Flóra: tímarit um íslenzka grasafræði - 01.03.1965, Side 97

hverfið með nokkrum strandrænum blæ. Ekki veit ég til þess, að svo
sé nokkurs staðar á íslandi.
C. Grasdældir (Graminé-snowpatches).
Þriðja gróðurfylki (Alliance) snjódældanna eru grasdældirnar. Þær
greina sig frá áðurnefndum fylkjum í því, að grös eru þar drottnandi
bæði í svip og fleti. Svo má kalla, að í hinum eiginlegu grasdældum
séu runnar horfnir með öllu, og oftast ber sáralítið á blómjurtum. Þó
hittast þar einstöku maríustakkar (Alchemillae), fíflar (Taraxaca) og
skarifífill (Leontodon autumnalis). Snjór er djúpur í þessum dældum
og liggur lengi. Þá munu og grasdældirnar oft liggja að meira eða
minna leyti undir vatnsaga, eins og fyrr var sagt, þegar rætt var um
aðalbláberjadældirnar. Gras hverfin liggja ætíð neðst í snjódældabotn-
inum. Þó getur það verið svo, að gras hverfið sé við sjálfan brekkufót-
inn, en maríustakksbelti þegar fjær dregur brekkunni. Á jafnsléttu
getur yfirborð grasdældarinnar stundum verið þýft. Aðaltegundir þessa
gróðurfylkis eru: Finnungur (Nardus stricta), bugðupuntur (Des-
champsia flexuosa), ilmreyr (Anthoxanthum odoratum), hálíngresi
(Agrostis tenuis) og stinnastör (Carex Bigelouni). Athuganir þær, sem
hér liggja fyrir eru aðallega úr finnungssveitinni. ÍJtbreiðsla grasdæld-
anna eftir hæð er svipuð og aðalbláberjadældanna. Þó ná hrein finn-
ungshverfi lengra niður á bóginn, og taka að verða mjög sjaldséð fyrir
ofan 200 m. y. s. Á Kaldadal voru þau efst í um 350 m hæð, en í sömu
hæð virtust beitilyngshverfi runnaheiðarinnar hverfa einnig. Hins-
vegar nær bugðupuntssveitin miklu hærra upp, enda þótt ekkert verði
fullyrt um efri mörk Iiennar. Grasdældirnar eru að gróðursvip og teg-
unda samsetningu líkar valllendi og brekkum, svo að oft getur verið
erfitt að greina þar á milli. Helztu sérkenni þeirra eru, að þar er ætíð
eitthvað af hreinum snjódældategundum, sem vantar í valllendi og
brekkur. Grasdældirnar íslenzku heyra til Nardeto-Caricion rigidae
Nordhagen 1943 p. 234, en til þess fylkis er einnig talin Alchemilla
alpina-Deschampsia flexuosa sociation. (Ljónslappa-bugðupuntshverfi).
%
a. Finnungs sveit. (Nardetum strictae).
Aðalgróðurhverfi grasdældanna eru finnungs hverfi þau, sem ég
hefi sameinað í eina sveit. Finnungur (N. stricta) gefur gróðursveit-
inni svip, svo að hún, sakir hinna gömlu, visnu blaða og stráa og hins
grágræna sumarlitar finnungsins er ætíð gráleit tilsýndar, og framan
TÍMARIT UM ÍSLENZKA GRASAFRÆÐI - FlÓra 93