Bókasafnið - 01.06.2016, Qupperneq 35

Bókasafnið 40. árg – 2016 35
á starf sem fáir þekkja. Bloggið vekur lesandann til umhugsunar um
fjölbreytileika starfsins, ólíka notendahópa og hvernig má bregðast
við þörfum þeirra. Blogginu hefur verið haldið úti í tvö ár en nýjasta
færslan er jafnframt tilkynning um að því verði hætt. Í þessum
skrifuðum orðum er sem betur fer samt sem áður ekki búið að loka
því alveg og því ennþá hægt að lesa eldri færslur og vel þess virði að
þræða sig í gegnum þær aftur í tímann.
Nokkur þekkt nöfn
Librarian in Black er bloggsíða sem margir upplýsingafræðingar
kannast við enda hefur síðunni verið haldið úti frá árinu 2003 og
bloggarinn Sarah Houghton látið sig ýmis áhugaverð mál varða. Ho-
ughton er yfirmaður á almenningssafni í Kaliforníu en bloggið fjallar
ekki um daglegt starf hennar þar. Hún leggur áherslu á að blogga um
ýmislegt sem tengist starfinu og faginu almennt auk þess að fjalla
mikið um ýmsa tækni sem tengist því. Færslur hafa ekki verið mjög
reglulegar undanfarin ár ef miðað er við tíðni þeirra fyrir áratug síðan
en meðal þess sem hefur verið fjallað um undanfarið eru fagbækur
og ráðstefnur sem tengjast faginu, tæknimál og fleira. Vefslóðin er:
http://librarianinblack.net/librarianinblack/
Á síðunni Letters to a young librarian veitir upplýsingafræðingurinn
Jessica Olin, sem er yfirmaður á framhaldsskólasafni í Delaware
Bandaríkjunum, fjölbreytta innsýn í ýmis atriði sem tengjast starfi
upplýsingafræðinga. Markmið hennar með blogginu er að veita nýút-
skrifuðum í faginu og þeim sem leggja stund á nám í því upplýsingar
um ýmislegt sem er ekki tekið fyrir í skólanum en er gagnlegt að vita
samt sem áður. Í nýlegri færslu er til dæmis fjallað um val á fatnaði
og framkomu í atvinnuviðtölum og í annarri hvernig er hægt að
halda þjónustulundinni þegar maður er í engu skapi til að brosa og
vera vingjarnlegur. Olin er mjög virkur bloggari og bendir á margt
athyglisvert sem er vel þess virði að velta fyrir sér, bæði fyrir nýút-
skrifaða og reynslumeiri upplýsingafræðinga. Vefslóðin er http://
letterstoayounglibrarian.blogspot.com/
Annyoed librarian er dulnefni fyrir mjög pirraðan upplýsingafræðing
sem bloggaði í fyrstu sjálfstætt um allt sem fór í taugarnar á honum
(eða henni) í faginu en hefur frá árinu 2008 bloggað á síðu Library
Journal. Á blogginu eru ýmis mál sem tengjast faginu tekin fyrir og
farið á mjög gagnrýninn hátt yfir málefni líðandi stundar í heimi
upplýsingafræða. Vakin er athygli á ýmsu sem má betur fara og
varpað ljósi á hluti og atburði sem ritarinn á bakvið Annoyed Li-
brarian telur mikilvægt að sé rætt um á opinskáan
hátt. Bloggið er umdeilt, lesendum finnst það oft
ómálefnalegt, en umfjöllunarefnin eru áhugaverð
og er meðal annars fjallað um hlutverk bókasafna,
starfssvið upplýsingafræðinga, ritskoðun, Wikipedia
og margt fleira. Annoyed librarian fer ekki í graf-
götur með það að hann skrifar ekki til að þóknast
neinum en stíllinn er hnyttinn og gagnrýnin er oft
á tíðum mjög beitt. Færslur eru mjög reglulegar
og meðal annars vegna þess hafa einhverjir velt
því fram að fleiri en einn bloggari standi að baki
dulnefninu. Vefslóðin er: http://lj.libraryjournal.
com/blogs/annoyedlibrarian/
Að lokum
Því miður hafa margir þeir sem áður blogguðu um
störf sín á bókasöfnum og um upplýsingafræði hætt
því eða dregið verulega úr virkni sinni. Einhverjir
hafa fært sig á aðra miðla og margir þeirra sem hér
hefur verið fjallað um eru einnig virkir á Twitter
og öðrum miðlum. Bloggin hafa þó þann kost að
færslurnar eru oft á tíðum lengri og ítarlegri en
stuttar færslur á samfélagsmiðlum og hægt að fara
nánar í saumana á áhugaverðum málefnum. Eflaust
mætti fjalla hér um enn fleiri bloggsíður þar sem
fjallað er um bókasöfn og upplýsingafræði en þess í
stað er vakin athygli á því að bloggararnir setja oft
á síður sínar tengla á blogg samstarfsfólks og vina
í faginu eða á síður sem þeir sjálfir fylgjast með og
þannig er hægt að fræðast enn meira og finna fleiri
blogg sem vekja áhuga.