Bændablaðið - 07.06.2018, Qupperneq 7

7Bændablaðið | Fimmtudagur 7. júní 2018
LÍF&STARF
Myndir / HKr.
Skólaheimsókn í Miðdal
Í Miðdal í Kjós taka ábúendurnir
Guðmundur Davíðsson og Svanborg
Anna Magnúsdóttir á móti fjölda barna
úr leikskólum og grunnskólum af
höfuðborgarsvæðinu á hverju vori. Í fyrri
viku voru þar krakkar úr Mýrarhúsaskóla
á Seltjarnarnesi sem skemmtu sér greinilega
vel.
Tilgangurinn með slíkum heimsóknum
er að kynna krökkunum lífið í sveitinni og
leyfa þeim að komast í nána snertingu við
dýrin. Hafa nokkrir bændur boðið upp á
slíkt í fjölmörg ár og hefur það vakið mikla
lukku. Krökkunum úr Mýrarhúsaskóla þótti
greinilega mikið til koma, en fyrst tók á móti
þeim tíkin á bænum sem virtist óþreytandi að
gantast við krakkana.
Þegar inn í gripahúsin kom var það
kiðlingur, geitur og kindur með nýborin lömb
sem fönguðu athyglina og afar sætir kettlingar.
Þar innaf var fjósið og vöktu kýrnar, kálfar
og ekki síður einn hestur sem þar var í stíu
mikla athygli. Kepptust börnin við að reyta
hey í kýrnar sem virtust hæstánægðar með
heimsókn barnanna.
Ekki spillti fyrir að þetta var einn af
sárafáum sólardögum sem komið hafa á
suðvesturhorni landsins í maí. /HKr.
Mikil blessun fylgir því jafnan þegar kosningar eru afstaðnar. Þó verða stundum eftirmál illvíg
og gremja í geði. Um mann sem ólmur
vildi komast í hreppsnefnd orti Halldór
H. Snæhólm:
Enginn þokki eða trú
að þér lokkar hylli.
Þriggja flokka þú ert hjú,
þeirra brokkar milli.
Á uppgangstíma ungra nasista í Reykjavík
urðu róstur all tíð. Jakob Thorarensen orti:
Dýran bið ég Drottinn þess
-dugi enn hans kraftur:
Göring, Hitler, Göbbels, Hess,
geri að skítnum aftur.
Á árinu 1937 geisaði kosningahríð milli
Hannesar á Hvammstanga og Skúla
Guðmundssonar. Um þau róstur kvað
Sveinn Hannesson frá Elivogum:
Alltaf flykkjast fleiri menn
Framsóknar á prikið.
En hundrað vantar Hannes enn.
Helvíti er það mikið.
Sveinn orti einnig þegar Bjarni
Frímannsson á Efri-Mýrum féll í
kosningum fyrir Árna á Geitaskarði:
Völdum háum heldur enn
hélugrái karlinn.
Skelli fá oft montnir menn,
Mýrarpáfi er fallinn.
María Maack lenti í hörðum deilum við
Ágúst á Hofi á landsfundi flokks þeirra. Jón
á Akri orti af því tilefni:
María í meydómi,
mjúk er í sínu lofi,
en hún hefur ofnæmi
fyrir Ágústi á Hofi.
Maður nokkur gerðist flaumósa mjög á
framboðsfundi. Fáir hlýddu orðræðu hans
utan einn sem opinmynntur mændi upp á
frambjóðandann. Freysteinn Gunnarsson
orti:
Situr einn og segir frá,
sveitast við að ljúga.
Annar hlustar hrifinn á,
hamast við að trúa.
Um pólitíkina almennt orti Bjarni frá Gröf:
Póitíkin alveg óð
er á milli vina.
Það er eins og önnur þjóð
eigi stríð við hina.
Löngu fyrir tíma kjararáðs fjölluðu
alþingismenn sjálfir um kaup sitt og kjör.
Brá svo við einhverju sinni, að full samstaða
náðist í þingsal um launahækkun. Þá kvað
Jón Benediktsson frá Breiðabóli:
Þingmannanna þroski vex,
það er svei mér gaman.
Um eigin laun varð ekkert pex,
allir stóðu saman.
Karl Jónsson kvað þessa vísu á pólitískum
átakafundi þar sem tókust á Árni
Jóhannsson, sýsluskrifari á Seyðisfirði,
og Skafti, ritstjóri Austra:
Veslaðist upp í vorkuldum
Valtýskan á Fossvöllum,
eftir því sem af‘henni dró
Árni grét en Skafti hló.
Lokavísan verður varla talin pólitísk. Vísan
er eftir ónefndan bankamann, (hér þarf
að gæta bankaleyndar) en viðskiptavinur
bankans hafði fengið ótrúlegan bunka
ýmissa blaða til undirritunar í tengslum við
sitt peningavafstur. Viðskiptamaðurinn hafði
orð á þessu við bankamanninn hvurju gegndi
slíkur bunki blaða. Bankamaðurinn orti þá
þessa frábæru vísu og sendi Bændablaðinu:
Alls kyns gögnum á mann hlaðið,
allt um bankann nú ég veit.
Hann er þykkri en Bændablaðið
bunkinn sem að tölvan skeit.
Umsjón:
Árni Geirhjörtur Jónsson
kotabyggð1@gmail.com
MÆLT AF
MUNNI FRAM