Strandapósturinn - 01.06.2010, Blaðsíða 60

58
vetri 1930 nokkru áður en konurnar væntu sín þeim og öðrum til
öryggis. Um tvennt var að ræða til að komast til heimila hinna
verðandi mæðra. Að fara frá Bæ yfir Naustvíkurskörð norðan
Reykjarfjarðar, fá sig flutta þaðan yfir Reykjarfjörð til hins forna
verslunarstaðar, Kúvíkur. Þaðan gangandi yfir Veiðileysuháls að
Veiðileysu. Svo þaðan gangandi út í Byrgisvík. Það er 2–3ja tíma
gangur. Og er þá komið á ákvörðunarstað. Hin leiðin var að fara
út á Gjögur og fá flutning þaðan yfir í Byrgisvík. Til þess þarf
veður að vera gott svo hægt sé að lenda í Byrgisvík. Er sú leið mun
styttri og auðveldari. Ekki man ég hverja leiðina Jensína fór að
þessu sinni. Seinni leiðin var mun auðveldari fyrir hana ef gott var
í sjó og auðvelt að lenda í Byrgisvík. Hún var þá komin á
starfsvettvang sinn. Stutt er í milli bæjanna Byrgisvíkur og
Kolbeinsvíkur og því hægt að komast þar á milli á tilhlýðilegum
tíma. En bæði var að Jensína fór þangað með nokkrum fyrirvara
og svo hitt að fæðingarnar drógust lítillega enda væntu þær sín
ekki á nákvæmlega sama tíma og dagarnir urðu að vikum.
Símasambandslaust var þá við þessa bæi og fréttir stopular og
engar. Á meðan Jensína beið eftir fæðingum hjá þessum tveim
nágrannakonum bar það til að ung kona, systir konunnar í
Byrgisvík, Guðbjörg, búsett á Kleifum í Kaldbaksvík tók jóðsótt
heima hjá sér. Var þá auðveldast að fá Jensínu til að sitja yfir
henni. Er það nokkuð löng leið en styst að ná ljósmóður eins og
á stóð. Fór ljósmóðirin á hestum. Tókst það vel. Tók Jensína þar
á móti efnilegum og frískum dreng. Eftir að hafa gert konu og
barni til góða þar tilsettan tíma hélt hún aftur norður í Kolbeinsvík
eða Byrgisvík. Leið nú stutt um þar til önnur konan varð léttari.
Heilsaðist konu og barni vel. Var nú nokkur bið eftir að hin konan
yrði léttari. Eftir því beið Jensína. En áður en af því yrði kom það
til að Olga Jakobsdóttir Thorarensen á Gjögri, kona Jóns
Sveinssonar bónda og kaupmanns á Gjögri, tók jóðsótt heima á
Gjögri. Veður var þá gott og stutt að fara á sjó frá Gjögri inn yfir
að Byrgisvík að sækja ljósmóðurina. Það var gert. Jensína fór til
Olgu, tók á móti barni hennar og heilsaðist þeim báðum vel.
Nú var konan í Byrgisvík (?) eftir og komið að fæðingu hjá
henni. Því þorði Jensína ekki annað en fara daginn eftir inn í
Byrgisvík. Veður þurfti ekki að breytast mikið til þess sjóferðin
lokaðist. Leið nú ekki langt um þar til barnið fæddist í Byrgisvík.