Dagblaðið Vísir - DV - 30.11.2018, Síða 39

Bækur og menning 30. nóvember 2018 KYNNINGARBLAÐ
SPENNANDI BÆKUR FRÁ ÓÐINSAUGA:
Fjórir höfundar segja frá bókum sínum
Föruneyti Signýjar er skáldsaga
eftir Jón Axel Egilsson, byggð á
íslenskum ævintýrum og þjóðsögum.
Hér eru Sálin hans Jóns míns
og Hlini Kóngssonur endurvakin.
„Sögupersónan er Signý, ung
stúlka, sem telur sig eiga sök á því
að tröllskessa hafi rænt Hlina, syni
Hrings, höfðingjans í Brekavík. Á
sama tíma koma tveir ferðalangar
fljúgandi úr framtíðinni í tröllarúmi,
en missa alla stjórn á því er
tröllskessan stekkur upp í rúmið og
flýgur á brott með Hlina. En aftan á
rúmgaflinum leynist laumufarþegi
sem á eftir að breyta sögunni,“ segir
höfundurinn. Föruneyti Signýjar
er fyrsta skáldsaga Jóns Axels
Egilssonar. Skáldsaga byggð á
íslensku ævintýri og þjóðsögu hefur
ekki verið skrifuð á Íslandi síðan
Eiríkur Laxdal skrifaði Ólandssögu
1777, sem var ekki gefin út fyrr en
200 árum seinna, 1986.
Mömmugull: Hjartnæm frásögn um það mikilvægasta í lífinu
okkar – börnin
Föruneyti Signýjar: Persónur úr íslenskum þjóðsögum
„Mér þykir svo vænt um bókina
Mömmugull og boðskapinn sem
henni fylgir. Hún kennir börnum
að þau þurfi ekki að eiga mest og
stærst af öllu til þess að vera rík.
Raunverulegur fjársjóður lífsins
hefur alltaf verið beint fyrir framan
nefið á þeim. Í þessum kappsama
heimi finnst mér mikilvægt að festa
þessa vitneskju sem fyrst í sessi.
Lesturinn er léttur, skemmtilegur
og dásamlegur. Það fullkomnar
sögustundina svo að syngja saman
lagið Gull og perlur í endann. Það
lag læra þau flest í leikskólanum
og fjallar það um verðmæti
vináttunnar,“ segir Katrín Ósk
Jóhannsdóttir, höfundur bókarinnar
Mömmugull. Katrín Ósk hefur áður
skrifað bækurnar um Karólínu
kónguló en þær eru orðnar þrjár
talsins.
Lavander á ferð – Fantagóð fantasía, uppfull af kímni
Sögurnar um Lavander Petrillot
eru gamansögur og því hálfgerðir
hvítir hrafnar í íslenskum
nútímabókmenntum, að mati
höfundarins Jóns Páls Björnssonar.
„Þunglyndislegur drungi er víðsfjarri
herra Petrillot, að fylgja honum eftir á
að vera spennandi, óvænt og umfram
allt skemmtilegt,“ segir Jón Páll.
Aðalsögupersónan er óprúttinn og
svikull karl á miðjum aldri sem vílar
ekki fyrir sér að ljúga, svindla og
stela til þess að komast í gróðann.
„En þrátt fyrir það er hann nokkurs
konar ævintýrahetja þótt hann hafi
tæpast geislandi útlit, hugprýði,
hreinleika eða íþróttamannslegt
atgervi. Geislandi útlit, hugprýði,
hreinleiki og íþróttamannslegur vöxtur
eru líka hrikalega ofmetin og nánast
gagnslaus ef maður vill græða alvöru
peninga,“ bætir höfundurinn við.
Þetta er önnur bókin um Lavander.
Fyrri bókin heitir Lavander á leik.
Tröllasaga – þegar Lóa mannsbarn hittir Rípu tröllastelpu
„Bókin um Rípu er fullgerð saga
um vináttu tröllastelpunnar Rípu
og mannsbarnsins Lóu og ýmsar
uppákomur sem verða þegar Rípa
fær að kynnast mannheimum.
Textinn hentar öllum læsum börnum
allt til 12 ára aldurs og þess vegna
eldri svo lengi sem þau hafa gaman
af ævintýrum. Ég segi gjarnan að
ef þau geta lesið Harry Potter þá
geta þau lesið Rípu. Síðan breikka
myndir Freydísar Kristjánsdóttur
lesendahópinn, þar sem yngri börn,
allt niður í 3–4 ára njóta þess að
skoða þessar stórkostlegu myndir
og heyra söguna um leið. Það er von
mín að sagan veki áhuga lesandans,
skemmti honum og efli kannski
málskilning um leið,“ segir Sigríður
Ólafsdóttir, höfundur Rípu. Sigríður
hefur áður sent frá sér ljóðabókina
Bikarinn tæmdur.