Strandapósturinn - 01.06.2010, Qupperneq 10

8
Hópurinn skiptist svo fyrir nóttina þar sem 25 gistu í Nesjaskóla
en 22 fóru að Hvammi á Höfn í Hornafirði.
Lagt var af stað frá Nesjaskóla þann 19. júní um kl. 9:00. Nú lá
leið okkar undir Almannaskarð og áfram að Djúpavogi og hélt
Kalli áfram að fræða okkur um staðina sem við keyrðum
framhjá.
Nú vorum við komin til Djúpavogs og var þar mætt Arndís
Þorvaldsdóttir leiðsögumaður sem kom þangað á móti okkur. Og
tók hún nú við leiðsögn. Eftir stutt stopp á Djúpavogi var ekið til
Breiðdalsvíkur þar sem snæddur var hádegisverður á Hótel
Bláfelli. Hægt var að velja um matarmikla kjötsúpu, kjúklingasúpu
eða plokkfisk. Að máltíð lokinni gafst kostur á að skreppa í gamla
kaupfélagið og skoða sýningu á saumaskap í Breiðdal á síðustu
öld eða ganga um steinasafn sem nýlega hefur verið opnað í húsi
sem hýsti áður Póst og síma.
Frá Breiðdalsvík var ekið til Stöðvarfjarðar þar sem „brostið“
var á blíðviðri og spókuðu ferðalangarnir sig í sólskininu í
lystigarði Petru og nutu fegurðar grjóts og gróðurs. Einnig fóru
einhverjir á markað sem nýlega hefur verið opnaður á staðnum
og litu inn hjá Gallerí Snærós.
Frá Stöðvarfirði var ekið til Fáskrúðsfjarðar og tekinn rúntur
um bæinn. Síðan ekið um jarðgöng til Reyðarfjarðar þar sem
stoppað var í verslunarmiðstöðinni Molanum, þar sem verslaðar
voru ýmsar nauðsynjar og tékkað á austfirskum tuskubúðum.
Næst lá leiðin til Eskifjarðar þar sem drukkið var kaffi með
lummum í Randolfshúsi sem er gamalt sjóhús frá því seint á 19.
öld. Einnig gafst fólki kostur á að skoða sig um í húsinu en á
loftinu er gömul verbúð frá fyrri hluta 20. aldar sem sýnir vel
þann aðbúnað sem vertíðarfólk bjó við. Þessi ferðaþjónusta er
rekin af ungum hjónum, Berglindi Ingvarsdóttur og Sævari
Guðjónssyni.
Frá Eskifirði var haldið beint upp á Hérað að Hallormsstað þar
sem hópurinn gisti á meðan hann dvaldi á Austurlandi. Þar tók á
móti okkur Þurý Bára Birgisdóttir hótelstjóri.
Þegar þangað var komið fengu allir þessi líka fínu herbergi
með baði svo það var heldur en ekki ánægður hópur sem mætti
svo til kvöldverðar sem var bara flott veisluhlaðborð, síðan var
sungið og dansað fram á nótt.