Árbók Hins íslenzka fornleifafélags - 01.01.1943, Page 124

124
mandibularis). Gómurinn er hár og er nokkur beinútvöxtur á mið-
seymi hans — gómgarður (torus palatinus).
Utlimahlutíöll eru lík því, sem gerðist með heiðnum konum á ís-
landi, og grindarmálin eru góð.
Smávægilegar gigtarbreytingar eru á nokkrum hryggjarliðum og
á axlarliðum. Vinstri vala og hælbein eru gróin saman, en ekki verð-
ur nú sagt, af hvaða orsökum það sé, en trúlega eru það eftirstöðvar
eftir lið- og beinabólgu. Sé svo, þá hefur hún að minnsta kosti verið
gróin löngu fyrir andlátið, því að engin merki nýlegra bólgubreytinga
sjást. Hins vegar hefur naumast getað verið um þráláta bólgu á vaxt-
arárunum að ræða, því að þess sjást engin merki, að kippt hafi úr
vexti á fætinum, og ekki heldur sést rýrnun beina á honum. Teljandi
óþægindi hefur konan ekki haft af þessum samvexti beinanna og
sennilega alls ekki sézt í göngulagi hennar.
Almenn lýsing á konunni miðað við þeirra tíma Islendinga
myndi verða þannig: Frekar há, vel limuð kona, þó frekar stutt til
hnésins, eins og títt var um marga íslendinga þá. Hún hefur verið
herðabreið miðað við mjaðmarbreiddina og handleggjalengdina og af
konu að vera. Yfirleitt mun hún hafa verið vel vaxin. Andlitssvipur-
inn hefur verið langleitur og trúlega toginleitur, hafi konan verið hold-
grönn. Nefið sennilega beint, þunnt og langt, og augun að líkindum
djúpsett með frekar miklum, réttleitum brúnum, en munnur hefur
verið ófríður, eins og lýsingin á tönnunum ber með sér.
2. kuml. Nær heil beinagrind úr um 8 mánaða gömlu barni. Báð-
ir helmingar neðri kjálka eru grónir saman, en engar tennur hafa
verið komnar.
Engar sjúklegar breytingar eru á beinunum.
3. kuml. Neðri kjálki, vinstra gagnaugabein, vinstra hvirfilbein,
ásamt vinstri hluta ennisbeins og hnakkabeins. Hægra viðbein og
upphandleggsbein, vinstri framhandleggsbein, hægra mjaðmarbein,
vinstri lærleggur og sköflungur. Ofantalin bein komu á Þjóðminja-
safnið 1868 og eru merkí 569. 10. 10. ’38 komu á safnið hnjá-
kollar af hægri lærlegg, sem vafalaust eru úr þessari beinagrind. 1947
fundust engin bein, sem líkur eru til, að séu úr þessari beinagrind.
Beinin eru úr karlmanni, um eða yfir 50 ára að aldri, og 178 sm
hæð.
Þegar búið er að líma höfuðbeinin saman, fæst talsverður hluti af
vinstri helming hauskúpunnar. Hún virðist hafa verið frekar breiðleit
og lengdin varla yfir 190 mm. Sennilega hefur maðurinn verið meðal-