Morgunblaðið - 28.10.2007, Blaðsíða 66

Sem sýnir kannski
best hve fallvölt
frægðin og fegurðin er í
svíðandi sviðsljósi fjöl-
miðlanna… 73
»
reykjavíkreykjavík
„LÆRÐU að lifa lífinu með mannlegum sam-
skiptum. Mannleg samskipti Group, þegar lífið
liggur við.“ Lokaorðin í þessu kynning-
armyndbandi eru heiti nýjasta leikrits Stúd-
entaleikhússins sem frumsýnt er kl. 20 á laug-
ardagskvöld – í kvöld ef þú ert einn af þeim
heppnu sem fá sunnudagsblaðið á laugardegi,
enda margir blaðberar Morgunblaðsins af-
bragðs tímaflakkarar. Verkið heitir sumsé Þeg-
ar lífið liggur við – Grafalvarlegur skrif-
stofufarsi. Myndbandið má sjá bæði í leikritinu
sjálfu sem og á youtube.com en leikritið fjallar
um tilraunir starfsmanna umrædds fyrirtækis
til þess að halda fund. „Þetta fólk er að selja
námskeið í mannlegum samskiptum en tekst
ekki að eiga nein almennileg samskipti sjálft.
Ég hafði sjálf unnið á svona vinnustöðum og var
orðin svo þreytt á samskiptum sem voru ófrjó,
tilgangslaus og óskilvirk þannig að ekkert kom
út úr fundunum. Það voru engar niðurstöður,
það var bara haldinn annar fundur. Þetta veld-
ur smám saman kulnun í starfi, maður gefst
bara upp og hættir,“ segir Hlín Agnarsdóttir,
leikstjóri og höfundur verksins. Hún hafði sam-
band við Stúdentaleikhúsið að fyrra bragði til
þess að forvitnast um hvort þau hefðu áhuga á
samstarfi.
Dreifarar að skúra
„Ég vann mikið með ungu fólki á árum áður
[meðal annars í Stúdentaleikhúsinu fyrir 23 ár-
um] en hef svo verið í atvinnuleikhúsi í mörg ár.
Svo átti ég þetta verk og klæjaði í fingurna að
koma því á svið. Fannst þetta vera rétta tæki-
færið og þau tóku því vel,“ sagði leikskáldið sem
sjálf er komin aftur í Háskólann sem náms-
maður, stundar nú MA-nám í bókmenntum.
Ágústa Ósk Backman (Vala í leikritinu),
varaformaður Stúdentaleikhússins, segir vinn-
una með Hlín hafa verið mjög skemmtilega.
„Þetta voru allt persónur sem maður kannaðist
við úr þjóðfélaginu og leikritið er mjög
skemmtilegt aflestrar. Það var líka góð tilbreyt-
ing að fá handrit, við höfum undanfarið verið
með leikrit sem hafa verið búin til í ferlinu,
þannig að það var nýtt að vera með handrit frá
upphafi.“
Lægst settu starfsmenn fyrirtækisins (sem
einnig eru þeir einu sem alltaf eru mættir á
réttum tíma) eru landsbyggðarfólk. Hlín segir
það hafa verið vísvitandi. „Þau hafa þurft að
flytja í borgina. Þau vinna þarna við það að þrífa
fyrirtækið og það að hugsa um húseignina – er
ekki landsbyggðarfólk margt annars flokks í
þjóðfélaginu? Það kvartar að minnsta kosti oft
yfir því. En þetta eru líka tragískar persónur.
Þetta er fólk sem hefur neyðst til þess að flytja
vegna snjóflóðanna á Vestfjörðum.“
Beðið eftir fundi
Andi Beðið eftir Godot svífur óneitanlega yfir
vötnum, starfsmennirnir eru endalaust að bíða
eftir fundi sem aldrei virðist ætla að hefjast.
„Það eru stöðugar truflanir í fyrirtækinu, bæði
innri og ytri.“ Ein algengasta truflunin er há-
vær sinfóníutónlist sem heyrist með reglulegu
millibili. „Við ákváðum að hafa sama hringitón-
inn fyrir alla, við vildum ekki að fólk þekkti sína
síma,“ segir Hlín og Ágústa bætir við: „Einhver
byrjaði að söngla algengasta hringitóninn og
þannig var hann valinn. Sinfóníur og önnur fal-
leg tónlist afskræmist í þessa óþolandi innrás í
líf fólks, það er alltaf verið að trufla mann. Til
dæmis símar sem hringja í leikhúsi …“
Þetta hraða þjóðfélag heldur fólki oft niðri.
„Fólk kemst aldrei áfram með neinn skapaðan
hlut. Síst af öllu ef það ætlar að vera einlægt og
segja eitthvað af viti, þá er það stoppað af. Okk-
ar þjóðfélag er dálítið þessu brennt, við fáum
aldrei að fara niður á neitt djúp, það er hvorki
þolinmæði né umburðarlyndi gagnvart því fólki
sem raunverulega hefur eitthvað að segja um
hlutina. Þá er tíminn búinn eða síminn hringir,“
segir Hlín og við það bætir Ágústa: „Það er allt
svo hratt, allt þarf að gerast núna en samt ger-
ist ekki neitt, það er engin skilvirkni þótt alltaf
sé verið að reyna að auka hana.“
Leikritið er sýnt í kjallara Norræna hússins
sem Ágústa segir frábæra aðstöðu. „Maður
vissi ekki almennilega af þessu og þetta er eins
og í völundarhúsi, þetta er miklu stærra en það
lítur út fyrir að vera.“ Hlín er mjög ánægð með
nýjan forstjóra hússins sem hún segir hafa
komið með nýja sýn á þetta fornfræga hús.
„Hann vill koma húsinu aftur á kortið. Nánast
ekkert af þessu unga fólki hafði komið í húsið.“
Starfsfólkið segja þau auk þess hafa verið sér-
staklega liðlegt og gaman hafi verið að búa til
nýtt leikhús í kjallaranum en gestir fá ellefu
tækifæri til þess að heimsækja þetta nýja leik-
hús, sýningardagskrá má finna á vefsíðunni
studentaleikhus.is.
asgeirhi@mbl.is
TRUFLUÐ SAMSKIPTI
STÚDENTALEIKHÚSIÐ SÝNIR LEIKRITIÐ ÞEGAR LÍFIÐ
LIGGUR VIÐ – GRAFALVARLEGUR SKRIFSTOFUFARSI, Í
KJALLARA NORRÆNA HÚSSINS. ÁSGEIR H. INGÓLFSSON
KYNNTI SÉR LEIKHÓPINN SEM NÝTIR SÉR M.A. VEFSÍÐUNA
YOUTUBE.COM TIL KYNNINGAR Á VERKINU.
Morgunblaðið/Jón Svavarsson
Þróun Karlkyns starfsmenn fyrirtækisins Góð samskipti með sýnikennslu í samskiptatækni. „Fólk kemst aldrei áfram með neinn skapaðan hlut,“ segir Hlín meðal annars um verkið.