Skírnir - 01.09.2005, Qupperneq 82

braut með honum. Pilturinn lætur sig þá aftur dreyma í einsemd
sinni. Í dagdraumunum ber hann hana andaða á örmum sér, kyss-
ir hana í hinsta sinn á kaldar varirnar og dysjar hana síðan á klett-
óttri eyðiströnd.
Þetta er dæmigert byrjandaverk þótt nokkur höfundarein-
kenni Geirs birtist í því. Stíllinn er ómótaður enn þótt fágun og
ögun, sem síðar einkenndu sögur Geirs, bregði fyrir en tengingar
milli draumsins og veruleikans heppnast ekki fyllilega.
Ári síðar birti hann Vinnukonuna.11 Í sögunni er umkomulaus
vinnukona send í hús að sækja mjólk í fötu og út í búð að kaupa
kaffibæti (export). Hún er ný í vistinni og mætir alls staðar ósvíf-
inni forvitni og pískri í bland við niðurlægjandi vorkunnsemi. Pen-
ingar fyrir exportinu nægja ekki en sölustjórinn í búðinni lætur það
gott heita og spyr aðeins þegar hún er farin: „Er þetta stelpan?“
Sagan er skissa úr hversdagslífinu, stíllinn knappur og fágaður.
Frelsarinn birtist á prenti einu ári síðar.12 Sagan er sögð í þriðju
persónu. Mannvonska í vegavinnuflokki er viðfangsefnið og höf-
undur beitir hér nöpru háði sem birtist í nafni sögunnar. Flokkur-
inn býr við frumstæðar aðstæður í tjöldum og fábreyttan kost:
hrossaspað, ónýtan saltfisk og vatnsgraut. Geðvonska og sam-
bandsleysi einkennir samskipti mannanna. Einn daginn bætist
holdgrannur karl og kinnfiskasoginn í flokkinn. Hann verður
sannkallaður frelsari vinnufélaganna og „ljós á vegum manna og
lampi fóta þeirra“. Þeir taka allir gleði sína og sameinast um að gera
karlinn að skotspæni fólsku sinnar. Þeir leggja hann í einelti og gera
honum hverja skráveifuna annarri verri. Karlinn húkir einn í tjaldi
sínu þegar vinnufélagarnir hafa enn eina ferðina leikið hann grátt.
Enginn endir verður á einsemd hans og varnarleysi í sögulok:
Það var farið að setja að þeim, því að þeir höfðu svitnað í bardaganum. –
Enn einu sinni litu þeir á karlinn, sem hélt áfram að snökta undir sæng-
inni.
Mikið andskoti gat hann verið ljótur.
bragi halldórsson312 skírnir
11 Sagan birtist í 2. hefti tímaritsins Dvalar 1944.
12 Nýja stúdentablaðið, apríl–maí 1945. Þar birtist einnig órímað ljóð eftir Geir,
Á ferðalagi í vagni.
Skírnir haust 05 RÉTTUR 23.11.2005 13:53 Page 312