Skólavarðan - 01.12.2012, Blaðsíða 16

16
Skólavarðan 2. tbl. 2012
Texti: GG
hátíð
Það ríkti mikil gleði og hátíðarstemmning í Salnum í Kópavogi
laugardaginn 27. október sl. Prúðbúnir gestir þyrptust að og
eftirvænting ríkti. Á sviðinu voru tveir flyglar og á vegginn
gegnt tónleikagestum var varpað mynd af Halldóri Haraldssyni
píanókennara við hljóðfærið. Halldór fyllir flokk dáðustu
tónlistarkennara landsins og nemendur hans hvort sem er í
píanóleik eða úr píanókennaradeild hafa mjög margir helgað sig
tónlistinni og starfa við hana. Það voru fyrrverandi nemendur,
samstarfsfólk og vinir Halldórs sem buðu til tónlistarveislunnar
þetta laugardagssíðdegi, tilefnið var sjötíu og fimm ára afmæli
Halldórs fyrr á þessu ári. Þannig vildu þeir færa honum
þakkir fyrir ómetanlegt framlag á sviði lista-, mennta- og
menningarmála. Á þriðja tug hljóðfæraleikara steig á stokk
og lék á hljóðfærin sín honum til heiðurs auk þess sem hann
lék sjálfur nokkur verk. Stjórn Félags tónlistarskólakennara
notaði síðan tækifærið og gerði Halldór að heiðursfélaga FT á
þessum tímamótum. Sigrún Grendal formaður félagsins og Jón
Hrólfur Sigurjónsson varaformaður afhentu Halldóri skjal því til
staðfestingar.
Á efnisskránni voru fjölbreytt verkefni þótt klassísk píanóverk
hafi verið mest áberandi. Leikið var verk fyrir eina hönd,
tvíhent, fjórhent og mikla lukku vakti þegar átta píanóleikarar
léku saman mars fyrir sextán hendur á tvo flygla. Leikið var á
hörpu, sungið og Tríó Reykjavíkur kom fram Halldóri til heiðurs
en hann er einn af stofnendum þess og lék með því allt til
ársins 1996.
Fjölhæfur uppfræðari
Gefin var út vönduð efnisskrá fyrir tónleikana og þar segja
nokkrir nemendur Halldórs frá kynnum sínum af honum. Þeim
ber saman um að tímarnir hafi verið einstaklega gefandi, hann
hafi kennt þeim svo miklu fleira en að leika á píanó. Ef nemandi
mætti án þess að hafa æft sig vel var samt hægt að nýta tímann
vel. Halldór er mikill áhugamaður um lestur góðra bóka og sagði
hann nemendum sínum gjarnan frá því sem hann var að lesa
hverju sinni. Hann fræddi þá um tónskáld, stefnur og strauma
og gaf þeim hlutdeild í hugðarefnum sínum, t.d. brennandi
áhuga á austurlenskri speki.
Tilhlökkunarefni að fara í tíma til Halldórs
Arndís Björk Ásgeirsdóttir skrifar að námi sínu hjá Halldóri
hafi ekki lokið við útskrift. „Ég hringi ennþá í hann til að
spyrja hann um ýmislegt og aldrei kemur maður að tómum
kofanum því Halldór hefur viðhaldið forvitninni og er alltaf
að kynna sér eitthvað nýtt sem hann síðan miðlar áfram.“
Ingibjörg Þorsteinsdóttir skrifar: „Þó mikill tími og einbeiting
Tónlistarveisla í Salnum í tilefni 75 ára afmælis.
Halldór Haraldsson heiðursfélagi í FT
Jón Hrólfur Sigurjónsson, Sigrún Grendal, Halldór Haraldsson og Susan Haraldsson.