Bændablaðið - 01.12.2016, Qupperneq 56

56 Bændablaðið | Fimmtudagur 1. desember 2016
Guðrún Eik og Óskar tóku við
búinu 1. janúar 2014 af foreldrum
Guðrúnar, Ólöfu og Skúla, en
hún er 6. ættliðurinn sem býr á
Tannstaðabakka. Þar hefur sama
ættin búið frá því milli 1820–1830.
Foreldrar Guðrúnar búa enn í sínu
húsi og reka 2 kjúklingaeldishús,
en Guðrún og Óskar byggðu nýtt
íbúðarhús á jörðinni. Það má segja
að þau hafi ekki setið auðum
höndum en á þessum tæpu þremur
árum stækkuðu þau stíupláss í
nautaeldishúsi um þriðjung, rifu út
úr 2/3 af fjárhúsunum og innréttuðu
fyrir nautgripauppeldi. Að svo búnu
byggðu þau íbúðarhús og eignuðust
tvíbura.
Býli: Tannstaðabakki.
Staðsett í sveit: Hrútafirði, Húnaþingi
vestra.
Ábúendur: Guðrún Eik Skúladóttir
og Óskar Már Jónsson.
Fjölskyldustærð (og gæludýra):
Tvíburadæturnar Bjarnveig Anna
og Þórey Sunna, 1 árs, hvolpurinn
Táta og kettirnir Kólumbus og Arinn
Eldur. Foreldrar Guðrúnar, Ólöf og
Skúli, búa einnig á jörðinni.
Stærð jarðar? 300 ha.
Gerð bús? Aðallega kúabúskapur,
nokkrar kindur og hænur.
Fjöldi búfjár og tegundir? Erum
með 38 árskýr, nautaeldi – alls um
150 nautgripir. Þá erum við með 72
kindur, sjö hænur, hundu og tvo ketti.
Hvernig gengur hefðbundinn
vinnudagur fyrir sig á bænum?
Byrjað og endað á mjöltum og ýmis
verk þar á milli, eða það sem fellur
til á hverjum árstíma.

Skemmtilegustu/leiðinlegustu
bústörfin? Guðrúnu finnst
skemmtilegast að mjólka og
stússast í kringum kindurnar
og ungviðið hverju sinni, en
leiðinlegast í bókhaldinu. Óskari
finnst skemmtilegast í öllu sem
tengist jarðrækt, en leiðinlegast í
öllu sem viðkemur kindum.
Hvernig sjáið þið búskapinn fyrir
ykkur á jörðinni eftir fimm ár?
Við stefnum á að vera búin að
byggja nýtt fjós og fjölga kúnum
upp í 60. Nóg af gripum í uppeldi
og nóg að gera.
Hvaða skoðun hafið þið á
félagsmálum bænda? Félagsmál
bænda eru gríðarlega mikilvæg
fyrir bændastéttina. Þar er oft unnið
óeigingjarnt og á tíðum vanþakklátt
starf í okkar þágu. Því er regluleg
endurnýjun í öllum félögum af hinu
góða og í raun nauðsynleg.
Hvernig mun íslenskum
landbúnaði vegna í framtíðinni?
Við erum bjartsýn og höfum
óbilandi trú á íslenskum landbúnaði,
svo við trúum ekki öðru en að
íslenskum landbúnaði muni vegna
vel í framtíðinni.
Hvar teljið þið að helstu tækifærin
séu í útflutningi íslenskra búvara?
Helstu tækifærin eru í íslenska
lambakjötinu og íslenska skyrinu.
Hvað er alltaf til í ísskápnum?
Mjólk, ostur og smjör.
Hver er vinsælasti maturinn á
heimilinu? Lambalæri og nautalund.
Eftirminnilegasta atvikið við
bústörfin? Fyrsta vorið okkar fór
lóðning í tölvunni í mjaltabásnum.
Þetta uppgötvaðist þegar kvöldmjaltir
voru að fara af stað og kl. 21 um
kvöldið brunuðum við hjónin af
stað á Selfoss, en þar var staðsettur
eini varahluturinn sem til var í
landinu. Við vorum komin til baka
um 4-leytið um nóttina, og kýrnar
orðnar ansi reiðar yfir því hve
kvöldmjöltunum hafði seinkað. Við
ræstum út rafvirkjann og kl. 7 um
morguninn kláruðum við mjaltirnar,
á sama tíma og við værum að byrja
morgunmjaltirnar venjulega.
Líf og lyst
BÆRINN OKKAR
Makrónur, piparkökur og jólalifrarkæfa
Aðventan gengur nú í garð. Þá er
upplagt að leggja metnað í matar-
gerðina og ekki síst að spreyta sig
í gerð sígildra smákakna.
Fátt er betra en að dekra við sig
á myrkum síðkvöldunum og maula
franskar makrónur eða piparkökur
með heitu súkkulaði eða kaldri
mjólk, við notalegan bjarmann frá
kertaljósinu.
Makrónur (French Macaron)
Marga dreymir um að tileinka sér
fullkomna tækni við að baka litrík-
ar franskar jólamakrónur, sem eru
ljúffengar og auðveldar ef þær eru
rétt gerðar. Ef þú vilt læra og þorir,
þá er þetta frábær og einföld leið.
