Tímarit lögfræðinga - 01.11.1985, Page 18

til rétthafa eftir alþjóðlegu punktakerfi sem byggist á flutningstíðni,
lengd verks og vægi eftir gerð þess og umfangi.
Um þetta segir svo í 10. gr. samþykkta STEFs sem staðfestar eru af
menntamálaráðuneytinu:
„Tekjum STEFs skal varið sem hér segir:
A. Af heildartekjum skal fyrst greiða opinber gjöld, ef á verða lögð,
og síðan allan rekstrarkostnað stofnunarinnar.
B. Af því fé, sem þá verður eftir, skal greiða:
a) 10% til varasjóðs STEFs, endurnýjunarsjóðs, menningar- og
styrktarsjóðs og annarra sjóða, sem heppilegir kunna að þykja,
allt eftir ákvörðun aðalfundar STEFs.
b) Það, sem þá er eftir, skiptist með þeim, er flutningsrétt eiga á
verkum, sem STEF innheimtir gjöld fyrir, eftir þeim reglum,
sem settar verða af STEFi í samræmi við reglur hliðstæðra
stofnana í löndum Bernarsambandsins, og má leita þar á stað-
festingar Menntamálaráðuneytisins. Gjöld innheimt fyrir flutn-
ing erlendis greiðir STEF rétthöfum á Islandi frádráttarlaust.“
Um úthlutun félagsins gilda annars sérstakar reglur, settar af
menntamálaráðuneytinu, nr. 39/1953 og nr. 54/1957. Eru þær reglur nú
til gagngerðrar endurskoðunar hjá sérstakri nefnd innan félagsins.
Að framan er að því vikið að ekki er framkvæmanlegt að innheimta
gjöld fyrir hvern einstakan flutning og úthluta fénu síðan að frádregn-
um kostnaði beint til rétthafa. Því er það ráð tekið að úthluta nettó-
tekjum hvers árs (þ.e. innheimtum gjöldum að frádregnu sjóðafram-
lagi og kostnaði) til rétthafa skv. reglum sem eru svipaðar að efni og
formi í flestum menningarlöndum, og hefur þetta kerfi verið nefnt
punktakerfi.
Hvert verk sem flutt er hlýtur ákveðinn fjölda punkta eftir því hve
hátt verkið er metið innan svokallaðrar stigatöflu og lengd verksins í
flutningi. Samkvæmt gildandi töflu getur verðgildismunur verks verið
allt að því fjórfaldur, einkum eftir því hversu mikið vinnuframlag
þykir liggja að baki verksköpuninni.
Verðgildi hvers punkts ræðst síðan af hlutfalli nettótekna tiltekins
árs og heildarpunktafjöldanum á því ári.
Séu margir höfundar eða rétthafar að tilteknu verki skiptist greiðsl-
an milli þeirra eftir ákveðnum reglum. Þegar þetta er ritað eru svo-
felldar reglur í gildi um þetta efni:
156