Morgunblaðið - 18.01.2003, Blaðsíða 12

VIÐSKIPTI/ATHAFNALÍF
12 LAUGARDAGUR 18. JANÚAR 2003 MORGUNBLAÐIÐ
KAUPHÖLL Íslands hefur ákveðið
að beita Plastprent hf. févíti að fjár-
hæð 1.250.000 krónur fyrir brot á
ákvæði reglna Kauphallarinnar um
skráningu en Plastprent hefur ekki
birt skráningarlýsingu vegna hluta-
fjárhækkunar þrátt fyrir ítrekuð til-
mæli Kauphallarinnar, að því er segir
í frétt frá Kauphöllinni.
Þórður Friðjónsson, forstjóri
Kauphallar Íslands, segir að þetta
mál virðist að hluta stafa af því að hjá
Plastprenti hafi ekki verið litið á regl-
ur Kauphallarinnar sem eins fast-
mótaðar og vera ber. Hann segir að
Kauphöllin hafi átt ýmis samskipti
við Plastprent til þessa og farið yfir
þessi mál. Það hafi ekki borið tilætl-
aðan árangur. Niðurstaðan hafi því
verið sú að beita févíti við þessar að-
stæður.
Sigurður Bragi Guðmundsson,
framkvæmdastjóri Plastprents, segir
að sektin komi þeim mjög á óvart og
segir að viðbrögð Kauphallarinnar
séu bæði klaufaleg og allt of harka-
leg.
„Okkur finnst þetta harkalegt því
að í þessu máli er á engan hallað. Það
er enginn sem hagnast eða tapar á
þessu máli og enginn brotavilji á ferð-
inni. Kauphöllin hefur fimm mismun-
andi möguleika á refsingum og févíti
er það alvarlegasta og á bara að beita
ef um alvarlegt brot er að ræða. Við
erum í rauninni alveg agndofa yfir
vinnubrögðunum,“ sagði Sigurður í
samtali við Morgunblaðið.
Hann segir að Plastprent hafi verið
í samskiptum við Kauphöll Íslands út
af þessu máli um tíma einfaldlega
vegna þess að þeir hafi verið ósam-
mála um efnisatriði málsins, og engu
hafi verið leynt. „Það kostar Plast-
prent 4–5 milljónir að gera svona
skráningarlýsingu, og í þessu ein-
staka tilfelli fannst okkur það ekki
þjóna neinum tilgangi að búa til nýja
skráningarlýsingu, enda var til stað-
ar á hluthafafundinum í desember
2000 nýleg skráningarlýsing.“
Sigurður segir aðspurður að fyr-
irtækið muni hlíta úrskurðinum og
borga sektina, ekki þjóni tilgangi að
reyna að áfrýja til fjármálaeftirlits-
ins, eins og mögulegt er að hans sögn.
„Ég hef enga ástæðu til að treysta
þessum mönnum framar og maður
vill hafa sem minnst samstarf við
svona menn. Ég mun leggja það til
við stjórn Plastprents að við skráum
okkur úr Kauphöllinni. Það er aldrei
að vita hverju þeir taka upp á næst.“
Ítrekuð tilmæli
Í tilkynningu Kauphallarinnar seg-
ir að hinn 18. júní 2002 hafi borist frá
Plastprenti vottorð Hlutafélagaskrár
þar sem fram kemur að hlutafé fé-
lagsins hafi verið aukið um 29.593.679
krónur að nafnvirði. Í kjölfarið var
hinn 20. júní 2002 birt tilkynning í
fréttakerfi Kauphallarinnar þess efn-
is að hlutafé félagsins hefði verið auk-
ið í viðskiptakerfi Kauphallarinnar
um nefnda fjárhæð og það væri eftir
hækkunina kr. 259.593.679 að nafn-
virði. Heimild til hlutafjárhækkunar-
innar var veitt stjórn félagsins á hlut-
hafafundi í Plastprenti hinn 29.
desember 2000 í tengslum við kaup á
85,43% hlut í AkoPlastos hf.
