Saga - 2005, Qupperneq 177

Jöklasýning á Höfn
Reykjavík var ein af menningarborgum Evrópu árið 2000 og af því
tilefni var sett upp jöklasýning í Sindrabæ á Höfn í Hornafirði um
sumarið. Mikill áhugi reyndist á efninu og árið 2002 var sýningin
færð í annað og betra húsnæði á Höfn, í hús sem áður var Vöruhús
Kaupfélags A-Skaftfellinga. Þar var sýningin á einni hæð með til-
tölulega fáum gripum og sýningaspjöldum á tréflekum og
nokkrum glerskápum en auk þessa var svæði þar sem sýnd var
kvikmynd. Hugmyndin á bak við sýninguna byggðist í fyrsta lagi
á því „að koma þekkingu um jökla, náttúrufar og byggðir umhverf-
is þá á framfæri á aðgengilegan og aðlaðandi hátt. Í öðru lagi að
byggja upp afþreyingu fyrir ferðamenn á Höfn …“12 Hins vegar
bar framsetning efnis þess nokkur merki að sýningin var unnin af
vanefnum.
Í sumarbyrjun 2005 var ný og viðamikil jöklasýning, ÍS-land, opn-
uð eftir gagngerar endurbætur og í mun stærra húsnæði í gamla
vöruhúsinu. „Megintilgangur sýningarinnar er að auka og miðla
þekkingu á jöklum og mótunaráhrifum þeirra á land og þjóð.“13
Sýningin ÍS-land er í nokkrum sölum á tveimur hæðum og í „boði
er upplifun, fræðsla um náttúruna á þessum slóðum og ýmis jökla-
fræði fyrir gesti með mismunandi undirbúningsþekkingu“, eins og
segir á vefsvæði sýningarinnar.14 Sýningin er gerð aðgengilegri
fyrir gesti með skiptingu í fimm meginþemu eftir sölum. Í fyrsta
lagi er kynning og náttúruvernd. Í annan stað náttúra og þjóðgarð-
ur. Í þriðja lagi jöklafræði. Í fjórða lagi er upplifun jökuls, sem felst
m.a. í ígildi jöklasprungu og íshellis. Loks er búseta við jökul og
rannsóknarferðir. Sem fyrr er kvikmynd sýnd á sérstöku svæði en
jafnframt eru á sýningunni þrír stórir skjáir með lifandi myndum.
Auk þess eru margmiðlunartölvur en annars konar gagnvirkni er
líka í boði, t.d. aflestur mælitækja og hnappaborð við líkön og dýr.
Einnig er unnið með hljóð á sýningunni og útsýni til jökla blasir
víða við úr sýningarsölum en gestir geta enn fremur farið upp á út-
sýnispall á þaki hússins þar sem er útsýni til allra átta.
T Æ K N I — S T R Í Ð — Í S 177
12 ÍS-land. Jöklasýning á Höfn. Vefslóð: http://www.hornafjordur.is → Menn-
ing → Jöklasýning → Um sýninguna → Saga safnsins.
13 ÍS-land. Jöklasýning á Höfn. Vefslóð: http://www.hornafjordur.is → Menn-
ing → Jöklasýning → Um sýninguna → Saga safnsins.
14 ÍS-land. Jöklasýning á Höfn. Vefslóð: http://www.hornafjordur.is → Menn-
ing → Jöklasýning → Um sýninguna.
Saga haust 2005-NOTA 23.11.2005 20:11 Page 177