Manchester United, sam-
band við Halldór og stakk að hon-
um þeirri hugmynd hvort ekki
væri ástæða til að búa til treyju til
minningar um flugslysið í Mün-
chen. Halldór hreifst af hugmynd-
inni og hafði samband við lögfræð-
ing í Manchester til að kanna rétt
sinn til að framleiða slíka treyju.
Þegar hann sagði ekkert því til
fyrirstöðu setti hann sig í samband
við Manchester United og spurði
hvort það ætlaði að gera eitthvað í
tilefni tímamótanna. Hann fékk
þau svör að til stæði að spila í bún-
ingum án auglýsinga í næsta leik
eftir 6. febrúar en það stangaðist
ekki á við gerð sérstakrar treyju.
Næst spurði hann hvort til væri
minningarsjóður til styrktar þeim
sem ættu um sárt að binda í kjöl-
far flugslyssins og komst að því að
svo var ekki. Þá grennslaðist hann
fyrir um hver þeirra, sem lenti í
flugslysinu, þyrfti helst á stuðningi
að halda og komst að því að fram-
herjinn fyrrverandi, Albert
Scanlon, væri maðurinn. „Hann
virðist hafa farið mjög illa út úr
þessu slysi,“ segir Halldór og vísar
meðal annars til skamms ferils
leikmannsins, en í hópi þeirra, sem
líka komust af, var Bobby
Charlton, leikmaður heimsmeist-
ara Englands 1966.
Rauða minningartreyjan hefur
fyrst og fremst verið seld hjá
stuðningsmannafélagi Manhcester
United, Jóa útherja og Ástund.
Halldór segir að það sem geri hana
sérstaka sé sorgarband á hægri
upphandlegg, þar sem nöfn þeirra
sem létust séu skráð gylltum stöf-
um. Í hálsmálinu sé svo dagsetn-
ingin 6. febrúar 1958 og á bakinu
talan 8 saumuð niður eins og var í
gamla daga.
Halldór hittir Albert Scanlon á
Old Trafford, heimavelli Manchest-
er United, á mánudag og afhendir
honum ágóðann af sölu treyjunnar.
Henson minnist flugslyssins í München fyrir hálfri öld
Selur treyjur til styrktar
leikmanni United
Árvakur/Golli
Tímamót Halldór Einarsson með treyju sem hann framleiddi til að minnast
þess að 50 ár eru síðan átta leikmenn Manchester United létust í flugslysi.
JÓHANNA Sig-
urðardóttir, fé-
lags- og trygg-
ingamálaráð-
herra, hefur
skipað starfshóp
sem falið verður
að vinna að-
gerðaáætlun til
að sporna gegn
fátækt og treysta
öryggisnet vel-
ferðarkerfisins. Björk Vilhelms-
dóttir borgarfulltrúi er formaður
hópsins.
Starfshópurinn á meðal annars
að hafa hliðsjón af þeim aðgerðum
til að vinna bug á fátækt sem lagðar
voru til í skýrslu forsætisráðherra
um fátækt á Íslandi og annarri
skýrslu forsætisráðherra um fá-
tækt barna og hag þeirra.
Starfshópurinn á jafnframt að
afla sér upplýsinga um skýrslur og
rannsóknir sem unnar hafa verið á
vegum hagsmunasamtaka, frjálsra
félagasamtaka og sérfræðinga
varðandi fátækt á Íslandi.
Auk Bjarkar eru í starfshópnum
Þórunn Sveinbjörnsdóttir, Helga G.
Halldórsdóttir, Vilborg Kristín
Oddsdóttir, Gunnar Sandholt og
Einar Árnason.
Starfshópur
gegn fátækt
Björk
Vilhelmsdóttir
GUÐLAUGUR
Þór Þórðarson
heilbrigðis-
ráðherra hefur
skipað fyrstu
stjórn nýrrar
sjúkratrygg-
ingastofnunar
sem tekur að
fullu til starfa í
haust. Benedikt
Jóhannesson
framkvæmdastjóri verður formað-
ur stjórnar sjúkratryggingastofn-
unar, sem ætlað er að semja um og
kaupa heilbrigðisþjónustu fyrir
hönd heilbrigðisráðuneytisins.
Stofnunin varð til með lögum
sem tóku gildi um áramót. Gert er
ráð fyrir að sjúkratryggingar hefji
að fullu starfsemi sína í haust.
Aðrir í stjórn stofnunarinnar eru:
Magnús Árni Magnússon hagfræð-
ingur, Þórir Haraldsson lögfræð-
ingur, Sigurbjörg Sigurgeirsdóttir
stjórnsýslufræðingur og Arna Lára
Jónsdóttir stjórnmálafræðingur.
Skipar í
stjórn Sjúkra-
trygginga
Benedikt
Jóhannesson
AÐGERÐIR til að draga úr umferð-
arslysum í Reykjavík hafa skilað
miklum árangri samkvæmt nýrri
skýrslu Framkvæmdasviðs Reykja-
víkurborgar um bætt umferðar-
öryggi í Reykjavík.
Skýrslan nær til áranna 1996-
2006 og kemur meðal annars fram
að umferðarslysum í borginni
fækkaði á tímabilinu úr 603 árið
1996 í 316 árið 2006.
