Strandapósturinn - 01.06.1987, Qupperneq 58

í Bæ man ég eftir tveim hundum, Annar hét Vaskur en hinn
Kobbi. Guðmundur gamli Bárðarson átti Vask og Matthías hinn.
Ég man lítið eftir Vask, hefur líklega verið dauður áður en ég fór
að dveljast í Bæ við nám. Eftir Kobba man ég hinsvegar mjög vel.
Hann hefur líklega lifað það að flytjast með húsbændum sínum
frá Bæ að Jónsseli.
Algengast held ég að hafi verið að skíra hunda nöfnum er
minntu á útlit þeirra eða líkamlegt ásigkomulag, til dæmis Kolur,
Lappi, Krummi, Sámur, Kaffon, Blesi, Skrámur, Strútur, sem of
langt yrði allt upp að telja. Önnur höfðuðu til eiginleika, raun-
verulegra eða ímyndaðra.
Þó voru nöfn af erlendum toga töluvert algeng. Til dæmis man
ég að hundurinn hans Jóns gamla í Jónsseli hét Týrus. Hann
fylgdi karlinum alltaf inn og lagðist við fætur hans þegar hann var
setztur á eitthvert rúrnið í baðstofunni. Svo gat karlinn allt í einu
vaknað upp úr hróka samræðum og kallað upp yfir sig: „Týrus,
Týrus“. Og Týrus stóð þá á fætur, sperrti eyrun og lagði trýnið á
milli fóta karlsins. En hann togaði í eyrun á Týrusi og sagði: „Ertu
þarna Týrus greyið?"
Að því búnu hélt hann svo áfram samræðunum, þar sem frá
hafði verið horfið, eins og ekkert hefði í skorizt.
Annars var það töluvert algengt að nefna hunda eftir ýmsum
þjóðhöfðingjum fortíðarinnar, einkum þeirn er hlotið höfðu mis-
jafnan dóm sögunnar, og var Neró þar fremstur í flokki. Til
dæmis man ég eftir hundi sem hét Arthúr. Nafnið var reyndar
stytt, því það hefur víst verið óþjált í framburði þegar kallað var á
hundinn. Þess vegna var alltaf sagt Túri, þegar kallað var á hund-
inn.
Bismarck nefndist hvolpur sem ólst upp á næsta bæ við mig. En
óvænt uppákoma olli því að hvolpur þessi fékk ekki að halda þessu
rismikla nafni. Þegar stundir liðu fram kom í ljós að hann hafði
ekki verið kyngreindur rétt, hann var nefnilega ekki karlkyns
heldur kvenkyns. Þá var úr vöndu að ráða. Það þótti ekki við hæfi
að nafn kanzlarans væri notað á tík. Hinsvegar var tík þessi orðin
vön Bismarcksnafninu. Þetta vandræðamál var leyst á þann hátt
að tíkinni var gefið nýtt nafn sem hljómaði líkt og Bismarck. Hún
56