Fréttablaðið - 16.01.2010, Blaðsíða 28

28 16. janúar 2010 LAUGARDAGUR
S
érhæfðri rústabjörgunarsveit
Slysavarnafélagsins Landsbjarg-
ar var flogið til Haítí á miðviku-
dagsmorgun, daginn eftir að
harður jarðskjálfti lagði höfuð-
borg landsins, Port-au-Prince,
og nærsveitir í rúst. Flugvél Icelandair, sem
flutti sveitina til Haítí, var svo nýtt til að
flytja erlenda ríkisborgara sem vildu kom-
ast frá landinu í burtu.
Um það bil 80 voru fluttir burtu frá Haítí,
en sökum þess að áhöfn þotunnar þurfti að
taka lögbundna hvíld þurfti að hafa viðkomu
á Bahamaeyjum. Um 90 mínútur tekur að
fljúga frá Haítí til Bahamaeyja.
„Við buðum fólki sem var vegalaust að
koma með okkur,“ segir Þorbjörn Jónsson,
sendiráðunautur hjá utanríkisráðuneytinu,
sem var með í för, og skipulagði meðal ann-
ars heimflutning fólksins. Hann segir far-
þegahópinn hafa verið nokkuð óvenjulega
saman settan, og flestir tengdir trúboði eða
trúarhópum.
„Ég held ég hafi aldrei verið blessaður
jafn oft,“ segir Þorbjörn, þegar hann rifjaði
upp ferðina í samtali við blaðamann.
Stærstur hluti farþeganna var hópur af
um 50 Bandaríkjamönnum og Kanadabú-
um af úkraínskum og rússneskum upp-
runa. Hópurinn var staddur á Haítí til að
byggja kirkju, og hafði nýlokið við bygging-
una þegar skjálftinn reið yfir. Ekki fylgdi
sögunni hvernig byggingunni reiddi af í
skjálftanum.
Nær allir farþegarnir sem fóru frá Haítí
með íslensku þotunni urðu eftir á Bahama-
eyjum og komu sér flestir eftir öðrum leið-
um til Bandaríkjanna. Sex þýskir ríkis-
borgarar, einn Breti og einn Frakki fengu
þó far áfram til Íslands og flugu héðan til
síns heima.
Þorbjörn segir þotuna ekki hafa getað
stoppað lengi á flugvellinum á Haítí, aðal-
lega vegna þess að flugmennirnir þurftu að
stoppa á Bahamaeyjum til að fá hvíld. Því
hafi aðeins um 80 manns fengið far þótt
fleiri hefði verið hægt að finna sem vildu
fara hefði meiri tími verið til stefnu. Á lóð-
inni fyrir utan flugstöðina hafi safnast tals-
verður hópur af fólki, en engum sem beðið
hafi um að fá að fara með vélinni hafi verið
neitað.
Til Íslands kom meðal annars fimm
manna þýsk fjölskylda sem fór til Haítí á
vegum kristilegra samtaka. Þorbjörn segir
yngsta barnið aðeins hafa verið nokkurra
mánaða gamalt og ekki hafi þótt forsvaran-
legt að láta börnin vera áfram á hamfara-
svæðinu þar sem aðgengi að hreinu vatni,
rafmagni og hreinlætisaðstöðu sé lítið sem
ekkert.
Með fjölskyldunni var einnig þýskur emb-
ættismaður sem hafði unnið að þróunarað-
stoð á vegum Evrópusambandsins á Haítí.
Hótel hans hrundi meðan hann var inni á
herbergi sínu, en hann slapp ómeiddur.
Hann stóð þó uppi slyppur og snauður og
eftir að hafa gert sitt besta til að bjarga fólki
úr rústunum strax eftir skjálftann ákvað
þýska sendiráðið að senda hann heim með
fjölskyldunni.
Aldrei verið blessaður jafn oft
Þota Icelandair sem flaug með rústabjörgunarsveit Landsbjargar til Haítí flutti um 80 erlenda ríkisborgara burt frá landinu. Flestir
urðu eftir á Bahamaeyjum en nokkrir nýttu sér ferðina og fengu far til Íslands. Valgarður Gíslason, ljósmyndari Fréttablaðsins, fékk
að fylgjast með ferðum björgunarsveitarinnar og brottflutningi fólks frá Haítí eftir að jarðskjálfti lagði höfuðborg landsins í rúst.
FLUTT BURTU Íslenska þotan flutti um 80 manna hóp frá höfuðborg Haítí. Flestir voru staddir í landinu á vegum trúarsamtaka.
Í VÉLINA Stærsti hópurinn sem fluttur var á braut var hópur af ungu fólki frá Bandaríkjunum og Kanada sem hafði
nýlokið við að reisa kirkju á Haítí þegar skjálftinn reið yfir.
TIL ÍSLANDS Þýsk kona með þrjú börn fór ásamt eiginmanni sínum burt frá hamfarasvæðinu, enda þótti
ekki forsvaranlegt að vera með börnin í landinu lengur. Fjölskyldan var nýkomin til landsins á vegum kristi-
legra samtaka þegar jarðskjálftinn varð.
MILLILENT Íslenska þotan þurfti að millilenda á Bahamaeyjum á leiðinni til Íslands svo áhöfnin fengi lög-
bundna hvíld. Þýska fjölskyldan fékk því kærkomna hvíld í sannkallaðri paradís á jörð eftir að hafa upplifað
hörmungarnar á Haítí.
BJÖRGUNARSVEIT Talsverð ringulreið
ríkti í höfuðborg Haítí strax eftir skjálft-
ann. Íslenskir björgunarsveitarmenn
notuðu tímann til að aðstoða fólk sem
komið var á flugvöllinn.