Breiðfirðingur - 01.04.2002, Blaðsíða 44

42
BREIÐFIRÐINGUR
meðan hann lifði að við deildum sama heimili og í öllu var
hann okkur og bömum okkar stoð og stytta. Fyrir það ber okk-
ur að þakka. Þegar Geir kom frá kennslu á vorin var hann van-
ur að hvíla sig aðeins í nokkra daga. Síðan var hann lagður af
stað að finna sér sumarvinnu. Hann fékk alltaf nóg að gera og
vann m.a. í Búnaðarbankanum, á Skattstofunni og hjá Fast-
eignamatinu. Einnig tók hann að sér innheimtu og bókasölu
stundaði hann í mörg ár meðan heilsan leyfði. Hann átti mörg
áhugamál sem hann sinnti. Hann hafði mikinn áhuga á þjóð-
málum og fylgdist vel með á þeim vettvangi. í mörg ár hafði
hann það fyrir venju að halda upp á afmælið sitt með því að
fara niður á Alþingi og fylgjast með þingsetningunni, sem oft-
ast bar upp á afmælisdag hans. Hann gekk ungur til liðs við
Framsóknarflokkinn og fylgdi þeim flokki alla ævi. Hann
hreyfst mjög af Jónasi Jónssyni frá Hriflu, enda hafði hann
sem ungur maður tekið að sér að fylgja Jónasi á hestum er
hann var á fundaferðum á Vesturlandi. Þeir héldu kunnings-
skap alla tíð.
Geir skrifaði alltaf mikið, hann hélt t.d. dagbók í áraraðir og
skrifaði greinar í blöð og tímarit. Hann var snjall ræðumaður
og flutti mál sitt vel og skipulega. Ari áður en hann dó gaf
hann út bók sem hann kallaði: „Minningar frá morgni aldar“.
Þar lýsir hann vel lífinu í sveit á íslandi á fyrstu áratugum síð-
ustu aldar. Geir var ágætlega hagmæltur og kastaði oft fram
ferskeytlum. Hann hafði gaman af að koma með fyrripart og
biðja viðstadda að botna. Vorið var hans uppáhaldsárstíð. Ein
af hans síðustu vísum er um vorið:
Ennþá finn ég eitthvað nýtt
ört þó gráni hárin,
þegar vorið bjart og blítt
brosir gegnum tárin.
Geir hafði ótrúlegt stál minni, það var nánast eins og að fletta
upp í Aldabókunum að spyrja hann um liðna atburði, hann gat
sagt til um upp á dag hvenær þetta eða hitt hafði gerst. Þegar