Frjáls verslun - 01.10.2007, Qupperneq 39

F R J Á L S V E R S L U N • 1 0 . T B L . 2 0 0 7 39
ú r b l a ð a m e n n s k u í a l m a n n a t e n g s l
Áslaug: Klárlega eru blaða- og fréttamenn vanir að vinna undir
tímapressu og greina kjarnann frá hisminu eins og ég nefndi áðan.
En þar með er ekki endilega sagt að þeir nái betri árangri en aðrir
í þessum störfum.
Megum við búast við því að sérmenntuðu fólki á sviði
almannatengsla/kynningarstarfa fjölgi verulega á næstu árum?
Áslaug: Já, þróunin hefur verið á þann veg. Áreitið er stöðugt
að aukast og samskiptaleiðunum að fjölga. Stjórnendur gera sér
í auknum mæli grein fyrir mikilvægi góðrar upplýsingagjafar og
góðs orðspors. Árangursrík almannatengsl felast í að setja sér skýra
stefnu með mælanleg markmið að leiðarljósi. Við þurfum fólk með
mismunandi bakgrunn og fjölþætta menntun og starfsreynslu til
þess að sinna þessum störfum en þörf fyrir sérmenntað starfsfólk
hefur og mun aukast. Þannig hefur þróunin verið erlendis og á ég
ekki von á því að hún verði öðruvísi hér á landi.
Jón Hákon: Já, mikið, ef þróunin á að verða hér eins og í
grannríkjum okkar. Mikil þörf verður fyrir menntað fólk eins og ég
nefndi áðan. Tekið skal fram að menntun ein og sér dugir ekki til að
verða góður ráðgjafi á þessu sviði. Svo er alls ekki það sama að vera
hæfileikaríkur fréttamaður og hæfileikaríkur almannatengill.
Í hverju felst einkum starf almannatengils/blaðafulltrúa?
Jón Hákon: Ég væri fljótari að segja þér hvað ekki felst í starfinu.
Menntun, reynsla, útsjónarsemi, metnaður, ráðgjafarhæfileikar og
þekking á öllum innviðum samfélagsins eru nauðsynlegur grunnur.
Númer eitt, tvö og þrjú er svo að kunna að koma skilaboðum hratt
og vel til réttra aðila.
Áslaug: Starf ráðgjafa í almannatengslum hefur breyst mikið
undanfarin ár samfara auknu áreiti, nýjum verkfærum og aðferðum
við miðlun upplýsinga. Eftir stendur þó að stefnumótun og gildi á
borð við heiðarleika og traust eru jafn mikilvæg og áður. Ráðgjafar
í almannatengslum móta heildstæða stefnu í samskiptamálum
fyrirtækja og stofnana gagnvart haghöfum, þ.e. viðskiptavinum,
hluthöfum, starfsmönnum, fjölmiðlum eða öðrum sem fyrirtæki
eða stofnanir eiga í samskiptum við. Í því sambandi störfum við oft
náið með stjórnendum eða upplýsingafulltrúum innan fyrirtækja.
Við greinum þá hópa sem upplýsingar eiga að ná til, forgangsröðum
tækjum og leiðum sem nota á við upplýsingagjöfina og skoðum
hvernig eiga má gagnvirk samskipti við þessa hópa. Meðal
þeirra verkefna sem við fáumst við eru ráðgjöf, fjölmiðlatengsl,
fjárfestatengsl, stjórn hvers kyns viðburða, útgáfa, endurmörkun,
krísustjórnun og námskeið.
Hvað með ímynd viðskiptavinanna? Er það hlutverk
almannatengla að sjá um að hún sé í lagi?
Áslaug: Tvímælalaust. Markmiðið ætti að vera það að ímynd og
orðspor viðkomandi viðskiptavina séu í takt við raunveruleikann og
gefi sem raunsannasta mynd af honum. Væntingar ættu sömuleiðis
að taka mið af þessu. Traust og trúverðugleiki skipta öllu máli
því hægt er að tengja orðspor árangri fyrirtækja og stofnana með
beinum hætti.
Jón Hákon: Við aðstoðum fyrirtæki, stofnanir og samtök við að
laga, breyta og styrkja ímynd sína. Við búum hana ekki til. Hún
verður til á sínum forsendum á árum og áratugum. Í þessum
málum er engin galdraþula til. Mikilvægt er að á milli stjórnenda
fyrirtækja og ráðgjafa þeirra í almannatengslum ríki trúnaður og
gagnkvæmt traust. Það er lykilinn að góðum árangri.
Atgervisflótti
eða eðlileg þróun?
„Mörg fyrirtæki halda
að það eitt sé nóg í
almannatengslum að
ráða „þekkt andlit“ eða
„þekkt nafn“ og þá sé
allt í góðum gír. Svo
einfalt er málið ekki,
því almannatengsl eru í
eðli sínu ansi frábrugðin
fréttamennsku.“