Húnavaka - 01.01.2018, Blaðsíða 145

H Ú N A V A K A 143
heimleiðis með skipi upp í Borgarnes
og kannski hefur hann fengið bílferð
eitthvað upp í sveitirnar en yfir Holta-
vörðuheiði varð hann að ganga og
síðan alla leið norður að Bjarna stöð-
um.
Skömmu eftir heimkomuna þetta
vor, nánar tiltekið 13. apríl, bárust
honum símboð frá ökukennara sínum,
Páli Bjarnasyni á Blönduósi, sem hafði
lofað akstri með fólk fram að Sveins-
stöðum þennan dag. Þegar til kom átti
Páll ekki heimangengt þar sem kona
hans hafði tekið léttasóttina um morg-
uninn. Bað hann pabba að koma sér
til hjálpar og lagði hann þegar af stað
frá Bjarnastöðum, fór hratt yfir og
hljóp við fót þessa u.þ.b. 20 km út á
Blönduós. Þaðan ók hann fólkinu í bíl Páls fram að Sveinsstöðum, skilaði
bílnum síðan um kvöldið og gekk heim að Bjarnastöðum um nóttina.
Pabbi miðaði síðan sinn farsæla feril sem bifreiðastjóri við þennan dag. Ég
man að 13. apríl bakaði mamma oft pönnukökur til að halda upp á daginn og
13. apríl 1987 fékk pabbi kort í tilefni dagsins frá drengnum, Bjarna Pálssyni,
sem fæddist þennan dag, 60 árum fyrr. Pabbi lá þá alvarlega veikur á
sjúkrahúsinu hérna og átti tæpan mánuð ólifaðan.
Mamma fór ung að vinna fyrir sér
Ég veit ekki hvar eða hvernig pabbi og mamma kynntust. Mér þykir þó
sennilegt að þau hafi kynnst þegar mamma var í vinnumennsku á Þingeyrum
á árunum sem pabbi fékk bíladelluna. Það er ekki svo langt á milli bæjanna,
Bjarnastaða og Þingeyra og unga fólkið í þá daga hefur áreiðanlega ekki verið
svo ólíkt því sem gerist í dag og haft gaman af að hittast.
Mamma var fædd á Blöndubakka 27. október árið 1900. Foreldrar hennar
voru Margrét Björnsdóttir og Einar Jónsson sem bjuggu fyrst á Blöndubakka
og svo á Óseyri á Skagaströnd. Mamma fór ung að vinna fyrir sér, eins og fyrr
segir á Þingeyrum, en áður hafði hún verið vinnukona í Reykjavík og síma-
stúlka á Seyðisfirði.
Þau gengu í hjónaband 23. desember árið 1928 og eignuðust fimm börn.
Fyrsta barnið sitt, stúlku sem hét Ragna Margrét og fæddist 3. febrúar 1929,
misstu þau 2. desember sama ár. Dússi bróðir fæddist 24. febrúar 1931 og
Sigga 15. febrúar 1934, ásamt andvana fæddum tvíburadreng. Ég kom svo
síðust, 9. nóvember 1941.
Guðrún og Zophonías.