Morgunblaðið - 17.12.2007, Blaðsíða 13

MORGUNBLAÐIÐ MÁNUDAGUR 17. DESEMBER 2007 13
ÚR VERINU
Eftir Helga Bjarnason
helgi@mbl.is
„ÞAÐ virðist alltaf vera hægt að
ganga að henni eins og innleggi í
banka,“ sagði Sveinn Guðmundsson,
2. stýrimaður á Jónu Eðvalds frá
Hornafirði, um síldveiðarnar á
Grundarfirði. Skipið var á föstudag
á Faxaflóa, á leið á miðin, í leið-
indaveðri, eins og það gerist verst,
sagði Sveinn.
Sveinn sagði að veiðin hefði geng-
ið vel frá því að þeir skiptu stóru
síldarnótinni út fyrir loðnunótina
enda sækti síldin mikið upp í fjöru.
Hún hefur mikið haldið sig í sjö til
tíu föðmum þannig að 150 faðma
síldarnótin var heldur djúp til að at-
hafna sig með í Grundarfirði.
Yfirleitt hefur fengist fullfermi í
einu til tveimur köstum. Einn dagur
hefur dugað til að kasta og dæla upp
aflanum og síðan hefur tekið við
þrjátíu tíma sigling til Hornafjarðar,
löndun og sigling á miðin á ný. „Við
finnum okkur ýmislegt til dundurs,
erum vel tölvuvæddir og með sjón-
varpsstöðvar,“ sagði Sveinn.
Jóna Eðvalds var í sínum síðasta
túr fyrir jól þegar rætt var við Svein
og komin með ríflega 8000 tonn. Út-
gerðin á eftir nokkur þúsund tonna
kvóta þannig að Sveinn bjóst við að
heimsækja Grundarfjörðinn á ný.
Eins og að sækja innlegg í banka
Ljósmynd/Elvar Örn Unnsteinsson
Á miðunum Dælt úr stóru kasti á Jónu Eðvalds inni á Grundarfirði. Skipið tekur um 650 tonn og eitt kast dugar greinilega í þetta skiptið.
Eftir Ómar Garðarsson
SÍLDARVERTÍÐINNI er að ljúka í Vest-
mannaeyjum. Mikið er í húfi fyrir Eyjamenn
að vel gangi í síldinni því þeir hafa yfir að
ráða fjórðungi síldarkvótans sem í ár er
150.000 tonn.
Stærst er Ísfélagið með 20.404 tonn,
Vinnslustöðin er með liðlega 16.000 tonn og
loks er það vinnsluskipið Huginn VE sem
með 3200 tonn. Samtals gera þetta rétt tæp-
lega 40.000 tonn og eru aðeins um 4000 tonn
óveidd.
Reynt hefur verið að vinna síldina til
manneldis eins og kostur er. Er hún flökuð
og fryst og helstu kaupendur eru lönd í Aust-
ur-Evrópu, Pólland, Rússland, Eystrasalts-
löndin og Úkraína, og svo Japan.
Ánægðir með vertíðina
Tvennt hefur einkennt vertíðina, annars
vegar að síldin hefur nánast öll veiðst í
Grundarfirði og hins vegar mjög erfitt tíð-
arfar þar sem hvert stórviðrið hefur rekið
annað.
Sigurjón Gísli Jónsson, framleiðslustjóri í
Vinnslustöðinni, er mjög ánægður með ver-
tíðina en þeir áttu eftir sem svarar einum
farmi á föstudaginn þegar Sighvatur Bjarna-
son VE var á landleið með 500 tonn í kolvit-
lausu veðri.
„Við höfum unnið á vöktum í haust og
reynt að flaka og frysta eins og aldur og gæði
síldarinnar hafa leyft,“ sagði Sigurjón Gísli.
„Venjulega er um 15 klukkutíma sigling af
miðunum og þá höfum við tvo sólarhringa til
að vinna síldina.“
Eyþór Harðarson, útgerðarstjóri í Ísfélag-
inu, var ekki síður ánægður með vertíðina.
„Þetta hefur gengið mjög vel og við eigum
eftir um 2300 tonn óveidd. Aflinn hefur að
mestu verið flakaður og frystur,“ sagði Ey-
þór.
„Við erum með tvo síldarkvóta, 3200 tonn,
og eigum um 500 tonn eftir,“ sagði Páll Þór
Guðmundsson, útgerðarstjóri Hugins.
Reynt að vinna sem
mest til manneldis
Morgunblaðið/Sigurgeir
Síld Sigurjón Gísli Jónsson framleiðslustjóri og Brynjar Guðmundsson verkstjóri hjá Vinnslu-
stöðinni eru farnir að sjá fyrir endann á síldarvertíðinni.
 Óvenjulegri síldarvertíð að ljúka hjá Eyjamönnum  Skipstjórar og stjórnendur í vinnslunni eru ánægðir
ÞEGAR búið var að landa þúsund tonnum
af síld úr Álsey VE í Vestmannaeyjum á
föstudag hafði skipið borið fjögur þúsund
tonn að landi á þessari vertíð og hún hef-
ur öll farið til vinnslu hjá Ísfélaginu.
Ólafur Einarsson skipstjóri var nokkuð
ánægður með magnið, miðað við hvað þeir
byrjuðu seint. Segir að veðrið og að síldin
skuli halda sig inni á Grundarfirði geri
þessa vertíð mjög sérstaka.
Tíðarfarið með ólíkindum
„Síld var í Grundarfirði í fyrra en það
var ekki fyrr en eftir áramót að menn
reyndu fyrir sér þar. Þetta er ágætis síld
og hentar vel til vinnslu,“ sagði Ólafur.
„Maður ímyndar sér að hún sæki þarna
í seltuminni og kaldari sjó til vetursetu.
Annars verður þú að spyrja fiskifræð-
ingana,“ sagði Ólafur spurður um ástæðu
þessarar hegðunar síldarinnar sem hann
segir að hafi sína kosti og galla.
Þarna hafa nótaskipstjórar verið að
vinna á svæði sem þeir þekktu ekki fyrir
og eru dæmi um að nætur hafi skemmst
þegar þær lentu í botni. „Það er grunnt
þarna og getur verið varasamt að kasta
en á móti kemur að við erum að vinna á
sléttum sjó. Við höfum fengið upplýsingar
um botninn hjá þeim í Grundarfirði en
annars höfum við spilað þetta af fingrum
fram.“
Þegar búið er að ná síldinni er fyrir
höndum 15 tíma sigling til Vestmannaeyja
sem stundum hefur verið erfið í haust.
„Tíðarfarið hefur verið með ólíkindum.
Við höfum orðið að sæta lagi en allt hefur
þetta blessast. Síðustu vikur hefur verið
ótrúlega stutt á milli lægða, tvær og þrjár
á viku og um og yfir 30 metra vindur í
kortunum með hverri lægð.“
– Hafa þetta verið óvenjulega hörð veð-
ur?
„Maður er fljótur að gleyma, man það
góða, en ég er sannfærður um að ekki
hefði veiðst mikið af síld hefði hún haldið
sig djúpt undan Suðurlandi í haust,“ sagði
Ólafur að endingu.
Morgunblaðið/Sigurgeir
Skipstjóri Ólafur Einarsson, skipstjóri á Álsey VE, segir að tíðarfarið hafi verið erfitt á síld-
arvertíðinni. Sjómennirnir hafi orðið að sæta lagi á milli lægða en allt hafi þó blessast.
Síldin hefði ekki veiðst
djúpt út af Suðurlandi