Bændablaðið - 16.05.2024, Blaðsíða 36

36 Bændablaðið | Fimmtudagur 16. maí 2024Viðtal
Magnús og Ingibjörg eru bæði úr
Austur-Húnavatnssýslu og voru
ekki með sérstakan hug á því að
flytjast búferlum, enda stóð alltaf
til að Magnús tæki við sauðfjárbúi
foreldra sinna á Helgavatni í
Vatnsdal. Magnús frétti síðan
af því að þáverandi ábúendur á
Bergsstöðum stefndu að því að
minnka búið talsvert eða hætta og
einbeita sér að öðrum störfum, en
hann hafði kynnst þeim eftir að
hafa rúið kindurnar þeirra nokkrum
sinnum.
Magnús sló á þráðinn í maí 2019
og lýsti yfir áhuga sínum á að hann
og Ingibjörg keyptu Bergsstaði og
allt sem þeim fylgir.
„Hann hringdi eftir tvo daga til
baka og sagðist alveg vera til í að
skoða þetta,“ segir Magnús. Hann
bætir við glettinn að tímasetning
símtalsins hafi verið honum í vil,
enda var það á miðjum sauðburði
þegar bændur eru alveg bugaðir og
vilja fegnir losna.
Ábúendaskiptin hröð
Í júní fóru Magnús og Ingibjörg að
Bergsstöðum til að skoða aðstæður
og setjast að samningaborðinu.
Þar var þeim gefið upp verð sem
þau gengu að og var því farið
að skipuleggja ábúendaskiptin.
Unga parið fór svo á Vatnsnesið
um haustið til að taka þátt í
smalamennskum og hjálpa til við
val á ásetningsfé.
Formleg ábúendaskipti voru
síðan 1. nóvember 2019 og fluttu
fyrri ábúendur á Hvammstanga
sem er í tuttugu kílómetra fjarlægð.
Ungu bændurnir segja að það hafi
ekki verið neitt yfirfærslutímabil,
heldur hafi skiptin verið býsna
hröð. Fyrri ábúendur séu hins vegar
alltaf til staðar og samgangurinn
enn mikill.
„Ég hringdi mikið fyrsta árið
til að vita hvar hlutirnir væru og
hvernig sumt virkaði. Svo hjálpaði
hann mér af stað með samstæðuna,
en ég hafði aldrei rúllað áður,“
segir Magnús.
Tilfinningin þegar þau fluttu hafi
verið skrýtin, eins og þau orða það.
Þetta hafi verið á laugardegi og allt
gert í miklum flýti. Magnús segir
að fyrri ábúendur hafi séð fram
á mikla fyrirhöfn við að bera út
frystikistuna sína úr kjallaranum,
en þá brugðu þau á það ráð að gera
með sér skipti þar sem unga parið
átti nákvæmlega eins frystikistu.
Þar með hafi þau ekki þurft að bera
eina út og aðra inn.
Óveður á fyrstu vikunum
Nokkrum vikum eftir að þau fluttu
reið óveður yfir landshlutann sem
hafði í för með sér rafmagnsleysi og
lokanir á vegum. Þar sem þau voru
nýflutt áttu þau lítið til að bjarga
sér og síðustu klukkutímarnir í
tveggja sólarhringa rafmagnsleysi
hafi verið kaldir.
„Það var skrýtið að vera tvö ein
á nýjum stað,“ segir Ingibjörg. Hún
bætir við að samfélagið sé mjög gott
og margir sveitungar þeirra og íbúar
á Hvammstanga sem þau þekktu
ekki mikið hafi hugsað til þeirra
og hringt til að athuga hvernig þau
hefðu það. Haustið 2020 eignuðust
þau sitt fyrsta barn og segir Ingibjörg
það hafa verið sérstakt að vera með
hvítvoðung í haustverkunum.
Þá kom næsta barn í apríl
2022, eða rétt fyrir sauðburð,
sem hafi heldur ekki verið besta
tímasetningin til barneigna, segir
Ingibjörg í kímni. Nú sé þriðja
barnið væntanlegt í lok maí.
Framfarir í afurðum hvetjandi
Á Bergsstöðum er fimm hundruð
og fimmtíu kinda sauðfjárbú. Þau
fjölguðu fénu síðasta haust og
sjá þau næstum alltaf framfarir í
afurðum, sem Magnús segir vera
hvetjandi og sýna að þau séu að
gera eitthvað rétt. Nú séu þau farin
Vestur-Húnavatnssýsla:
Áhugi og metnaður skipta máli
– Ungir bændur keyptu sauðfjárbúið á Bergsstöðum á Vatnsnesi af vandalausum án þess að það væri auglýst
Ingibjörg Jónína Finnsdóttir og Magnús Örn Valsson fréttu af því að fyrri ábúendur á Bergsstöðum vildu hætta með sauðféð. Hann hafði því samband við bóndann að fyrra bragði og stakk upp
á því að þau myndu taka við keflinu, sem gekk eftir og keyptu þau jörðina í lok árs 2019. Myndir / ál
Ástvaldur Lárusson
astvaldur@bondi.is
Á Bergsstöðum á Vatnsnesi er 550 kinda sauðfjárbú. Aðstaðan er góð þar sem stutt er í beitarhagana og fjárhúsin vel útbúin.
Sauðburður var nýbyrjaður þegar blaðamaður heimsótti
Ingibjörgu og Magnús. Hér er gemlingur að kara lamb sem
bar nokkrum mínútum áður.
Magnús Örn Valsson og Ingibjörg Jónína Finnsdóttir hafa stundað
sauðfjárbúskap á Bergsstöðum síðan haustið 2019. Þau keyptu jörðina
af óskyldu fólki og var hún aldrei auglýst, heldur hafði Magnús samband
við fyrri ábúendur að eigin frumkvæði.