Morgunblaðið - 10.01.2004, Side 24

HÖFUÐBORGARSVÆÐIÐ
24 LAUGARDAGUR 10. JANÚAR 2004 MORGUNBLAÐIÐ
Reykjavík | Smámunasemin og ná-
kvæmnin úr þyrlufluginu hefur nýst
Páli Halldórssyni, fyrrverandi yf-
irflugstjóra hjá Landhelgisgæslu Ís-
lands, vel í áhugamáli hans, en hann
hefur frá unglingsárum bundið inn
bækur.
Nú mun Páll ásamt tveimur vön-
um bókbindurun bjóða almenningi
að kynnast þessu áhugamáli á nám-
skeiði sem hefst á mánudaginn. Það
eru Ragnar Einarsson bókbands-
meistari og kona hans Guðlaug Frið-
riksdóttir bókbindari sem standa að
námskeiðinu ásamt Páli, og hefst
fyrsta námskeiðið mánudaginn 12.
janúar. Kennt verður á mánudags-
kvöldum fram í miðjan mars, alls 40
kennslustundir. Ef aðsókn reynist
góð verður svo boðið upp á námskeið
á laugardögum.
Bókbandið bjargaði tilverunni
Páll þurfti að hætta að fljúga mjög
skyndilega af heilsufarsástæðum, og
segist alls ekki hafa verið undir það
búinn að hætta svona snemma. „Þá
stendur maður eftir eins og asni og
snýst í kringum sjálfan sig. Maður
kann ekki neitt annað í raun og veru
til að hafa í sig og á, og veit ekki
hvað maður á að gera við sjálfan sig.
Ég hafði verið um borð í flugvélum
meira og minna síðan ég var 17 ára
gamall, og svo bara allt í einu var
það búið. Svo bókbandið var, mundi
ég segja, það sem bjargaði minni til-
veru,“ segir Páll.
Hann sökkti sér því í þetta áhuga-
mál sitt af enn meiri áfergju, og hef-
ur bundið inn fyrir sjálfan sig og vini
og kunningja síðan, og deilir nú
áhuga sínum víðar.
Áhugi Páls á bókbandi kviknaði
þegar hann var unglingur. „Ég held
að það sem hafi ráðið úrslitum með
það sé að ég er alveg ferlega pjatt-
aður. Ég hef alltaf lesið mikið og
haft gaman af því að lesa, og ef mér
fannst bókin góð og vildi eiga hana
þá vildi ég ekki bara að hún væri
góð, heldur að hún væri líka falleg.
Þannig held ég að það hafi byrjað.
Svo kom bara í ljós að ég hafði mjög
gaman af þessu,“ segir Páll. Ragnar
bætir við að það sé alveg ljóst að
smámunasemin og nákvæmnin sem
Páll þurfti að sýna í þyrlufluginu
komi sér líka vel í bókbandinu.
„Ég hef aldrei unnið við þetta, en
þetta var mitt helsta áhugamál. Ég
er lítið fyrir skíðaferðir og svoleiðis
vosbúð, þá vil ég heldur vera í bók-
bandinu inni. Ég fékk alveg nóg af
vosbúðinni í vinnunni. En þetta er
mjög gefandi áhugamál, og menn
geta alveg náð langt í þessu þó þeir
séu ekki útlærðir bókbindimeist-
arar. Svo hef ég mikið notað þetta til
gjafa. Fólk getur alveg farið á nám-
skeið og þegar það er búið að ná tök-
um á þessu getur það farið að gera
afmælisgjafir, jólagjafir og ýmsar
tækifærisgjafir,“ segir Páll, og sam-
þykkir hlæjandi að sennilega séu
þau að þessu á kolvitlausum tíma, að
gera ekki út á jólagjafamarkaðinn.
„Það kemur annað haust og önnur
jól,“ segir hann brosandi.
Opin vinnustofa
fyrir áhugasama
Ragnar segir að þrímenningarnir
geri sér enga grein fyrir því hversu
margir hafi áhuga á því að koma á
námskeiðið, en það verði haldið,
sama hvað tauti og rauli. „Ef það
mæta fáir fá þeir sem mæta bara
betri kennslu, við gerum okkur
grein fyrir því að huggulegheit og
góð kennsla eru besta auglýsingin,
þetta kemur hægt og rólega maður á
mann. En þetta á náttúrlega að
verða meira heldur en námskeið.
