Són - 01.01.2008, Side 5

Til lesenda
Sónarmjöðurinn er ekki enn uppdrukkinn. Það sannar lífleg ljóðaiðja
landsmanna sem ekki dregur úr nema síður sé. Ekkert virðist koma í
stað þess að geta dvalið við þá íþrótt mannanna sem Egill Skalla-
grímsson nefndi vammi firrða. Er það von okkar sem stöndum að út-
gáfu Sónar að hún reynist heppilegur vettvangur þeirra sem vilja
kanna nánar úr hverju mjöðurinn er gerður, hvernig hann hefur varð-
veist á ýmsum skeiðum og hvernig honum vegnar nú um stundir.
Sú breyting hefur nú orðið með þessu hefti að í ritstjórn hefur bæst
Rósa Þorsteinsdóttir og er hún hér með boðin velkomin. Þá hefur
Einar Sigmarsson horfið úr ritnefnd og kunnum við honum bestu
þakkir fyrir hans verðmæta framlag til fyrri hefta Sónar.
Við tökum nú upp þátt að nýju sem slitnaði í síðasta hefti Sónar. Í
4. hefti var birt yfirlit yfir ljóðabækur ársins 2005 og nú gerir Helga
Birgisdóttir grein fyrir ljóðárinu 2007. Hyggjumst við halda áfram að
gefa lesendum nokkra yfirsýn yfir helstu strauma í íslenskri ljóðagerð
frá ári til árs.
Í þessu hefti, svo sem í hinum fyrri, er sinnt bæði gömlu efni og því
sem nýrra er og fjallað um ljóð allt frá Ljóðaljóðum Gamla testament-
isins til vorra daga.
Sónarskáld að þessu sinni er Þórarinn Eldjárn en auk hans eiga
þeir Björn Ingólfsson, Kristian Guttesen og Valdimar Tómasson ljóð
í Són. Einnig eru í þessu hefti birt þrjú áður óbirt ljóð eftir Ólínu
Jónasdóttur skáldkonu. Þá er í þessu hefti birt þýðing Tryggva Þor-
steinssonar á fjórða kafla Kvöldheima (Aftonland) eftir sænska skáldið
Pär Lagerkvist en sá ljóðabálkur hlýtur að teljast eitt helsta stórvirki
í sænskum bókmenntum 20. aldar.
Öllum sem hér eiga efni og réttu okkur hjálparhönd kunnum við
bestu þakkir og biðjum lesendur vel að njóta.
Fyrir hönd Sónarsinna
Þórður Helgason