Morgunblaðið - 18.01.2003, Blaðsíða 6
FRÉTTIR
6 LAUGARDAGUR 18. JANÚAR 2003 MORGUNBLAÐIÐ
AÐ LOKNUM um fjörutíu mínútna
fundi þeirra Junichiro Kouzumis, for-
sætisráðherra Japans, í forsætisráðu-
neytinu í Tókýó í gær, sagði Davíð
Oddsson fundinn hafa verið mjög
góðan.
„Um langa hríð hefur verið mjög
gott samband á milli þessara tveggja
þjóða,“ sagði hann. „Eftir að sendiráð
voru opnuð fyrir rúmu ári, af Íslands
hálfu hér í Tókýó og Japanskt sendi-
ráð á Íslandi, hefur samband þjóð-
anna styrkst enn frekar.“
Þeir ræddu um viðskipti landanna
og hvalveiðimálið. Davíð sagðist hafa
þakkað Koizumi sérstaklega fyrir
stuðning ríkisstjórnar hans þegar Ís-
land gekk aftur í hvalveiðiráðið, með
fyrirvara um bann við veiðum í at-
vinnuskyni, en stuðningur Japana
reyndist þá mjög mikilvægur. Einnig
var rætt um viðskipti með hvala-
afurðir.
Að sögn japanskra embættis-
manna, sem voru viðstaddir fundinn,
sagði Davíð að Íslendingar vildu hefja
vísindaveiðar á hvölum. Koizumi
sagði að Japanar hefðu alltaf haldið
því fram að vísindarannsóknir á hvöl-
um væri nauðsynlegar en tilfinn-
ingaleg umræða væri ríkjandi innan
Alþjóða hvalveiðiráðsins.
Að sögn embættismannanna svar-
aði Davíð að nauðsynlegt væri að
nýta auðlindir sjávar með skilvirkum
hætti á grundvelli vísindalegra að-
ferða.
Bæði Íslendingar og Japanir hættu
að veiða hvali í atvinnuskyni árið 1986
vegna veiðibanns hvalveiðiráðsins. Ís-
lendingar stunduðu vísindaveiðar í
fjögur ár eftir það en Japanir hafa
veitt hrefnur og fleiri hvalategundir í
vísindaskyni frá árinu 1987 og sætt
mikilli gagnrýni umhverfissamtaka.
Íslendingar gengu úr Alþjóðahval-
veiðiráðinu 1992 en fengu aðild á ný í
október sl. og gerðu jafnframt form-
legan fyrirvara við hvalveiðibannið.
Ísland skuldbatt sig jafnframt til að
hefja ekki atvinnuhvalveiðar fyrr en
árið 2006 í fyrsta lagi.
Koizumi boðið til Íslands
Davíð segir að þá hafi þeir talað um
alþjóðamál sem efst eru á baugi, eins
og ástand mála í Írak og Norður-
Kóreu. „Loks ræddum við saman á
persónulegum nótum. Þetta var mjög
góður fundur og ég óskaði þess að
forsætisráðherrann hefði einhvern
tímann tækifæri til að heimsækja Ís-
land eða eiga sameiginlegan fund
með forsætisráðherrum Norður-
landanna fimm, rétt eins og forverar
hans Hasimoto og Obuchi gerðu á
sínum tíma.“
Afar vel fór á með ráðherrunum en
þeir kynntust vel í fyrra þegar þeir
voru borðfélagar í kvöldverði á leið-
togafundi Sameinuðu þjóðanna um
umhvefismál í Jóhannesarborg.
Á undan fundinum með Koizumi
hitti Davíð frú Oghi, ráðherra sam-
göngu- og ferðamála. Þar var einkum
rætt um ferðamennsku, hvernig auka
mætti fjölda japanskra ferðamanna
sem koma til Íslands en einnig fjölda
þeirra Íslendinga sem sækja Japan
heim. Ríkisstjórn Japans hefur gert
áætlun um að fjölga ferðamönnum
sem koma til landsins um helming, úr
fjórum milljónum á ári í átta. Sextán
milljónir Japana ferðast úr landi ár-
lega.
Davíð nefndi áhuga íslenskra
stjórnvalda á að gerður verði loft-
ferðasamningur milli ríkjanna en
slíkan samning þarf til að íslensk
flugfélög geti flogið til Japan.