Alvarlegum slysum fækkaði
einnig um tæplega helming. Þau
voru 78 árið 1996 en 40 í lok tíma-
bilsins. Skýrsluhöfundur leiðir að
því líkum að reglugerð um ökuferil-
skrá og punktakerfi árið 1999 hafi
haft marktæk áhrif til fækkunar á
umferðarslysum, einkum alvarlegri
slysum.
Sjá nánar á vef framkvæmda-
sviðs, www.reykjavik.is.
Umferðar-
slysum fækkar
SLÁTURFÉLAG Suðurlands, sem
flytur inn áburð undir merkjum
Yara, birti á mánudag verð á
áburði. Með því að bera saman verð
á milli júní 2007 og dagsins í dag
sést að áburðarverð hefur hækkað
á bilinu 36-80%.
Um þetta er fjallað á heimasíðu
kúabænda, naut.is, og greint frá
verði einstakra tegunda. Hjá Yara
geta bændur fengið afslátt á áburði
ef þeir panta á ákveðnum tímum.
Þannig er afslátturinn 10% af lista-
verði (sem kallað er júníverð) í jan-
úar og febrúar. Í mars lækkar af-
sláttarprósentan í 6%, í 4% í apríl
og loks í 2% í maí. Eftir 1. maí er
enginn afsláttur gefinn af lista-
verði.
36-80% hækkun
á áburði
TRÚNAÐARRÁÐ Kennarafélags
Reykjavíkur fagnar því að kennarar
sem starfa hjá Kópavogsbæ og
Garðabæ fái aukagreiðslur í formi
mánaðarlegra álagsgreiðslna eða
eingreiðslu.
„Mikil starfsmannavelta, sem er
afleiðing af bágum launum, er stað-
reynd í grunnskólum Reykjavíkur-
borgar. Í Reykjavík eru tæplega
tuttugu kennarastöður lausar til um-
sóknar og erfitt er að fá kennara til
starfa á þeim kjörum sem Reykja-
víkurborg býður grunnskólakennur-
um upp á.
Trúnaðarráð Kennarafélags
Reykjavíkur skorar á Reykjavíkur-
borg að fylgja nú þegar fordæmi ná-
grannasveitarfélaga og greiða
grunnskólakennurum sérstaklega
vegna aukins álags í starfi vegna
starfsmannaeklu,“ segir í ályktun.
Borgin fylgi fordæmi
Á VEFNUM Liðin tíð, sem Jónas
Ragnarsson hefur umsjón með, birt-
ist eftirfarandi pistill:
Jóhannes Sveinsson Kjarval list-
málari skrifaði grein um Laugaveg-
inn og Reykjavík í Morgunblaðið í
mars 1923. „Laugavegurinn er svo
formfull og laðandi gata að hreinasta
yndi er að ganga hana, ef hún væri
bara hreinlegri en hún er og ef hún
væri sléttuð og snyrtilega um hana
hugsað.“ Honum fannst Laugaveg-
urinn mýksta gata sem til væri í
nokkurri borg. „Þegar fram líða
stundir verður Laugavegurinn ein af
uppáhaldsgötum höfuðstaðarbúa og
allra sem hingað
koma.“ En hvað
fannst listamann-
inum vanta til
þess að Reykja-
vík stæði jafn-
fætis öðrum stór-
borgum. Hann
sagði að það væru
ekki stórhýsi og
fagur byggingar-
stíll sem sköpuðu menningarbrag-
inn. „Það er samræmið. Það er vit-
andi nægjusemin byggð á útreikn-
ingi eftir ákveðnum lögum og heppni
einstöku sinnum,“ sagði Kjarval.
Kjarval var sannspár
Kjarval
LÖGREGLAN á höfuðborgarsvæð-
inu segir að nokkuð beri á því að
ökumenn hirði ekki um að skafa af
bílrúðum og hafi lögreglumenn
haft afskipti af allmörgum öku-
mönnum vegna slíks, m.a. við
grunnskóla en þar megi lítið út af
bregða í skammdeginu.
Biður lögreglan ökumenn að
taka sig á og skafa af bílrúðum en
með því sé öryggi allra betur
tryggt.
Allt að 5 þúsund króna sekt ligg-
ur við broti af þessu tagi.
Sekt fyrir að
skafa ekki af
framrúðunum
Opið virka daga frá kl. 10-18 Laugardaga frá kl. 10-16
• Engjateigi 5
• Sími 581 2141
Enn meiri verðlækkun
LAGERSÖLU
LÝKUR Á
FIMMTUDAGINN
50-80% AFSLÁTTUR
Hverfisgötu 6, 101 Reykjavík, sími 562 2862
Lestrarskóli
Helgu Sigurjónsdóttur
Meðalbraut 14, 200 Kópavogi
,,Læs“ á átta vikum
Byrjendanámskeið í lestri.
Næsta lestrarnámskeið hefst 6. febrúar og lýkur 27. mars
Námið er ætlað fjögurra og fimm ára börnum en hentar líka
eldri börnum sem hefur borið upp á sker í lestrinum.
Kennt er hálftíma á dag fjórum sinnum í viku. Hópar eru
fjórir kl. 8.00 8.30 9.00 og 16.00 Verð kr. 30.000, námsefni
er innifalið.
Skóli Helgu Sigurjónsdóttur
Meðalbraut 14 í Kópavogi.
Netfang: helgasd@internet.is
Veffang: www.skolihelgu.is
S. 554 2337og 696 2834.