Kirkjuritið - 01.04.1956, Blaðsíða 6

148
KIRKJURITIÐ
að í þeim skilningi, að nú eru samgöngur allar mun greiðari en
áður og nú er hægt að fljúga heimsálfanna á milli á fáeinum
klukkustundum. Hinar ólíkustu þjóðir eru orðnar í nánu sam-
býli á jarðhnettinum.
Margir láta sér nægja að hugsa aðeins um líðandi stund og
njóta þeirra þæginda, sem þróun tækninnar og fjármunir geta
veitt. En fleirum er þó Ijóst, að þetta er ekki nóg til þess að
tryggja öryggi og lífshamingju vor mannanna og því síður veitir
það nokkur svör við dýpstu spurningum mannssálarinnar.
Hver maður þarf að lifa trúarlífi, trúa á Guð og treysta honum
og lifa í samfélagi við son hans, sem sendur var í þennan heim,
til þess að frelsa synduga menn.
Páskareynslan dýpkar skilning vorn á Jesú Kristi, boðskap
hans og lífi. Vér finnum það aldrei betur en nú, að þessi boð-
skapur á erindi til vor, í öll samskipti vor mannanna. Ábyrgð
fyrir Guði og mönnum er hið mikla sannleiksorð kristninnar,
það er lausnarorðið í samskiptum mannanna.
„Þú skalt elska Drottin Guð þinn af öllu hjarta þínu, af allri
sálu þinni og af öllum huga þínum og þú skalt elska náunga
þinn eins og sjálfan þig. (Matt. 22, 37—39).
Vér erum að vísu óendanlega fjarri þeim kærleiksveruleika,
sem Jesú vildi skapa með lífi sínu, en vér megum aldrei þreyt-
ast á að vinna fyrir og berjast fyrir þeim sannindum, sem Jesús
Kristur lifði og dó fyrir.
Páskareynslan er líka ein sterkasta stoðin undir ódauðleika-
trú mannsandans. Með upprisunni leiddi Jesús Kristur í ljós líf
og ódauðleika. Páll postuli talar um það, að upprisan sé trygg-
ing fyrir upprisu allra manna.
í augum kristinna manna hlýtur upprisa Jesú að vera áhrifa-
mesta sönnunin fyrir framhaldslífinu, ásamt ummælum hans og
dæmisögum.
í reynslu manna almennt er líka margt, sem styrkir ódauð-
leikatrúna.
Um það verður varla deilt, að framhaldslíf mannsandans er
mikilvægasta málið í heimi, og vissulega er það eitt af framtíðar-
verkefnum vísindanna að rannsaka samband lífs og dauða, svo