Són - 01.01.2008, Page 33

LIST Í LOKRUM 33
Hér er svo að skilja að Æsir séu sigursælir og ekkert sem gefur í skyn
að í hönd fari ein samfelld hrakfallasaga þar sem Æsir bíða sífellt lægri
hlut. Athyglisverð er hér gullkenningin Stúma hljóð. Jötunsheitið Stúmi
er seinna í rímunum notað um Útgarða-Loka og áður en yfir lýkur fá
Æsir einmitt yfir sig nóg af hljóðunum í honum.
Nú er Þór kynntur til sögunnar.
3 Fjölnis þótti ferðin sterk,
furðu gjörn við hreystiverk;
alla list bar Þór af þeim,
þengil hvern er sóktu heim.
Þarna er Þór sagður bera af í list. Það er ekki dæmigerð Þórslýsing
en þó er ljóst af goðsögum að Þór er margt til lista lagt; í Alvíss-
málum beitir hann til dæmis klókindum. Vísan gefur í skyn að Þór
leggi stund á að sækja heim konunga og beri sífellt efri hlut. Þarna
undirbýr rímnaskáldið áætlun Þórs um að sækja heim Útgarða-Loka
og áfram eru vaktar væntingar sem ekki standast um sigurför
Ásanna.
Enn er Þór lýst og nú á kunnuglegan hátt.
4 Allir hræddust Yggjar nið,
orku neytti hann jafnan við,
*þöglir flýðu þussar land,
þegar hann tók sér Mjöllni í hand.
* þöglir] < þauglar. FJ
Töluvert verður stuðst við þetta erindi við túlkun á því sem eftir
kemur. Höfundur gefur hér upp skýrt lögmál um það hvernig við-
skipti Þórs og jötna eigi að vera: Þór neytir orku og tekur sér
Mjöllni í hönd, þá verða jötnarnir hræddir og þöglir og flýja. Þetta
lögmál stenst aldrei það sem eftir er sögunnar. Þegar Þór neytir
orku eða tekur sér Mjöllni í hönd verða jötnarnir aldrei hræddir og
hvað þá þöglir; þeir eru einmitt sífellt talandi. Aldrei flýja þeir held-
ur fyrir Þór.
Nú er Loki kynntur.