Askenazy í hágæðasjónvarpi
Dagskrá þessa fjórða dags op-
inberrar heimsóknar forsætisráð-
herrahjónanna til Japans, hófst með
heimsókn í höfuðstöðvar ríkissjón-
varpsins, NKH, en það hefur verið í
fararbroddi í þróun stafrænnar há-
gæðasjónvarpstækni. Sjónvarpsstjóri
tók á móti Davíð og fylgdarliði hans
og kynnti þeim möguleika þessarar
sjónvarpstækni. Þeir skoðuðu þrí-
víddarsjónvarp og fræddust um mun-
inn á þeirri tækni sem notuð er í Evr-
ópu í dag og þessa stafræna
sjónvarps, sem tekið er að leggja með
köplum inn á öll heimili Japans og á
því að vera lokið innan tíu ára.
Sjónvarpsstjóri sýndi sem dæmi
um fullkomin mynd- og hljómgæði
þessarar tækni, brot úr dagskrá með
tónleikum Sinfóníuhljómsveitar
NKH og nýráðnum aðalstjórnanda
hennar, Vladimir Askenazy. Þá skoð-
aði Davíð myndver og fréttastofur
stöðvarinnar og lauk heimsókninni í
sjónvarpssal þar sem fréttastjóri tók
viðtal við forsætisráðherrann.
Dagskrá dagsins lauk með kvöld-
verði á kunnum veitingastað sem sér-
hæfir sig tempura-réttum. Til hans
var boðið af japönskum þingmönnum,
félögum í Vináttufélagi japanskra og
íslenskra þingmanna.
Heimsókn Davíðs og frú Ástríðar
Thorarensen til Japan lýkur í dag
með ferð til Kamakura. Þessi litli bær
sunnar við Tókýó gegndi mikilvægu
hlutverki í sögu Japans, en á þrett-
ándu öld var Kamakura aðsetur
stríðsherranna sem réðu landinu.
Síðasti dagur heimsóknar Davíðs Oddssonar forsætisráðherra til Japans í dag
Þakkaði Koizumi stuðn-
inginn í hvalveiðimálinu
Koizumi forsætisráð-
herra Japans og Davíð
Oddsson ræddu á
fundi sínum í Tókýó í
gær um vaxandi sam-
skipti þjóðanna, hval-
veiðimál og ástand
mála í Írak og Norð-
ur-Kóreu. Davíð heim-
sótti einnig ríkissjón-
varpið og snæddi
kvöldverð í boði jap-
anskra þingmanna.
Einar Falur Ingólfs-
son fylgdist með ferð-
um Davíðs í Tókýó.
Davíð og Ingimundur Sigfússon sendiherra settu upp þrívíddargleraugu í heimsókn sinni til japanska ríkissjón-
varpsins, er þeim var sýnd mynd í þrívíddarsjónvarpi. Tæknin verður komin inn á öll japönsk heimili innan tíu ára.
Morgunblaðið/Einar Falur
Davíð Oddsson forsætisráðherra afhendir frú
Oghi, samgönguráðherra Japans, gjöf að lokn-
um fundi þeirra í Tókýó í gær.
Davíð Oddsson og Ástríður Thorarensen hlýða á ávarp eins
þingmannsins í Vinafélagi japanskra og íslenskra þingmanna
sem bauð til kvöldverðar í gærkvöldi á einu kunnasta temp-
ura-veitingahúsi Tókýó.
efi@mbl.is
ÍBÚÐALÁNASJÓÐUR mun greiða
skaðabætur til níu einstaklinga sem
urðu fyrir fjárhagstjóni vegna mis-
taka sjóðsins við afgreiðslu fast-
eignaverðbréfa í tengslum við Fast-
eignasöluna Holt í Kópavogi.
Bótafjárhæð vegna meintra mistaka
sjóðsins í tengslum við málið nemur
27,7 milljónum án vaxta og verðbóta.
Þá hefur sjóðurinn fallist á að greiða
lögfræðikostnað kröfuhafa að fjár-
hæð 1,26 milljónir króna. Þetta kem-
ur fram í frétt frá sjóðnum.
