Uppeldi og menntun - 01.01.2003, Síða 92

SKAPANDI HUGSUN OG ÆVINTÝRAGERÐ
NIÐURSTÖÐUR
Með því að leggja áherslu á að börn fáist við ævintýri á fjölbreytilegan hátt í skóla-
starfinu er lögð rækt við hugarflug og ímyndun, þær gerðir hugsunar sem eru mest
einkennandi fyrir ævintýri. Ég held því fram að þörf sé á því að vega upp á móti
þeirri áherslu sem lögð er á rökhugsun en hún virðist vera ráðandi í hefðbundnu
skólastarfi í grunnskólum á Vesturlöndum. Tilgáta mín er sú að börn tákngeri í ævin-
týrunum þau viðfangsefni sem þau verða að takast á við til að þróa sjálfsmyndina og
taka út þroska. Þessi viðfangsefni eru ekki síður af sálrænum toga þó þau geti tengst
raunverulegum vandamálum í lífi barna. Til þess að vaxa og þroskast þarf barnið
stöðugt að stíga skref út í hið áður óþekkta. í ævintýrum er þessari þörf mætt með
því að láta söguhetjuna fara að heiman. Með því að miðla ævintýrum til barna og
gefa þeim tækifæri til að semja eigin ævintýri eru þau hvött til að ná sambandi við
eigin dulvitaðar víddir og gefa skapandi kröftum útrás. Slíkt styður þau í að feta sig
eftir vandfarinni þroskabraut og býr þau undir framtíðina. Ævintýrin sem samin
voru af tíu og ellefu ára börnum sem tóku þátt í vettvangsrannsókn minni einkennd-
ust af erfiðum og ögrandi skrefum sem þarf að stíga. í þessum ævintýrum er óttinn
við kynþroskann, að vaxa og verða fullorðinn sláandi. Sú athyglisverða staðreynd
undirstrikar einmitt gildi þess að hvetja börn, sem margir álíta að séu komin yfir svo-
kallaðan „ævintýraaldur", tii þess að glíma við ævintýri á fjölbreytilegan hátt.
90