Morgunblaðið - Sunnudagur - 18.09.2016, Blaðsíða 13

pottar eru á staðnum sem gestir
Hótels Grímsborga hafa aðgang að.
Og Ólafur er hvergi nærri hætt-
ur; strax í haust hefjast fram-
kvæmdir við fleiri gistihús, sem
rúma munu á bilinu 130 til 140 her-
bergi, auk þess sem veitingaskálinn
verður stækkaður. Hann rúmar nú
þegar 170 manns í mat. Þá hefur
Ólafur vilja til að reisa 80 til 100
manna kapellu í Grímsborgum.
Fleiri hús gætu risið síðar en
Ólafur á alls 27 lóðir á svæðinu;
keypti þær síðustu af hreppnum
síðasta vetur. „Einhvern tíma verð-
ur maður þó að stoppa,“ segir hann
brosandi.
Búið að smellganga!
Sumarið, sem nú er að líða, hefur
verið framúrskarandi gott á Hótel
Grímsborgum. Fullbókað var með
nokkrum fyrirvara og þegar eru
um 50% gistirýmis frátekin sum-
arið 2017. Jól og áramót eru líka
vinsæll tími og nánast orðið uppselt
fyrir næstu jól. „Þetta er búið að
smellganga!“ segir Ólafur. „Það
hefur verið á bilinu 30 til 40%
aukning milli ára frá því við opn-
uðum. Sumarið er alltaf mjög gott
og ágæt nýting yfir veturinn líka.“
Fallegt er í Grímsborgum og fólk
sækir ekki síst í náttúruna og
kyrrðina. Þá er stutt í marga
helstu ferðamannastaðina á Suður-
landi, svo sem Þingvelli, Kerið,
Gullfoss og Geysi. Hótelið er í ríf-
lega klukkustundar akstursfjarlægð
frá Reykjavík og aðeins tekur um
fimmtán mínútur að aka frá Gríms-
borgum á Selfoss, þar sem flesta
þjónustu er að finna.
„Þeir erlendu gestir sem hingað
koma eru upp til hópa ótrúlega
hrifnir af náttúrunni og setja
hvorki rigningu né rok fyrir sig,“
segir Ólafur.
Opið er alla daga ársins og fjöldi
starfsfólks um þrjátíu, Íslendingar
og útlendingar. Heldur fleira þó á
sumrin.
Langstærstur hluti gesta er er-
lendir ferðamenn en Íslendingar
slást gjarnan í hópinn um helgar,
sér í lagi á veturna. Þá er hótelið
vinsælt meðal stórra fyrirtækja,
vegna funda og árshátíða, auk þess
sem fjölmörg stórafmæli og brúð-
kaup hafa verið haldin í Gríms-
borgum. Í hópi brúðhjóna eru fjöl-
margir útlendingar og elsta
afmælisbarnið var að fagna 95 ára
afmæli sínu. Þá má ekki gleyma
jólahlaðborðinu og framundan er
norðurljósavertíðin sem vindur sí-
fellt upp á sig.
Þarf að vera betra en
gesturinn átti von á
Ólafur segir reksturinn útheimta
mikla viðveru. „Hér er auðvitað í
mörg horn að líta og það hefur ver-
ið minn stíll gegnum árin að leggja
metnað í það sem ég tek mér fyrir
hendur. Það þýðir ekkert nema að
gera þetta af heilum hug og leggja
vel í það. Það sem boðið er upp á
hér þarf að vera betra en gesturinn
átti von á. Gangi það eftir þá farn-
ast manni vel – öðruvísi ekki!“
Svo „ætlast“ vitaskuld margir til
þess að húsbóndinn sé á svæðinu.
Margir þekkja Ólaf frá fyrri tíð og
mega til með að heilsa upp á hann
þegar þeir heimsækja Grímsborgir.
Ekki svo að skilja að Ólafur telji
það eftir sér. „Það er alltaf gaman
að hitta gamla vini og kunningja.“
Ólafur hefur auðvitað kynnst
þúsundum manna gegnum störf sín
og vingast við fjölmarga þeirra.
Ýmsa þjóðkunna menn ber á góma
meðan við sitjum saman og Ólafur
var ýmist með þeim í bekk, bjó í
sama húsi og þeir eða vann með
þeim með einum eða öðrum hætti.