Í kjölfarið vakti Kauphöllin með
bréfi til Plastprents athygli á því að
samkvæmt 2. mgr. 13. gr. reglna um
skráningu verðbréfa í Kauphöllinni
skuli félag, þegar um er að ræða
hækkun hlutafjár gegn gjaldi, sækja
um skráningu á hinu nýja hlutafé um
leið og viðskipti með það geta hafist
eða innan þriggja mánaða frá því að
bréfin voru gefin út. Í þessu felist að
leggja þurfi fram skráningarlýsingu
vegna hlutafjárhækkunarinnar í
samræmi við ákvæði skráningar-
reglna Kauphallarinnar og viðauka I
við reglugerð um opinbera skráningu
verðbréfa í kauphöll. Í viðauka IV við
reglugerðina er fjallað um undanþág-
ur frá birtingu skráningarlýsinga, en
í tilkynningu Kauphallarinnar segir,
að í umræddu tilviki séu engin þeirra
skilyrða sem geti leitt til veitingar
undanþágu til staðar.
Kauphöllin segir að þrátt fyrir
ítrekuð tilmæli hafi Plastprent ekki
birt skráningarlýsingu vegna hluta-
fjárhækkunarinnar. Plastprent hafi
gert Kauphöllinni grein fyrir ástæð-
um þess að skráningarlýsing hafi
ekki verið birt. Kauphöllin hefur
komist að þeirri niðurstöðu að þær
ástæður réttlæti ekki að enn skuli
ekki hafa verið birt skráningarlýsing
í tengslum við umrædda hlutafjár-
hækkun. Því hafi Kauphöllin ákveðið
að beita Plastprent févíti að fjárhæð
kr. 1.250.000.
Skráningarlýsingin formsatriði
Plastprent sendi í kjölfar tilkynn-
ingar Kauphallarinnar frá sér til-
kynningu þar sem fram kemur að
umrædd hlutafjáraukning hafi verið
heimiluð 29. desember 2000 vegna
kaupa á 85% hlut í AcoPlastos hf. Um
einu og hálfu ári síðar var heimild
hluthafafundar til hlutafjáraukningar
nýtt og hlutafé aukið um 29,6 millj-
ónir sem greitt var Landsbanka Ís-
lands sem seljanda hlutabréfa í
AkoPlastos.
Plastprent segir, að þessi hluta-
fjáraukning sé rétt umfram þá 10%
hlutafjáraukningu sem kalli ekki á
sérstaka skráningarlýsingu. Aukn-
ingin hefði þannig getað verið 23
milljónir án þess að skráningarlýs-
ingar væri þörf.
„Á þessum tíma stóðu yfir viðræð-
ur við Sigurplast hf. um sameiningu
fyrirtækjanna. Vegna mikils kostnað-
ar við gerð skráningarlýsingar, eða
væntanlega allt að fjórum milljónum
króna, var talið heppilegt að sú
skráningarlýsing sem gera þyrfti
vegna kaupa á Sigurplasti tæki jafn-
framt til fyrri kaupa sem þá voru í
reynd löngu um garð gengin og
skráningarlýsing þeirra vegna frem-
ur formsatriði sem ekkert upplýs-
ingagildi hefði fyrir markaðinn.
Nokkuð drógst að samningar tækj-
ust um sameiningu við Sigurplast en
það varð 3 desember sl. Er nú unnið
að sameiningarferli og er hluti þess
gerð skráningarlýsingar vegna hluta-
fjárhækkunar í Plastprent.
Í ljósi þessa telur stjórn Plast-
prents að viðbrögð Kauphallar nú
með ákvörðun um févíti harkaleg og
óþörf, miðað við önnur úrræði sem
Kauphöllin hefur,“ segir í tilkynningu
Plastprents.
Kauphöllin beitir Plastprent févíti að fjárhæð 1.250 þúsund krónur
„Mun leggja til afskrán-
ingu úr Kauphöllinni“
KAUPHÖLL Íslands hf. hefur
ákveðið að beita Búnaðarbanka Ís-
lands hf. févíti að fjárhæð 4,5 millj-
ónir króna fyrir að hafa brotið flögg-
unarreglur í tengslum við gerð
samnings um meðferð hlutabréfa í
Fjárfestingarfélaginu Straumi hf.
hinn 19. júní 2002. Fjárhæðin rennur
til Kauphallarinnar.
Búnaðarbankinn mótmælir því að
umræddur samningur hafi verið
flöggunarskyldur og gagnrýnir einn-
ig að Kauphöllin hafi ákveðið að beita
bankann févíti án þess að gefa honum
kost á að neyta andmælaréttar með
eðlilegum hætti.
Þórður Friðjónsson, forstjóri
Kauphallar Íslands, segir að Kaup-
höllin sé ósammála þeim skilningi
Búnaðarbankans að samningurinn
hafi ekki verið flöggunarskyldur. Þá
segir hann varðandi andmælaréttinn
að mál þetta hafi verið í meðferð milli
aðila frá 14. janúar og Kauphöllin hafi
m.a. fengið tvö bréf frá Búnaðar-
bankanum þar sem afstaða bankans
var skýrð. Andmælaréttur hafi því
verið með eðlilegum hætti.