Það verða þarna kvöldnámskeið, en
síðan ætlum við að hafa þarna opna
vinnustofu þar sem er hægt að taka í
band fyrir Pétur og Pál.“
Á námskeiðinu verður byrjað
hægt og bækur fyrst bundnar inn í
gerviefni áður en farið er út í leð-
urbindingar. Fólk getur þá bundið
inn uppáhaldsbækurnar sínar, hvort
sem það eru gamlar sögubækur, góð
kilja, minningabók eða upp-
skriftabók. Einnig er hægt að gera
við gamlar bækur sem farnar eru að
láta á sjá. „En við ráðleggjum fólki
ekki að byrja á því að reyna að binda
inn mestu gullin sín, það er betra að
æfa sig á einhverju öðru fyrst, sögu-
bókum, orðabókum, biblíunni eða
hverju sem er,“ segir Ragnar. Á
námskeiðinu má reikna með að
binda inn fjórar til sex bækur svo
nægur tími er til að æfa sig áður en
uppáhaldsbókin kemst í nýja kápu.
Það er heilmikil listsköpun fólgin í
bókbandinu, segir Guðlaug. „Svo er
þetta svo mikið mótvægi við tölvuna,
hraðann og allan nútímann. Það er
svo mikil hvíld að komast í þetta,
fara í svona sköpunarvinnu, gamalt
handverk.“
Fyrrverandi yfirflugstjóri hjá Landhelgisgæslunni kennir fólki að binda inn uppáhaldsbækurnar
Miðlar af mikilli reynslu sinni af bókbandi
Morgunblaðið/Árni Sæberg
Gamalt og gott: Bókapressan hans Páls (t.v.) er frá því í fyrra stríði, en
Ragnar (t.h.) segir það ekki koma að sök, tæknin sé enn sú sama.
Reykjavík | Sala á íbúðum í nýjum
fjölbýlishúsum í 101 Skuggahverfi
og Suðurhlíð 38 gengur samkvæmt
áætlun, og hefur þegar verið gengið
frá sölu á þriðjungi íbúða í Skugga-
hverfinu og rúmum helmingi í Suð-
urhlíð.
Byggingar í Skuggahverfi eru
hæst komnar upp á 13. hæð og bygg-
ingarframkvæmdir á áætlun, segir
Einar Halldórsson, framkvæmda-
stjóri 101 Skuggahverfis. Búið er að
ganga frá sölu á rúmum þriðjungi
íbúða, en þær verða samtals 79 í
þessum áfanga.
Einar segir eftirspurnina svipaða
og búist var við. „Við erum ágætlega
ánægðir. Íbúðirnar verða afhentar í
september svo þetta telst vera hröð
byrjun á sölu. Íbúðir á þessum fjöl-
býlishúsamarkaði fara yfirleitt ekki
að seljast fyrr en lengra er komið.“
Hann segist reikna með því að lokið
verði við sölu íbúðanna fyrir árslok,
sem er heldur á undan áætlunum.
Stærri íbúðir seljast betur
Bygging nýs fjölbýlishúss í Suð-
urhlíð 38 gengur einnig vel, og er
byrjað að afhenda fyrstu íbúðirnar.
Jón Valur Smárason, framkvæmda-
stjóri Gígants, segir sölu á íbúðunum
hafa gengið nokkuð vel og áætlanir
geri ráð fyrir því að allar íbúðir verði
fullkláraðar í byrjun apríl, og þá
verði sölu að mestu lokið.
„Þetta [sala íbúðanna] er svona
samkvæmt áætlun, nema það er
reyndar það sem hefur komið á óvart
að stærri íbúðirnar hafa selst meira
en þær minni, það virðist vera meiri
eftirspurn eftir þeim. Það hefur bara
verið vöntun á þessum íbúðum á
markaðinum,“ segir Jón Valur.
Sala á lúxus-
íbúðum á áætlun
Seltjarnarnes | „Ég held að það sé mjög mik-
ilvægt að ala börn upp í þeirri hugsun að það
sem er að gerast í vistkerfinu annars staðar í
heiminum skipti okkur öll mjög miklu máli.