Seldist í hvelli
Sagan bak við það hvers vegna
Ólafur og Kristín enduðu í Gríms-
borgum er býsna skondin. Þau áttu
lengi sumarbústað skammt þar frá
í Grímsnesinu og þegar Ólafur
rakst fyrir tilviljun á kunningja
sinn sem er fasteignasali fyrir rúm-
um áratug fór óvænt ferli í gang.
Ólafur var á leiðinni til útlanda ein-
um eða tveimur dögum síðar en
spurði í hálfkæringi hvort hann
gæti selt fyrir sig bústaðinn. Fast-
eignasalinn hélt það nú og vildi
endilega fá upplýsingar hið snar-
asta. Ólafur sagði það útilokað en
fasteignasalinn þráaðist við og fékk
á endanum vilja sínum framgengt.
Strax daginn eftir hringdi hann í
Ólaf, kominn með tilboð í bústaðinn
og salan gekk hratt fyrir sig.
Hjónunum líkaði alltaf vel í
Grímsnesinu og fóru fljótlega að
svipast um eftir lóð undir nýjan bú-
stað. Þegar nýtt sumarhús var risið
kunnu þau svo ljómandi vel við sig
að þau ákváðu að selja einbýlishús
sitt á Arnarnesinu og setjast alfarið
að í Grímsborgum.
Og fyrst þau voru komin austur
hvers vegna ekki að reisa eins og
eitt stykki hótel?
Stoppar stutt í bænum
Ekkert fararsnið er á þeim. „Ekki
aldeilis,“ segir Ólafur. „Það er
dásamlegt að vera hérna í kyrrð-
inni. Núorðið fer ég ekki í bæinn
nema af nauðsyn og er iðulega
snöggur!“
Beðinn að draga þetta Gríms-
borgaævintýri saman segir Ólaf-
ur: „Þetta hefur gengið ótrúlega
vel og verið svakalega gaman.
Fyrir okkur hjónin bæði. Auðvitað
höfum við ekki haft eins mikinn
frítíma og við stefndum að, höfum
til dæmis bara verið tíu daga í út-
löndum á þessu ári, en vonandi
kemur að því fyrr en síðar. Þetta
ævintýri hefur á hinn bóginn
kennt mér að maður verður að
hafa eitthvað fyrir stafni. Annars
koðnar maður fljótt niður.“
Stærsta íbúðin sem hægt er að leigja í Grímsborgum er 200 fermetrar að stærð.
Ólafur Laufdal í einni svítunni
í Hótel Grísmborgum. Alls
er gistirými fyrir um 200
gesti í einu.
25 heitir pottar eru á hótelinu. Í baksýn eru nokkur gistihúsanna.
18.9. 2016 MORGUNBLAÐIÐ SUNNUDAGUR 13
Ólafur Laufdal leggur mikið upp úr
lifandi tónlistarflutningi á Hótel
Grímsborgum og flest kvöld leika
landskunnir tónlistarmenn og
syngja fyrir matargesti. Má þar
nefna Gunnar Þórðarson, Helgu
Möller, Magnús Kjartansson, Eyjólf
Kristjánsson og Geir Ólafsson.
Í vetur verður svo boðið upp á
rokktónleika, þar sem fram koma
rokkstjörnur sjötta áratugarins.
Ólafur hefur sjálfur valið sex flytj-
endur en þeir eru: Garðar Guð-
mundsson, Þorvaldur Halldórsson,
Helena Eyjólfsdóttir, Þór Nielsen,
Bertha Biering og Rúnar Guð-
jónsson. Kynnir verður Ómar Ragn-
arsson og eflaust þarf ekki að snúa
upp á handlegginn á honum svo
hann taki líka lagið. Auk þess að til-
heyra þessari kynslóð skemmti-
krafta var Ómar mikilvirkur texta-
höfundur á þessum
sokkabandsárum rokksins.
Tónlistarstjóri og útsetjari er
Birgir Jóhann Birgisson og Kristinn
Svavarsson mun leggja hönd á sax.
„Ég er mjög spenntur fyrir þess-
ari dagskrá,“ segir Ólafur. „Allt
þetta fólk var í hópi okkar bestu og
vinsælustu söngvara á sinni tíð.
