Ársrit Ræktunarfélags Norðurlands - 02.02.1956, Síða 24

80
starf, gefist upp og flytji brott, eða á þjóðfélagið að hlaupa
hér undir bagga og bjarga byggðinni frá eyðingu?
Þeir menn eru víst til, sem munu hiklaust telja, að engu
máli skipti þótt Loðmundarfjörður færi í eyði og að það
sé miklu hagkvæmara fyrir þjóðfélagið að reisa þeim, sem
enn búa þar, nýbýli í meira þéttbýli og við betri aðstöðu
og þægindi, heldur en að verja nokkru fé til þess að bjarga
verðmætum og rjúfa einangrun þessarar byggðar. Þessir
menn hafa áreiðanlega rangt fyrir sér.
Þótt eigi séu nú nema fjögur býli eftir í byggð í Loð-
mundarfirði, mundi með núgildandi verðlagi kosta eigi
minna en tvær millj. kr. að reisa þau annars staðar, og er þó
vafamál, að til jafns yrði búið, því auk þess, sem þessum
býlum fylgja allmiklar byggingar, ræktun og land gott, þá
fylgja sumum þeirra hlunnindi, svo sem veiði, reki, eggja-
og dúntekja o. fl. Þá er á þeim jörðum sumum, sem nýskeð
eru komnar í eyði, ennþá nokkur aðstaða til búrekstrar, svo
sem ræktun og byggingar. Engin vandkvæði virðast á því
að reka landbúnað í Loðmundarfirði önnur en einangr-
unin.
Nú er það svo, að varla mundi kosta meira að koma á
góðu vegasambandi við Loðmundarfjörð heldur en nemur
þeim verðmætum, er yrði að yfirgefa, ef fjörðurinn fer í
eyði, og þó líklega minna. Vegalengd úr Loðmundarfirði
að Brimnesi við Seyðisfjörð, með sjó, er aðeins 12 km, og
virðast engin sérstök vandræði á því að gera veg þessa leið
með nútíma tækjum og tækni. Kann að vera, að á örstutt-
um kafla verði að sprengja veginn í berg, en varla getur það
valdið teljandi erfiðleikum eða verið meira heldur en orðið
hefur að gera á nokkrum öðrum stöðum hér á landi. Akfært
er frá Brimnesi til Seyðisfjarðar. Sá vegur er að vísu eigi
góður en er þegar í þjóðvegatölu, og mun vera nú þegar
unnið að endurbótum á honum. Öll er vegalengdin úr
Loðmundarfirði og inn á Fjarðaröldu um 25 km.