Eins með mannréttindi og lýðræði, þetta eru
sammannlegir hlutir sem koma öllum við,“ seg-
ir Árni Árnason, kennari í Mýrarhúsaskóla og
höfundur, en hann hefur stýrt starfi sem tengir
nám nemenda í skólanum við alþjóðlega
strauma og stefnur.
Mýrarhúsaskóli er fyrsti íslenski skólinn
sem tekur þátt í svokölluðu ASP-neti, sem er
alþjóðlegt samstarfsnet skóla sem vilja starfa í
anda UNESCO, Menningarstofnunar Samein-
uðu þjóðanna.
Í grundvallaratriðum felst starfið í því að
koma þemum frá UNESCO tengdum alþjóða-
samstarfi, mannréttindum, lýðræði, umhverf-
ismálum og gildi ólíkra menningarverðmæta
inn í daglega starfsemi skólans.
Markmiðin eru margþætt, t.d. að efla alþjóð-
lega hugsun nemenda, hvetja til samstarfs á
þjóðlegum og alþjóðlegum grundvelli og auka
gæði kennsluaðferða og námsefnis.
Nemendur verða varir við þennan alþjóð-
lega brag á ýmsan hátt, segir Árni. Hann tekur
dæmi um heimsminjaskrá UNESCO og hvern-
ig hún er notuð í náminu. „Þar eru bæði nátt-
úrufræðileg og menningarleg fyrirbæri sem
eru samþykkt inn á þessa skrá. Við tökum upp
öðru hverju eitthvað sem tengist því sem við
erum að fjalla um í sögu, landafræði eða nátt-
úrufræði. Þá er mjög hentugt að taka upp eitt
og eitt svona fyrirbæri og kynna. Við erum
með efni til þess frá UNESCO og fræðibækur
á bókasafni sem gefa okkur möguleika á að
tengjast þessum fyrirbærum,“ segir Árni.
Varðveisla dýrategunda
Í Mýrarhúsaskóla er mikið fjallað um mik-
ilvægi þess að varðveita dýrategundir, og m.a.
notaðar úrklippur og blaðagreinar til að tengj-
ast líðandi stundu. Árni segir mikilvægt að
markmið ASP-skólanna séu fléttuð inn í al-
mennt skólastarf og séu ekki bara átaksverk-
efni sem standa stutt.
„Það sem mér finnst best í þessu er þessi
möguleiki á að útvíkka það sem við erum að
gera dagsdaglega, þetta er bara bónus við allt
sem okkur er ætlað að gera. En engu að síður
erum við með átaksverkefni líka og við verðum
með þemadaga í mars sem koma til með að
tengjast vatninu og vatnsbúskap. Þannig að
þetta tengist mjög því sem UNESCO er að
bjóða upp á þar,“ segir Árni.
Lögð er áhersla á að fara í ákveðin hugtök
sem eru í blöðunum á hverjum degi, svo sem
eins og hugtakið útrýmingarhætta, og unnið
með þau hugtök í t.d. lestri og skrift.
Aðrir skólar geta notið góðs af brautryðj-
andastarfi Mýrarhúsaskóla, og er Árni orðinn
samhæfingaraðili fyrir starfið hér á landi.
Kostnaðinum við verkefnið segir Árni að hafi
verið stillt í hóf, en hann sé á bilinu hálf til ein
milljón á ári fyrir Mýrarhúsaskóla þar sem
hann leiði starfið, en sé miklum mun minni fyr-
ir aðra skóla sem vilja taka þátt. Sameinuðu
þjóðirnar veita ekki styrki vegna þátttöku í
verkefninu, en styðja frekar við gerð efnis sem
þátttakendur geta nýtt sér.
Morgunblaðið/Árni Sæberg
Fléttað saman: Árni Árnason og krakkarnir í Mýrarhúsaskóla nota meðal annars blaðagreinar
til að tengja námið líðandi stund og vinna ýmis verkefni út frá alþjóðlegu sjónarhorni.
Taka þátt í alþjóð-
legu samstarfi
„Best í þessu er þessi möguleiki á að útvíkka
það sem við erum að gera dagsdaglega“