Tíu töldu sig hafa
orðið fyrir tjóni
Þegar upp komst um fjársvik
Holts í október sl. lýsti Íbúðalána-
sjóður vilja sínum til þess að bæta
það tjón sem viðskiptavinir sjóðsins
höfðu orðið fyrir vegna mistaka hans
í samskiptum við eiganda fasteigna-
sölunnar. Í kjölfar þess bárust sjóðn-
um kröfur frá tíu einstaklingum sem
töldu sig hafa orðið fyrir fjárhags-
tjóni vegna þessa. Einnig barst
sjóðnum krafa frá verðbréfafyrir-
tæki vegna fimm tilvika þar sem fyr-
irtækið hafði milligöngu um að af-
létta skuldum til að skapa veðrými
fyrir fasteignaveðbréf.
Í frétt Íbúðalánasjóðs segir að
óháð úrskurðarnefnd hafi lagt mat á
fyrirliggjandi kröfur og komist að
þeirri niðurstöðu að í níu tilfellum af
þeim tíu sem snéru að kröfu einstak-
linga væru málsatvik á þann veg að
rétt væri af Íbúðalánasjóði að greiða
skaðabætur. Í einu tilfelli mat nefnd-
in málsatvik svo að ekki væri unnt að
rekja fjárhagslegan skaða til
meintra mistaka Íbúðalánasjóðs.
Stjórn sjóðsins hefur samþykkt að
fara í einu og öllu eftir tillögum úr-
skurðarnefndarinnar.
Íbúða-
lánasjóð-
ur greiðir
bætur
AF þeim 13.000 athugasemdum
sem bárust Fasteignamati rík-
isins vegna endurmats á fast-
eigna- og brunabótamati hafa
8.600 verið afgreiddar. Lang-
flestar athugasemdirnar vörð-
uðu brunabótamat. Brunabóta-
mat 18% eigna hækkaði um
meira en 5% við enduraf-
greiðslu en brunabótamat 80%
eigna breytist um minna en 5%.
Brunabótamat 55% eigna
breytist lítið sem ekkert, 25%
eigna breytist innan við 5% og
brunabótamat 2% eigna lækkar
um meira en 5%.
Skráning eigna býsna rétt
„Þetta sýnir að skráning
eigna hjá okkur er býsna rétt
þó að mat hafi breyst í um 20%
tilvikum,“ sagði Haukur Ingi-
bergsson forstjóri Fasteigna-
mats ríkisins.
Haukur sagði að of snemmt
væri að segja til um hvort end-
urmat yrði nú reglulegt á eign-
um. „Hins vegar ber fasteigna-
eigendum að biðja um nýtt
brunabótamat ef þeir hafa
ástæðu til að ætla að það breyt-
ist verulega, til dæmis vegna
endurbóta eða annarra
ástæðna, en við ætlum að klára
að afgreiða þetta áður en við
leiðum hugann að næsta end-
urmati,“ sagði Haukur.
Undanskildar þessum tölum
eru eignir sem breyttust í
stærð og á byggingarstigi.
Brunabóta-
mat hækk-
ar í um
fimmtungi
tilvika
SEINNIPARTINN í gær, eftir fund-
inn með Koizumi, forsætisráðherra
Japans, var haldið í glæsilega versl-
un hins kunna fatahönnuðar Junko
Koshino. Hún er góður vinur sendi-
herrahjónanna, Ingimundar Sigfús-
sonar og Valgerðar Valsdóttur.
Eftir að hafa skoðað verslunina
og íbúð hönnuðarins, sem er afar
sérstök, var óvænt boðið upp á
tískusýningu við undirleik kamm-
erhljómsveitar sem lék verk eftir
Bach og Pachelbel. Fyrirsætur
sýndu nýjasta hátískufatnað Kosh-
ino. Að því loknu lék hljómsveitin
íslenska þjóðsönginn og endaði síð-
an á „Hann á afmæli í dag“ og tóku
viðstaddir vel undir, til heiðurs for-
sætisráðherra sem fagnaði 55 ára
afmæli sínu í gær. Davíð sagði að
þetta hefði komið sér afskaplega
mikið á óvart og yrði ógleymanlegt.
Morgunblaðið/Einar Falur
Ingimundur Sigfússon sendiherra, Ástríður Thorarensen og Davíð Odds-
son fylgjast með óvæntri tískusýningu sem var sett á svið í verslun Junko
Koshino, hins kunna japanska fatahönnuðar.
Óvænt afmælisboð fyrir Davíð