Svo þarf bara að fylla með uppá-
halds fyllingunni þinni og njóta á
aðventunni.
› 3 eggjahvítur
› 35 g (1/4 bolli) hvítur sykur
› 220 g (1 og 2⁄3 bollar) flórsykur
› 1 bolli fínt malaðar möndlur
Aðferð
Þeytið eggjahvítur í hrærivél, þar til
eggjahvítan er froðukennd. Setjið
sykurinn saman við og haldið áfram
að þeyta þar til eggjahvíturnar eru
orðnar gljáandi og loftkenndar, Ef
þær hreyfast ekki þegar skálinni
er hvolft eru þær tilbúnar. Sigtið
flórsykur saman við og malaðar
möndlur (gott að vinna saman í
matvinnsluvél). Blandið saman við
eggjahvíturnar.
Setjið í sprautupoka og sprautið í litla
toppa um 2,5 sentímetra í þvermál,
á bökunarplötu með smjörpappír.
Láttu standa við stofuhita þar til þær
mynda harða húð á toppinn, um eina
klukkustund.
Hitið ofninn í 140° C gráður.
Bakið kökurnar þar til þær eru orðnar
harðar, en ekki brúnaðar. Ætti að taka
um 10 mínútur. Látið smákökurnar
kólna alveg áður en fylling er sett
í, til dæmis sulta, smjördeig eða
súkkulaðikremið hér að neðan.
Gaman er að setja rauðan duft-matarlit
í möndlurnar og sykurblönduna til að
fá skemmtilegan jólalit á kökurnar.
Piparkökur
Deigið verður að kæla í að minnsta
kosti þrjár klukkustundir og í allt
að tvo daga. Smákökur er hægt að
geyma í loftþéttum umbúðum fram
að jólum.
› 400 g (3 bollar) hveiti
› 1 tsk. matarsódi
› 3/4 tsk. malaður kanill
› 3/4 tsk. malaður engifer
› 1/2 tsk. malað Allrahanda
› 1/2 tsk. malaður negull
› 1/2 tsk. salt
› 1/4 tsk. duft svartur pipar
› 8 matskeiðar (120 g) ósaltað smjör,
við stofuhita
› 85 g (1/4 bolli) kóksfeiti, við stofuhita
› 55 g (1/2 bolli) ljós púðursykur
› 2/3 bolli melassi, dökkur púðursykur
eða muscovadosykur
› 1 stk. stórt egg
Aðferð
Hitið ofninn í 165 gráður.
Sigtið hveiti, matarsóda, kanil, engi-
fer, allrahanda, negul, salt og pipar í
gegnum sigti í skál. Setjið til hliðar.
Þeytið, smjör og kókosfitu í stórri
skál eða í hrærivél þar til þetta hefur
vel blandast saman, eða í um það bil
1 mínútu. Bætið púðursykri við þar
til blandan er létt í áferð og lit, í um
tvær mínútur. Bætið melassa (eða
dökka púðursykrinum) við og eggi.
Hrærið rólega saman með tréskeið,
og smám saman er hveitinu bland-
að saman við. Skiptið deiginu í tvo
hluta og setjið í plastfilmu. Kælið í
um þrjár klukkustundir. Hægt er að
gera deigið allt að tveimur dögum
áður en bakað er.
Næst eru piparkökurnar rúllaðar út.
Vinnið með einn hluta í einu, en
geymið hinn í kæli. Takið deigið úr
kæli og látið standa við stofuhita þar
til það er nógu heitt til að hægt sé að
rúlla því út án þess að það molni. Það
ætti að taka um tíu mínútur.
Stráið hveiti á það og rúllið því út
þar til það er um 0,5 sentímetrar á
þykkt. Skerið út kökur og flytjið á
smjörpappír.
Bakið í um 10 til 12 mínútur. Kælið
og njótið með fyllingu eða beint úr
kökuboxinu með kaldri mjólk.
Jólalifrarkæfa
› 500 g af svínalifur
› 200 g andalifur (eða kjúklingalifur)
› 300 g af andakjöti (til dæmis af
andalærum eða kjúklingakjöt af læri)
› 400 g svínafita (spekk) (Ef ekki fæst er
hægt að nota beikon en þá þarf að
minnka salt í uppskriftinni)
› 2 epli
› 10 stk. sveskjur án steina
› 1 laukur
› 3 tsk. malað Allrahanda krydd
› 2 tsk. malaður negull
› 2 msk. Por vín eða jólasnafs
› 4 egg
› 2 bollar mjólk
› 5 msk. hveiti
› salt og ferskur malaður pipar
Vinnið saman í matvinnsluvél
lifur, kjöt, fitu, epli í bitum, sveskj-
ur og lauk og setjið í skál. Hrærið
krydd og lifur ásamt eggjum og
mjólk í mjúkan massa. Setja hveiti
saman við og hrærið vel í. Kryddið
svo með salti og pipar. Setjið
blönduna í litla dalla úr áli eða
glerkrukkur sem þola hita. Bakið
í vatnsbaði (setjið vatn í ofnskúffu
svo dallana ofan á, lokað með
álpappír) við 175 gráður í 35–40
mínútur, þar til kæfan er gullin að
ofan.
MATARKRÓKURINN – BJARNI GUNNAR KRISTINSSON MATREIÐSLUMEISTARI
Tannstaðabakki