Stebbi Hilmars þess tíma eða eigum
við að segja Justin Bieber?“
Hann brosir.
Öll í fínu formi
Ólafur ólst upp við gamla rokkið og
segir það löngu orðið sígilt. Sjálfur
hafði hann frumkvæði að því að efna
til Rokkhátíðar á Broadway 1983
sem varð til þess að treysta böndin
milli gömlu rokkaranna sem halda
hópinn og hafa komið reglulega
fram síðan. Síðast í Salnum í Kópa-
vogi snemma á síðasta ári. Þá varð
húsfyllir í tvígang.
„Rokkhátíðin á Broadway sló
rækilega í gegn og gríðarlegur fjöldi
sótti sýningarnar. Eins á Hótel Ís-
landi síðar. Þetta verður auðvitað
ekki eins stórt í sniðum núna en hver
veit nema þeim takist að ná upp
sömu stemningu? Ég veit ekki annað
en þau séu öll í fínu formi,“ segir
Ólafur.
Fyrstu tónleikarnir verða föstu-
daginn 28. október næstkomandi og
Ólafur fullyrðir að kvöldin verði að
minnsta kosti sex fram eftir vetri.
Allir eru velkomnir, hvort sem
þeir vilja gista eða bara snæða
kvöldverð og hlusta á góða tónlist.
„Þessi dagskrá er hugsuð jafnt fyrir
erlenda gesti hótelsins og Íslendinga
sem vilja heimsækja okkur af þessu
tilefni, hvort sem þeir koma lengri
veg eða skemmri. Sjálfsagt höfðar
þetta meira til eldra fólksins en við
viljum endilega ná til þeirra sem
yngri eru líka,“ segir Ólafur og
Garðar Guðmundsson, forsprakki
hópsins, staðfestir að sungið verði á
ensku að mestu. Kannski helst að
Þorvaldur og Helena syngi eitthvað
saman á hinu ástkæra ylhýra.
Garðar er fullur tilhlökkunar. „Ég
er búinn að heyra í mörgum, að-
allega konum, og allir ætla að
mæta!“
– Má ég hafa það eftir þér?
„Nei, ertu vitlaus maður! Frúin
verður alveg brjáluð!“
Engu er víst logið upp á þessar
rokkstjörnur!
Sextugsafmæli rokksins
Upphaf rokksins á Íslandi er gjarn-
an miðað við árið 1957 sem þýðir að
sú fróma list á sextugsafmæli á
næsta ári. Ekkert hefur enn sem
komið er verið skipulagt af því til-
efni, að því er Garðar kemst næst,
en honum þykir blasa við að gera
eitthvað sniðugt. „Það kemur eig-
inlega ekkert annað til greina!“
Í því hringir síminn hjá Garðari og
hringitónninn sætir ekki tíðindum;
Summer Holiday með Cliff Richard.
„Það er goðið,“ segir Garðar og
biður mig að hafa sig afsakaðan.
Ég sný mér þá aftur að Ólafi sem
er enginn nýgræðingur þegar kem-
ur að því að setja tónlist á svið. Hann
hefur staðið að tugum sýninga gegn-
um tíðina, auk þess að flytja inn fjöl-
marga heimsþekkta tónlistarmenn,
svo sem Tom Jones, Tammy Wy-
nette og fleiri á sínum tíma. Í ljósi
þess að stórstirnið Justin Bieber er
nýflogið af landi brott blasir við að
spyrja Ólaf hvort hann sakni þeirra
athafna.
„Ekki get ég sagt það. Þetta var
bráðskemmtilegt en oft og tíðum var
ekki mikið upp úr þessu að hafa.
Fólk var ekki tilbúið að borga eins
mikið fyrir miðann þá og nú. Samt
var mun meira um komur heims-
frægra söngvara hingað til lands á
þessum tíma. Lengi á eftir var deyfð
yfir þessu en sem betur fer er aftur
að færast fjör í leikinn.“
Það má nú segja.
Garðar Guðmundsson og Ólafur Laufdal við slaghörpuna í veitingasalnum á
Hótel Grímsborgum þar sem rokkað verður af krafti og ástríðu í vetur.
Morgunblaðið/RAX
Rokkararnir fara á ról
Ómar
Ragnarsson
Helena
Eyjólfsdóttir
Bertha
Biering
Þorvaldur
Halldórsson