Skírnir - 01.09.2005, Page 138
ræna goðafræði og íslenska sögu. Árið 1826 var skólinn, þar sem
Petersen kenndi, lagður niður. Sama ár kom rit hans Dansk Ord-
dannelseslære út.
Petersen fluttist nú til Hafnar á ný og hóf að starfa að ritun á
sögu íslenska þjóðveldisins og Danmerkur. Hann hlaut starf við
bókasafn Hafnarháskóla 1829, þar sem Nyerup var yfirbókavörð-
ur, og ári síðar var hann ráðinn „Registrator“ hjá Finni Magnús-
syni við að skrá og raða niður skjölum Leyndarskjalasafnsins.
Fyrir áeggjan Nyerups skrifaði hann samkeppnisritgerð, tveggja
binda verk, sem kom út 1829–30, Det danske, norske og svenske
Sprogs Historie under deres Udvikling af Stamsproget, sem spann-
aði sögu norrænnar tungu frá elstu tímum og fram til 1700. Í
Leyndarskjalasafninu undi Petersen hag sínum vel og á þeim árum
sem hann vann þar komu flest hans merkustu verk út. Í Höfn end-
urnýjuðu Petersen og Rask forna vináttu og þegar Rask hóf að
beita sér fyrir breytingum á danskri stafsetningu fylgdi Petersen
honum að málum.
Af ritum sem komu út meðan Petersen starfaði við Leyndar-
skjalasafnið skulu hér nefnd Danmarks Historie i Hedenhold,
þriggja binda verk sem kom út á árunum 1834–37. Þá þýddi hann
IV.–X. bindi af Fornmanna sögum á dönsku 1831–36. Frægari
miklu eru þýðingar hans á Íslendinga sögum – Historiske Fortæll-
inger om Islændernes Færd ude og hjemme – sem komu út í fjór-
um bindum á árunum 1839–44 og hafa margsinnis verið gefnar út
síðan.
Hugmyndin um að stofna prófessorsembætti við Hafnarhá-
skóla í norrænum fræðum átti sér nokkra sögu. Í reglugerð frá ár-
inu 1836 var talað um að koma á fót kennarastóli í norrænu máli
og mállýskum, engilsaxneska og fornháþýska voru einnig nefndar
í því samhengi. Síðan leið áratugur uns staðan var auglýst. Hún
var ætluð N.M. Petersen, en honum var um og ó að skiljast við
Leyndarskjalasafnið. Aðrir sem sóttu um voru Konráð Gíslason,
Jón Sigurðsson og P.G. Thorsen, bókavörður og rúnafræðingur.
Þar sem staðan var ætluð N.M. Petersen var hann þvingaður til að
taka við henni og jafnvel hótað að ekkert yrði af stofnun embætt-
isins ef hann skoraðist undan að veita því viðtöku.
aðalgeir kristjánsson368 skírnir
Skírnir haust 05 RÉTTUR 23.11.2005 13:53 Page 368