Árni Tómasson, bankastjóri Bún-
aðarbankans, segir að hann hafi talið
sig hafa fylgt reglum í þessu máli og
byggði það á lögfræðiáliti. Að öðru
leyti vill hann ekki tjá sig um þetta
mál en vísar til yfirlýsingar Búnaðar-
bankans, sem send var Kauphöll Ís-
lands í gær, þar sem niðurstöðu
Kauphallarinnar er mótmælt.
Fjallað var um samninginn um
Straum í greinaflokki Agnesar
Bragadóttur blaðamanns í Morgun-
blaðinu í síðustu viku. Í kjölfar þess
óskaði Kauphöllin eftir upplýsingum
frá Búnaðarbankanum um málið.
Búnaðarbankanum bar að
tilkynna um samninginn
Í tilkynningu frá Kauphöll Íslands
í gær segir að með samningnum um
Straum frá 19. júní 2002 hafi Bún-
aðarbankinn meðal annars gert sam-
komulag við aðra hluthafa í Fjárfest-
ingarfélaginu Straumi um að taka
upp varanlega, sameiginlega stefnu
um stjórnun félagsins. Segir í til-
kynningunni að slíkt samkomulag
stofni ásamt öðrum atriðum til flögg-
unarskyldu samkvæmt lögum. Því
hafi borið að senda tilkynningu til
Kauphallarinnar hinn 19. júní 2002.
Fram kemur í tilkynningu Kaup-
hallarinnar að ákvörðun um beitingu
févítis sé tekin á grundvelli samnings
Búnaðarbankans um aðild að Kaup-
höllinni frá 24. október 2001 og
ákvæðis í aðildarreglum NOREX.
Þar segi m.a. að brjóti kauphallaraðili
lög, reglugerðir, aðildarreglur NOR-
EX, stundi ekki vandaða viðskipta-
hætti eða sýni á annan hátt fram á
vanhæfni sem kauphallaraðili, sé
Kauphöll Íslands heimilt að beita við-
urlögum, m.a. í formi févítis sem nemi
allt að tíföldu árgjaldi ef brotið telst
alvarlegt. Þá segir í sömu grein aðild-
arreglnanna að Kauphöllinni sé
heimilt að birta opinbera yfirlýsingu
varðandi umrædd mál.
Ekki flöggunarskylt
Í tilkynningu Búnaðarbankans til
Kauphallar Íslands í gær segir að
bankinn byggi afstöðu sína að honum
hefði ekki borið að tilkynna um sam-
komulag það sem gert var við aðila
tengda Fjárfestingarfélaginu
Straumi á því að Straumur, sem
hlutabréfasjóður, sé fyrirtæki um
sameiginlega fjárfestingu. Þá segir
að í Evróputilskipun sem lög og regl-
ur um flöggun byggist á komi fram að
flöggunarreglur gildi ekki um slík
fyrirtæki.
Búnaðarbankinn segir að Fjárfest-
ingarfélagið Straumur hafi verið og
sé flokkað og skráð hjá Kauphöll Ís-
lands sem hlutabréfasjóður. Þar sem
um hlutabréfasjóð sé að ræða, sem
uppfyllti skilgreiningu um félög um
sameiginlega fjárfestingu, hafi Bún-
aðarbankinn talið að umrætt sam-
komulag væri ekki tilkynningarskylt
til Kauphallarinnar.
Brot á flöggunarreglum
eru alvarleg brot
Þórður Friðjónsson segir að und-
anþáguákvæði samkvæmt Evróputil-
skipun vísi til verðbréfasjóða. Fjár-
festingarfélagið Straumur hafi ekki
starfsleyfi sem verðbréfasjóður og
þess vegna eigi tilskipunin ekki við að
mati Kauphallarinnar. Mótmæli Bún-
aðarbankans vegna þess eigi því ekki
rétt á sér.
Þórður segir að hjá Kauphöllinni
sé litið á brot á flöggunarreglum sem
alvarleg brot. Hann segir mjög mik-
ilvægt að flöggunarreglur séu virtar
og í heiðri hafðar. Almennir fjárfest-
ar verði að fá rétt skilaboð eins og
ætlast sé til í lögum og reglum.
