Uppeldi og menntun - 01.01.2013, Síða 94

Uppeldi og menntUn/icelandic JoUrnal of edUcation 22(1) 201394
sKöpUn Krefst hUgreKKis
ígrundun og umræða um verk nemenda sem beinist að vinnu þeirra og vinnuferli.
Þessi þrír þættir, sýnikennsla, vinna nemenda og yfirferð, krefjast þess að nemendur
tileinki sér tæknilega færni, einbeitingu, þrautseigju, ímyndun, tjáningu, rannsókn,
ígrundun og ögrun. Leiða má líkur að því að kennsluhættir vinnustofunnar gætu
komið að gagni í allri kennslu og að aðferðirnar sem búa að baki þeim gætu orðið góð
fyrirmynd að skapandi starfi í öðrum listgreinum sem og almennum námsgreinum
(Rósa Kristín Júlíusdóttir, 2012).
Mat á sKaPanDi starfi nEMEnDa
Sveigjanleiki kennara og frelsi nemenda skiptir miklu máli í skapandi starfi en það
þarf samt sem áður að meta það sem skapað er, það er ekki sjálfkrafa gott, eins og
bent er á í heftinu. Það er vel gerlegt að meta skapandi vinnu en forsenda þess er
skilningur á eðli hennar. Lars Lindström (2006) hefur greint skapandi myndlistarstarf
nemenda niður í ákveðna meginþætti á sannfærandi hátt. Hann leggur til að tilbúin
verk séu metin með tilliti til afraksturs í tengslum við ætlan, lit, form og myndbygg-
ingu, notkun grunnreglna og vald á efnum og aðferðum. Hann leggur áherslu á mat
á ferlinu og skiptir því í rannsókn, lausnaleit með skissum og tilraunum, að eflast við
ögrun, hugvitssemi, að leita nýrra leiða, að taka áhættu og að nota fyrirmyndir og
leita markvisst í þær til hugljómunar, að ígrunda og meta eigin árangur og að lýsa
verkum sínum og skoða. Þetta hefur reynst undirrituðum gagnleg leið til að meta verk
nemenda og skapandi vinnu þeirra á listnámsbraut Verkmenntaskólans á Akureyri.
Einnig hefur gefist vel að nemendur vinni sjálfsmat, sérstaklega með tilliti til
ferlisins. Þá er mikilvægt að ræða við þá um matið og beina athygli þeirra að eigin
vinnuferli og gefa þeim tilfinningu fyrir því að persónuleg nálgun þeirra skipti máli.
Kennarinn þarf að staldra við og skoða hvað nemandinn hefur fram að færa í raun
og veru og hvort honum hefur tekist það sem hann ætlaði sér. Þá spyr nemandinn
sig hvernig hann geti bætt nálgun sína að náminu. Langmikilvægasta viðhorfið sem
skapast í skóla er löngunin til að halda áfram að læra eins og John Dewey benti okkur
á fyrir löngu (Hafþór Guðjónsson, 2012).
VÆgi list- Og VErKgrEina
Í heftinu er lögð áhersla á grunnþáttinn sköpun í víðu samhengi þar sem hann er nýtt-
ur á sem fjölbreyttastan hátt í skólakerfinu, sem er vel. Vissulega er talað um mikil-
vægi þess að kenna listgreinarnar áfram en það þarf að varast að túlka heftið þannig
að þær séu ekki eins mikilvægar og áður. Hætta er á því að kennslustundafjöldanum
sem fer í listgreinakennsluna verði dreift yfir aðrar greinar í skólakerfinu og það látið
duga. Því er afar mikilvægt að hamra á því að alls ekki megi taka listgreinakennsl-
una út úr skólunum. Fagmennska listamanna og listgreinakennara má ekki glatast úr
skólakerfinu því þeir eru lykilmenn í innleiðingu sköpunar.