Gerðir kirkjuþings - 01.01.2014, Blaðsíða 151

151
Fjöldi atkvæðisbærra manna miðast við þá sem eru skráðir í þjóðkirkjuna í prestakallinu
samkvæmt þjóðskrá þann dag sem auglýsing um embættið birtist. Lista yfir atkvæðisbæra
skal Biskupsstofa afla þann dag sem auglýsing birtist. Atkvæðisbær eru þau sem eru fullra
16 ára þann dag sem auglýsingin birtist. Ef ágreiningur rís um hvort almenn kosning eigi
að fara fram eða um framkvæmd kosningarinnar að öðru leyti, úrskurðar yfirkjörstjórn
þjóðkirkjunnar, sbr. starfsreglur um kjör til kirkjuþings og þingsköp, um það. Að öðru
leyti gilda ákvæði um kjörstjórn í starfsreglum um kjör til kirkjuþings nr. 301/2013, eins
og við getur átt.
14. gr.
Jafnskjótt og biskup hefur fengið í hendur óskir frá lögboðnum fjölda atkvæðisbærra manna
í prestakallinu um almenna kosningu skal hann tilkynna kjörstjórn um framkomnar óskir.
Kjörstjórn við kirkjuþingskjör, sbr. starfsreglur um kjör til kirkjuþings og þingsköp, er
jafnframt kjörstjórn við almennar prestskosningar. Kjörstjórn er heimilt að fela prófasti eða
öðrum starfsmönnum þjóðkirkjunnar að annast undirbúning og framkvæmd kosningar
á ábyrgð kjörstjórnar. Biskupsstofa lætur kjörstjórn í té nauðsynlega aðstöðu og þjónustu
svo kjörstjórn geti rækt starfa sinn.
15. gr.
Kjörstjórn ákveður hvenær kosning skuli fara fram og skal hún auglýst með minnst fjögurra
vikna fyrirvara. Kjörstjórn annast prentun kjörseðla. Kjörseðlar skulu vera úr pappír sem
prent eða skrift sést ekki í gegnum. Á þá skal prenta nöfn umsækjenda í stafrófsröð.
Kjörstjórn auglýsir á heimasíðu þjóðkirkjunnar og með öðrum tíðkanlegum hætti,
hvernig, hvenær og hvar kosning skuli fara fram og hverjir séu í kjöri. Kjörstjórn er heimilt
að ákveða að hafa fleiri en eina kjördeild ef aðstæður í prestakalli þykja gefa tilefni til þess.
Kjörstjórn er heimilt að ákveða að kosning verði rafræn og fer þá um framkvæmd hennar
samkvæmt starfsreglum um kosningu kirkjuþings nr. 301/2013.
16. gr.
Kjörstjórn annast gerð kjörskrár í hverri sókn, á grundvelli gagna frá Þjóðskrá Íslands.
Á kjörskrá skal taka þá sem skráðir eru í íslensku þjóðkirkjunni, eiga lögheimili í
prestakallinu og hafa náð 16 ára aldri á þeim sem degi sem kosning fer fram.
Þegar kjörskrá hefur verið samin skal hún staðfest á fundi kjörstjórnar og undirrituð
af formanni kjörnefndar. . Kjörskrá skal liggja frami á aðgangsstýrðum vef eigi síðar en
þremur vikum fyrir kjördag, þar sem kjósandi getur flett upp hvort hann sé á kjörskrá. Við
aðgangsstýringuna er notuð almenn innskráningarþjónusta s.s. Íslykill Þjóðskrár Íslands.
17. gr.
Hver sá, sem kæra vill að einhvern vanti á kjörskrá eða sé þar ofaukið, þarf að hafa afhent
kjörstjórn kæru sína, ásamt rökum og gögnum máli sínu til stuðnings, eigi síðar en einni
viku fyrir kjördag. Sé kæran um það að einhver sé á skrá tekinn sem ekki hafi rétt til að
standa þar skal kjörstjórn senda þeim sem yfir er kært eftirrit af kærunni.