Bændablaðið - 30.07.2020, Blaðsíða 4

Bændablaðið | Fimmtudagur 30. júlí 20204
FRÉTTIR
Kúa- og svínabændur í Norðurgarði hefja framleiðslu á útiræktuðu grænmeti:
Lífleg brokkolí- og
blómkálsrækt á Skeiðunum
Bændurnir á Norðurgarði á Skeið­
um ákváðu að hefja tilrauna­
ræktun með blómkál og brokkolí á
vormánuðum og um þessar mundir
byrja þau að uppskera brokkolí en
blómkálið á aðeins lengra í land.
Ef vel gengur hyggjast þau færa
enn frekar út kvíarnar og prófa
fleiri tegundir, eins og kínakál og
hvítkál, á næsta ári.
Hjónin Ásmundur Lárusson og
Matthildur Elsa Vilhjálmsdóttir reka
sextíu kúa mjólkurbú á Norðurgarði
ásamt því að vera með uppeldisgrísi
fyrir Laxárdal. Nú bætist einnig
útiræktunin við sem er á um 15
hektara svæði.
„Þar sem sonur okkar og jafnvel
báðir synirnir eru að koma inn í
reksturinn hugsuðum við leiðir til að
hafa meiri fjölbreytileika og ákváðum
að prófa þessa ræktun. Síðan finnst
mér þetta í raun mjög skemmtilegt
svo það verður spennandi að sjá
hvernig þetta þróast. Við sáðum
þessu út í bakka í gróðurhúsi til að
byrja með hérna heima um miðjan
aprílmánuð áður en þessu var plantað
út,“ útskýrir Ásmundur.
Horfa til meiri fjölbreytni
Ef vel gengur setja hjónin stefnuna
á að koma sér upp gróðurhúsi næsta
vor fyrir enn frekari ræktun. Nú
styttist í að þau geti farið að uppskera
brokkolí en blómkálið á örlítið lengra
í land.
„Þetta eru vörur sem vantar
virkilega á markaðinn, það er úr
íslenskri ræktun sem er fullmögulegt.
En þetta er töluvert bras og mikil
vinna í kringum þetta. Við erum að
uppskera í kringum 3–400 gramma
hausa og hefur varan um fimm
vikna geymsluþol. Við ákváðum að
fara í samstarf við Sölufélagið sem
kemur hingað og sækir og sér um að
pakka vörunni fyrir verslanir,“ segir
Ásmundur og bætir við:
„Það var kalt í vor en það virðist
ekki koma að sök, þessi ræktun
hentar vel fyrir íslenskar aðstæður.
Nú erum við strax farin að hugsa um
fleiri möguleika, það er að hafa meiri
fjölbreytni og horfum við til kínakáls
og hvítkáls næsta vor. Við notum engin
eiturefni við ræktunina, einungis áburð
og síðan fer afskurðurinn í kýrnar svo
það er hámarksnýting á afurðinni. En
þetta útheimtir mannskap, bæði þegar
sett er niður og við upptöku og það
þarf að gera í góðu veðri svo það er
ýmislegt sem þarf að hafa í huga eins
og við búskap almennt.“ /ehg
Ásmundur Lárusson, bóndi á Norðurgarði á Skeiðum, sáði út, ásamt
fjölskyldu sinni, brokkolí og blómkáli í vor til að auka fjölbreytni í framleiðslu
á bænum. Myndir / ehg
Jafnt stórir sem smáir hjálpuðu til
við að setja niður plönturnar í vor
en bændurnir fengu lánaða vél frá
Flúðum.
Brokkolí- og blómkálsplönturnar líta
vel út og fara bændurnir senn að
uppskera brokkolí þar sem hausarnir
eru um 3–400 gramma stórir þegar
þeir eru sendir í verslanir.
Haustslátrun hjá SS hefst 4. september:
Engir slátrarar koma frá
Nýja-Sjálandi í ár
Haustslátrun sauðfjár hefst hjá Slát­
urfélagi Suðurlands á Sel fossi föstu­
daginn 4. september en reiknað er
með að slátra um 106.000 fjár í ár.
„Við ætluðum að vera til 4.
nóvember en vegna kórónu veirunnar
þá fáum við ekki atvinnuslátrara frá
Nýja-Sjálandi og höfum því ákveðið
að framlengja slátrunina strax um
tvo daga, eða til 6. nóvember,“
segir Benedikt Benediktsson,
framleiðslustjóri hjá SS.
120 starfsmenn ráðnir
Benedikt segir að Íslendingar sæki
lítið sem ekkert um störf í slátur-
tíðinni og því verður erlent starfsfólk
frá Póllandi ráðið í meira mæli en
áður, en alls verða ráðnir um 120
starfsmenn í sláturtíðina.
„Við reiknum með að það gangi
að ráða Pólverjana með því að
skima á landamærum og svo aftur
4–5 dögum eftir komu til landsins
því það er mikilvægt að ekki berist
smit inn í sláturhús því það getur
haft alvarlegar afleiðingar ef slátrun
stoppar. Við þurfum einnig að
grípa til fleiri aðgerða til að hefta
líkur á smiti með því að setja upp
bráðabirgðaaðstöðu til að stækka
matsal svo meira bil sé á milli
fólks í matsalnum og einnig mun
aðgangur annarra en starfsmanna
vera bannaður til að minnka líkur
á smiti á meðan sláturtíð stendur,“
bætir Benedikt við. /MHH
Benedikt Benediktsson, framleiðslu-
stjóri hjá SS. Myndir / MHH
SS reiknar með að slátra um 106
þúsund fjár á Selfossi í haust og að
ráða þurfi 120 starfsmenn sértaklega
í sláturtíðina.
