Kirkjuritið - 01.10.1956, Blaðsíða 10

352
KIRKJURITIÐ
æfinga um háannatímann. Ber þá og söngstjórum þeirra sér-
stakar þakkir. Enn hafa þrír þeirra ekki verið nefndir, Arni Jóns-
son bóndi á Víðimel, frú Pála Pálsdóttir, Hofsósi og frú Hulda
Óskarsdóttir, Vatni. En allsherjarsöngstjórn og undirbúning hafði
Eyþór Stefánsson, svo sem fyrr er að vikið. Vonandi er, að allt
þetta góða fólk finni þakkir sínar í verkinu sjálfu og hátíðargestir
hafi haft blessun af samverustundinni.
Ræða er herra Ásmundur Guðmundsson biskup
flutti að Hólum í Hjaltadal 19. dgúst sl.
Hlýðið á orð Heilagrar Ritningar í Hebreabréfinu 13, 7:
Verið minnugir leiðtoga ijðar, sem Guðs orð hafa til yðar talað:
virðið fyrir yður, livernig æfi þeirra lauk, og líkið síðan eftir
trú þeirra.
Náð sé með yður og friður frá Guði föður vorum og drottni
Jesú Kristi.
Orðin, sem ég las, eiga við á þessari hátíð, er 850 ár eru liðin
frá stofnun Hólastóls og vér sjáum þar í anda friða fylking leið-
toga vorra, er Guðs orð hafa talað til feðra vorra og mæðra.
Vér skulum vera minnug þeirra oss til sálubótar. Og nú vil ég
frá altari Hóladómkirkju minnast með yður sérstaklega hins
fvrsta þeirra, Jóns Ögmundssonar, er vígður var biskup yfir Norð-
lendingafjórðungi af Össuri erkibiskupi í Lundi 29. apríl 1106.
En minning hans er hliðstæð ísleifs Gissurarsonar í Skálholti
og milli þeirra hið nánasta samband: ísleifur fóstri og kennari
Jóns, og segir svo í Jóns sögu helga, hinni elztu, að hann hafi
mælt svo um ísleif: „Hans skal eg ávallt geta, er eg heyri góðs
manns getið. Nú var þetta fagur vitnisburður ísleifi biskupi. er
heilagur maður skyldi svo ræða um hann, en virðing mikil Jóni
biskupi, er slíkur maður skyldi hafa fóstraðan hann.“