Tímarit lögfræðinga - 01.09.1982, Blaðsíða 5

t
HELGI HELGASON
Helgi Helgason lögfræðingur andaðist hinn 1.
apríl 1982 á Landsspítalanum eftir langa og
erfiða sjúkdómslegu.
Hann var fæddur 26. september 1926 á Stór-
ólfshvoli í Hvolshreppi. Hann var sonur hjón-
anna Helga, læknis þar og alþingismanns Rang-
æinga, Jónassonar bónda að Reynifelli á Rang-
árvöllum Árnasonar og konu hans Oddnýjar
hjúkrunarkonu Guðmundsdóttur bónda á Bakka
í Landeyjum Diðrikssonar.
Helgi Helgason varð stúdent frá Menntaskól-
anum í Reykjavík 1948 og cand. juris frá Há-
skóla íslands 1954. Hann var fulltrúi í félags-
málaráðuneytinu frá 1. nóvember 1954 til árs-
loka 1961. Tók þá við starfi sem lögfræðingur
hjá varnarliðinu á Keflavíkurflugvelli, síðan
stundaði hann sjómennsku á togurum á meðan heilsan leyfði.
Kynni okkar Helga voru á þeim árum, sem hann starfaði í félagsmálaráðu-
neytinu.
Helgi Helgason var stór og þreklegur maður, dagfarsprúður og hlýlegur í
viðmóti. Þó hann hafi lagt stund á laganám og lokið háskólaprófi í lögfræði
virtust lögfræðileg viðfangsefni varla vera honum vel að skapi, eða sérstak-
lega áhugaverð. Eins og áður er sagt sneri hann sér að sjómennsku á tog-
urum og lagði lögfræðina á hilluna. Þar fann hann útrás fyrir þá karlmennsku
og atorku, sem í honum bjó. Átök oft og einatt við óblíð náttúruöfl hafa
verið honum meir að skapi en heilabrot um lögfræðileg viðfangsefni. Hann
gat sér góðan orðstír sem sjómaður og naut mikils álits og trausts yfir-
manna sinna. Hann varð stýrimaður þó að hann hefði ekki lært siglinga-
fræði, en til þess starfs hafði hann undanþágu stjórnvalda. Hann var sannur
vinur skipsfélaga sinna og lét sér annt um velferð þeirra. Á síðari árum
sjómennsku sinnar gerðist hann bindindismaður og gaf skipsfélögum sínum
gott og göfugt fordæmi, sem fleiri mættu taka sér til fyrirmyndar.
Hann var ógiftur og barnlaus.
Með Helga Helgasyni er genginn gegn og góður drengur.
Hjálmar Vilhjálmsson.
47