Gripla - 20.12.2015, Blaðsíða 177

177
[AM 667 V 4to 5ra begins] ezechiel sach vor godes trone veer deerte
staen. myt eren teken. dat ene derte hadde enes arnes houet myt hoghen
mode dat ander deerte hadde enes mynschen houed. dat drudde deerte
hadde enes louwen houet. Des veerden houet was ghelyk enem ossen. De
veer deerte beduden de veer euangelisten. sunte johannem lyket men ene-
me arne. Wente alze de arnt hogher vlucht wen iennich ander voghel. alzo
hefft sunte Johannes hogher ghescreuen wen iennich ander hillighe. dat
deerte mit deme mynschen houede bedudet sunthe Matheum wente he
hefft van der mynscheyt cristi gepreddyket vnde ghescreuen dat deerte dat
deme ossen ghelyk is. bedudet sune Lucam. de hefft ghescreuen van vnses
heren martere. vnde van syner arbeyt dat he heft gheleden. dat deerte myt
deme louwen houede. dat bedudet sunte Marcum. Wente alze de louwe
so stark is. dat em neen deerte wedderstaen enkan. alzo heft sunte marcus
ghepreddyket vnde gheschreuen van der vpstandinge cristi. deme nemant
mach wedderstan. De leue sunte Marcus was eyn van den .lxxij. iungheren
vnses leuen heren Jhesu cristi. vnde was kusck vnde reyne. vnde hadde god
van ganczeme herten leef. vnde denede em myt vlyte dach vnde nacht. myt
bedende. myt vastende. myt wakende. vnde myt anderen guden ouinghen
do openbarde syk eme vnse leue here jhesus christus. vnde sprak. marce.
ureede sy mit dy. du schalt van my scriuen wat du west. Alzo sprak he
tho sunte marcus na syner hemmeluaert. dar to hebbe yck dy vtherkoren.
vnde de hylligheghest helpet dy dat vullenbringen. dar mede vorswand de
here jhesus christus. do screeff he de euangelia de men noch lest. dar na
voer sunte marcus to Uenedien. dat he den cristene louen wolde van syk
leren. wente dar weren vele heyden in deme lande to Aquilogio. Do he in
dat land quam. do quam he by enem olden schomaker in syn hus. deme bad
he dat he em syne scho ok makede. vnde do he de scho in syne hant nam
vnde wolde se maken. do lemede he syk myt der natelen. do reep he sere.
vnde sprak. Ach got nu kan yk mynen kynderen nummer to nutte werden.
Do dat horede sunte Marcus do waert he ghans vro. vnde sprak. Wultu
den bekennen. so wert dy dyne hand drade ghesunt. vnde vorweruest
ock dat hemmelryke. Wente de den affgoden denen de werden vorloren.
men Jhesus christus ys de ware god. vnde ys des hemmels vnde der erden
weldich. De meister sprak Ach leue god dat doch eyn in dyt land queme
de vns dessen Jhesum bekant makede. deme wolde yck gherne volghen.
Wente wy hebben ghehort grote teken de he to Jherusalem heft ghedaen.
LOW GeRmAN LeGeNds OF tHe APOstLes . . .
GRIPLA XXVI. - 12.12.B.indd 177 12/13/15 8:24:49 PM