Saga - 2005, Qupperneq 255

sögu landsins snertir, tekur þetta bindi til tímabilsins 1630–1685 sem Helgi
Þorláksson hefur samið yfirlit um. Þá er langur kafli um bókmenntir á lær-
dómsöld 1550–1750 eftir Óskar Halldórsson og Þóra Kristjánsdóttir fjallar
um myndlist á 17. öld. Ritið er 366 bls.
Ekki tókst á starfsárinu að koma út í fullnaðarútgáfu Stuttri greinargerð
um Ísland (Brevis commentarius de Islandia) eftir Arngrím Jónsson lærða
þótt stefnt hafi verið að því. Verður þetta verkefni næstu stjórnar.
Til álita kom að gefa aftur út Íslandssögu til okkar daga eftir Björn Þor-
steinsson og Bergstein Jónsson sem félagið gaf fyrst út árið 1991. Upplagið
er nú þrotið. Óhætt er að fullyrða að ekkert rit hefur á síðustu áratugum
skilað félaginu viðlíka miklum tekjum og þetta yfirlitsverk. Því má m.a.
þakka að félagið gat eignast á sínum tíma þak yfir höfuðið. Stjórninni er
ljóst að til vansa er að hafa þetta sígilda verk ekki lengur á boðstólum; en í
ljósi bágrar fjárhagsstöðu treystist stjórnin ekki til þess að ráðast að svo
stöddu í þá miklu fjárfestingu sem endurútgáfa þess mundi fyrirsjáanlega
kosta.
Hið viðamikla verk, Stjórnarráð Íslands 1964–2004 I–II, kom út á fyrra
starfsári, en þriðja og síðasta bindið í upphafi þessa starfsárs. Réttu ári eft-
ir heimastjórnarafmælið, þ.e. 1. febrúar á þessu ári, stóð félagið fyrir mál-
þingi um ritverkið. Voru fjórir sérfræðingar fengnir til þess að fjalla um það
bæði sem heild og einstök bindi þess. Málþingið var allvel sótt og þótti
takast vel. Erindi þriggja af fjórum framsögumönnum á málþinginu munu
birtast í endurskoðaðri mynd í hausthefti Sögu 2005. Miðað við hið góða
orð sem farið hefur af verkinu, eru það stjórninni veruleg vonbrigði hve
dræmt það hefur selst á markaði. Situr félagið uppi með þungar birgðir af
Stjórnarráðssögunni nýju sem og af hinu endurútgefna verki, Stjórnarráð Ís-
lands 1904–1964 eftir Agnar Kl. Jónsson.
Daglegur rekstur félagsins breytist lítt frá ári til árs. Félagið er svo lán-
samt að hafa notið krafta sama starfsmanns í þrjá tugi ára. Var þessa minnst
fyrir ári með hófi í þessu húsi til heiðurs Ragnheiði Þorláksdóttur. Hún hef-
ur að vanda haft afgreiðslu opna hér alla virka daga kl. 14–18 og verið að
öðru leyti vakin og sofin yfir málefnum félagsins. Félagið naut enn Heimis
Þorleifssonar sem hefur séð um reikningshald fyrir félagið og um dreifingu
Andvara og Almanaks Þjóðvinafélagsins á vegum Sögufélags. Báðum eru
þökkuð óeigingjörn störf í þágu félagsins til margra ára.
Loftur Guttormsson lét af stjórnarþátttöku í Sögufélagi eftir seytján ára
setu, fyrst sem gjaldkeri 1988–2001, síðan sem forseti. Kvað hann þetta æði-
langan tíma — drjúga sneið af æviskeiðinu — og því meira en tímabært að
víkja. Frá þessum tíma kvaðst hann tengja einna ánægjulegastar minning-
ar við þrennt: í fyrsta lagi það góða fólk sem hann hafi kynnst og átt sam-
starf við; í öðru lagi tímabilið þegar Sögufélagið komst í álnir nægilega til
að festa kaup á húsi sínu; og í þriðja lagi tilhaldið þegar Sögufélag minnt-
ist hundrað ára tilvistar sinnar fyrir þremur árum. Félagsskapur sem entist
F R Á S Ö G U F É L A G I 255
Saga haust 2005-NOTA 23.11.2005 20:11 Page 255