Læknablaðið - 15.05.2011, Blaðsíða 42

UMFJÖLLUN O G GREINAR
Upplýsingakver um
lungnakrabbamein
Út er komið kverið Lungnakrabbamein eftir
Tómas Guðbjartsson, hjarta- og lungna-
skurðlækni, prófessor í skurðlækningum
og yfirlækni á Landspítala. Ritinu er ætlað
að veita sjúklingum sem greinst hafa
með lungnakrabbamein og aðstandendum
þeirra upplýsingar um sjúkdóminn.
Að sögn Tómasar Guðbjartssonar var
við gerð kversins höfð til hliðsjónar bókin
Lungnakrabbamein sem hópur lækna af
Landspítalanum gaf út í samvinnu við
Roche á vormánuðum 2009. „Efni kversins
er þó hannað frá grunni með sjúklinga í
huga og því ekki byggt á fyrrnefndri bók
um lungnakrabbamein. Bókin var skrifuð
með heilbrigðisstarfsfólk í huga en brýn
þörf hefur verið á fræðsluefni til sjúklinga
sem kverinu er ætlað að bæta úr. Því er
þó ekki ætlað að koma í stað bæklinga
sem til eru á hinum ýmsu deildum
Landspítala, heldur er það hugsað sem
viðbótarfræðsluefni og er hugmyndin að
sjúklingurinn fái þetta í hendur um það
leyti sem hann greinist, þ.e. þegar hann er í
greiningarferli."
í kverinu er fjallað nokkuð ítarlega um
sjúkdóminn og segir Tómas að þetta sé
ákveðin tilraun til veita fræðslu um eðli og
þróun þessa alvarlega sjúkdóms, lögð er
áhersla á nýjungar í greiningu og meðferð
og tekið mið af íslenskum aðstæðum. Til
ráðgjafar við textagerð voru 16 íslenskir
sérfræðingar úr þverfaglegu teymi. Einnig
er að finna í kverinu almennan fróðleik um
sjúkdóminn, en á síðustu árum hafa miklar
framfarir orðið í greiningu og meðferð
lungnakrabbameins.
„Lungnakrabbamein er mikið
heilbrigðisvandamál hér á landi, líkt og
annars staðar í heiminum. I dag greinast
tveir af hverjum þremur sjúklingum með
útbreiddan sjúkdóm, sem á sinn þátt í
því að lungnakrabbamein leggur marga
einstaklinga að velli. Á síðasta áratug hafa
orðið framfarir í greiningu og meðferð
lungnakrabbameins sem vekja vonir um
bættan árangur, ekki síst hjá sjúklingum
sem ekki hafa staðbundinn sjúkdóm. Ekki
má gleyma mikilvægi reykingavarna,
en síðustu áratugi hefur dregið verulega
úr reykingum hér á landi, sem vonandi
á eftir að skila sér í enn frekari fækkun
tilfella af lungnakrabbameini. Forvamir
og hjálp til reykleysis eru því afgerandi
varðandi árangur af baráttunni við
lungnakrabbamein," segir í lokaorðum
fræðslukversins Lungnakrabbamein,
upplýsingarfyrir sjúklinga og aðstandendur.
>
Deildarlæknir við
Sjúkrahúsið á Akureyri
Laus er til umsóknar staða deildarlæknis við bæklunardeild Sjúkrahússins á Akureyri. Staðan veitist frá 1. september 2011 eða eftir samkomulagi.
Starfið felst í vinnu á bæklunardeild auk vaktaskyldu samkvæmt sérstöku samkomulagi. Læknirinn fær í starfi sínu leiðsögn og kennslu hjá
læknum deildarinnar og á auk þess kost á að sækja fræðslufundi og námskeið á starfstímanum. Við ráðningu verður lögð áhersla á faglega
þekkingu ásamt hæfileikum á sviði samskipta og samvinnu.
Laun eru samkvæmt kjarasamningi Læknafélags fslands og fjármálaráðherra.
Nánari upplýsingar um starfið og önnur starfskjör veitir Hólmfríður Ásta Pálsdóttir umsjónardeildarlæknir í síma 463 0100 eða tölvupósti
hap0310@fsa.is og Ari H. Ólafsson forstöðulæknir í síma 463 0100 eða 860 0454 og tölvupósti ari.olafsson@fsa.is.
Umsóknarfrestur er til og með 15. maí2011.
Umsóknum með upplýsingum um menntun og fyrri störf ásamt nafni og símanúmeri meðmælanda skal skilað, á þar til gerðum eyðublöðum sem
fást á skrifstofu sjúkrahússins eða www.fsa.is/, til Starfsmannaþjónustu Sjúkrahússins á Akureyri, Eyrarlandsvegi, 600 Akureyri, eða á netfang
starf@fsa.is.
Öllum umsóknum verður svarað þegar ákvörðun um ráðningu hefur verið tekin. Við ráðningar í störf við FSA er tekið mið af jafnréttisstefnu
sjúkrahússins.
322 LÆKNAblaðið 2011/97