Formaður Búnaðarsambands Suður -Þingeyinga:
Hægt að ná góðri uppskeru
verði veður gott fram á haustið
„Heilt yfir gengur vel hér á
svæðinu. Það er enn mikið eftir af
sumrinu og ef haustið verður gott
ætti að nást að heyja vel,“ segir
Haukur Marteinsson, formaður
Bún aðar sambands S­Þingeyinga
og bóndi á Kvíabóli í Kinn.
Hann segir að skortur á vætu hafi
sett svip sinn á fyrri hluta sumars,
en hefði ekki endilega haft afgerandi
áhrif á fyrsta slátt, þótt dæmi væru
vissulega um það frá einhverjum
stöðum. „Það hefur rignt vel síðustu
daga og þó það hafi líka verið kalt
hef ég heyrt af því að bændur hafi
borið á meiri áburð eftir slátt en
vanalega í von um auka uppskeru,“
segir Haukur.
Endurrækt túna með mesta móti
Kal var gríðarmikið í sýslunni á
liðnu vori og segir Haukur að búið
sé að taka út kal á yfir 50 bæjum og
sé það á bilinu
frá 40 og upp
í 90% á milli
bæja, þannig
að jarðrækt og
endurvinnsla
túna hafi verið
með allra mesta
móti.
Spretta í
nýræktun er að
jafnaði góð og
telur Haukur að
heilmikil uppskera geti náðst það
sem eftir lifir sumar og fram á haust
verði veður með skaplegum hætti.
„Þó er auðvitað misjafnt hversu
snemma að vorinu menn komust
í að vinna upp tún og vissulega
hefur það áhrif þar sem nýlega var
búið að sá og að lenda í kjölfarið í
þurrkum. Þær nýræktir sem sáð var í
fyrst munu gefa mestu uppskeruna,“
segir Haukur. /MÞÞ
Haukur
Marteinsson.
Tún og rýgresisnýræktir í Kaldakinn líta ágætlega út. Mynd / HM
Það varð uppi fótur og fit á
samfélags miðlum í vetur þegar
nýr rjómaostur frá MS var settur á
markað. Neytendur brugðust margir
hverjir ókvæða við og sögðu að nýr
og mýkri rjómaostur hentaði verr til
matargerðar en sá gamli. Nú hefur
MS gefið út að gamla uppskriftin að
rjómaosti sé fáanleg í búðum á ný.
„Til að koma til móts við sem
flesta neytendur var ákveðið að setja
gamla rjómaostinn aftur á markað og
verður hann fáanlegur í verslunum
samhliða þeim nýja. Gamli rjóma-
osturinn er stífari en sá nýi og hentar
einkar vel í eðlur, ídýfur og aðra
heita rétti. Gamli rjómaosturinn
kemur í 200 g umbúðum og vonum
við að neytendur sem hafa saknað
þess gamla geti nú tekið gleði sína á
ný,“ segir í tilkynningu frá MS. /TB
Gamli rjóma-
osturinn fæst á ný
Gamli rjómaosturinn þykir stífari en
sá nýi. Mynd / MS
Doktor Hrönn Jörundsdóttir
hefur verið skipuð í embætti
forstjóra Matvælastofnunar til
næstu fimm ára.
Hrönn er með BS-gráðu í
efnafræði frá Háskóla Íslands og lauk
MS-prófi í umhverfisefnafræði árið
2002 frá Stokkhólmsháskóla. Árið
2009 lauk hún einnig doktorsgráðu
í umhverfisefnafræði frá sama
skóla og hefur unnið hjá MATÍS
undanfarin 11 ár. Frá árinu 2016
hefur hún verið stjórnandi hjá MATÍS
þar sem hún hefur stýrt fjölmörgum
innlendum og alþjóðlegum
rannsóknaverkefnum, stefnumótun,
rekstri og ráðgjafarverkefnum.
Einnig hefur Hrönn verið formaður
áhættumatsnefndar á sviði matvæla,
fóðurs, áburðar og sáðvöru frá
árinu 2019. Hún hefur enn fremur
sérhæft sig á sviði matvælaöryggis,
áhættumats og áhættumiðlunar.
Alls bárust átján umsóknir um
starf forstjóra Matvælastofnunar.
Mat hæfnisnefnd fimm umsækjendur
vel hæfa til þess að gegna starfinu.
Í kjölfarið boðaði ráðherra þá í
viðtal þar sem ítarlega var farið
ofan í einstaka þætti starfsins og
sýn umsækjenda. /VH
Hrönn Jörundsdóttir
nýr forstjóri MAST
Hrönn Jörundsdóttir. Mynd / Matís
Húsfreyjurnar í Hamarsbúð á
Vatnsnesi í Húnaþingi bjóða upp
á hið rómaða kaffihlaðborð um
verslunarmannahelgina. Hlaðborð
Húsfreyjanna byggir á grónum
matarhefðum Vatnsness en boðið
er upp á rjómapönnukökur, parta,
skonsutertu, reyktan silung og kæfu,
rabarbaraköku, randalínu, kanil- sem
og möndlutertu og margt annað
gómsætt og gott.
Opið er 1. og 2. ágúst milli kl. 14
og 18. Verð á hlaðborði er kr. 2.000
fyrir 13 ára og eldri en kr. 1.000 fyrir
6–12 ára. Gestir eru beðnir að koma
með reiðufé þar sem enginn posi er
á staðnum.
Kaffihlaðborð um
verslunarmannahelgina