Þórður segir að sektum af því tagi
sem ákveðið hefur verið að beita
gagnvart Búnaðarbankanum, hafi
sjaldan verið beitt, eða einungis tvisv-
ar til þessa. Hann segir rétt að rifja
það upp, að á aðalfundi Kauphallar-
innar fyrir tæpu ári, hafi skýrt komið
fram, m.a. í máli stjórnarformanns,
að Kauphöllin væri að undirbúa sig
undir það að taka harðar á brotum á
markaðnum. Í framhaldi af því hafi í
júní á síðasta ári verið tekin ákvörðun
um að færa eftirlitsmálin og viðurlög
við brotum frá stjórn Kauphallarinn-
ar til forstjóra hennar. Á þeim tíma
hafi stjórnin veitt forstjóra vald til að
taka ákvarðanir í málum af því tagi
sem hér um ræðir. Þar með hafi for-
stjóra verið veitt vald til að ákvarða
févíti vegna brota kauphallaraðila allt
að 8 milljónir króna og að því er varð-
ar skráð félög eða útgefendur allt að 5
milljónir. Í lögum séu reyndar heim-
ildir til að fara enn hærra í sektum en
stjórn Kauphallarinnar hafi ákveðið
þennan ramma.
Þórður segir að Búnaðarbankan-
um sé í sjálfsvald sett að óska eftir því
að stjórn Kauphallarinnar taki mál
þetta til skoðunar ef bankinn telji nið-
urstöðurnar rangar. Hann segir að
bankinn geti einnig óskað eftir því að
Fjármálaeftirlitið skoði málið þar
sem Fjármálaeftirlitið sé eftirlitsaðili
Kauphallarinnar. Þá geti bankinn að
sjálfsögðu farið með málið fyrir dóm-
stóla.
Samningur sem fáir vissu um
Í greinaflokki Agnesar Bragadótt-
ur í Morgunblaðinu, sem bar yfir-
skriftina Baráttan um Íslandsbanka,
kom fram að Jón Ásgeir Jóhannes-
son, stjórnarformaður Baugs, og
samherjar hans hafi hinn 19. júní
2002 gert skriflegan samning við
Árna Tómasson, bankastjóra Búnað-
arbankans, og Yngva Örn Kristins-
son, framkvæmdastjóra verðbréfa-
viðskipta bankans. Í samningnum var
kveðið á um kauprétt Fjárfars ehf.,
félags í eigu Jóns Ásgeirs og fleiri, á
öllum bréfum Búnaðarbankans í
Straumi og sölurétt Búnaðarbankans
á bréfum sínum. Sagði í greininni að
sá hlutur hefði ótvírætt fært Jóni Ás-
geiri og félögum ráðandi hlut í
Straumi, ef samningurinn hefði verið
efndur. Þá kom fram að tilurð þessa
samnings hafi einungis verið á vitorði
örfárra manna.
Kauphöll Íslands hf. beitir Búnaðarbanka Íslands hf. févíti fyrir brot á flöggunarreglum
Bankinn
þarf að greiða
4,5 milljónir
Kauphöll Íslands segir að Búnaðarbankanum hafi borið að tilkynna um
samkomulag bankans við aðra hluthafa í Straumi frá 19. júní 2002.
Morgunblaðið/Jim Smart
BANDARÍSKA fyrirtækið Con-
stellation Brands yfirtók í gær ástr-
alska vínframleiðslufyrirtækið BRL
Hardy, fyrir 1,1 milljarð dollara,
eða sem nemur 87 milljörðum ís-
lenskra króna. Sameinað fyrirtæki
er stærsti vínframleiðandi í heimi.
Forstjóri BRL Hardy, Stephen
Millar, verður yfirmaður hins nýja
fyrirtækis. Hardy og Constellation
áttu áður í samstarfi í gegnum fyr-
irtækið Pacific Wine Partners, sem
markaðssetti framleiðslu ástralska
fyrirtækisins í Bandaríkjunum.
Stjórnarformaður Constellation,
Richard Sands, sagði við BBC News
að samruninn gerði fyrirtækinu
kleift að einbeita sér að sölu á vín-
um frá „nýja heiminum“; Banda-
ríkjunum, Ástralíu, Nýja-Sjálandi
og Chile, en framleiðsla þaðan hafi
verið að sækja mest í sig veðrið að
undanförnu. BRL Hardy er stærsti
vínframleiðandi Ástralíu. Félagið
var stofnað árið 1992.
Nýr risi
í vínfram-
leiðslu
Með samrunanum varð til stærsta
vínframleiðslufyrirtæki í heimi.
Morgunblaðið/Arnaldur