Vísbending - 18.12.2004, Page 28

JSLENSKIR STJÓRNARHÆTTIR
Stjórnir fyrirtækja og góðir stjórnarhættir hafa verið talsvert í umræðunni á árinu 2004. Hinn 16.
mars kynntu Kauphöll Islands, Verslunarráð og Samtök atvinnulífsins Ieiðbeinandi reglur um góða
stjórnarhætti fyrir íslensk fyrirtæki. I reglunum var m.a. lögð áhersla á óháða stjórnarmenn og
stoðnefndir stjórna. í byrjun september kom út skýrsla nefndar um íslenskt viðskiptaumhverf! sem
skipuð var af iðnaðar- og viðskiptaráðherra. Nokkra athygli vakti að nefndin lagði til að starfs-
svið svokallaðra „starfandi stjórnarformanna“ yrði talsvert skert með lagasetningu. Vísbending
hefur á árinu einnig fjallað mikið um mál íslenskra stjórna og um stjórnarhætti fyrirtækja út frá
ýmsum hliðum og má telja fjórtán greinar sem hafa beinar tilvísanir í umræðuna, en einnig hafa
birst greinar um skyld mál eins og ákvarðanatöku, hópstarf og fleira. Satt að segja hefur óvíða verið
fjallað meira um stjórnir fyrirtækja á íslandi en í Vísbendingu frá árinu 1999. Þess vegna er við-
eigandi að bryddað sé upp á umræðu um stjórnir og stjórnarhætti í þessu síðasta tölublaði Vísbend-
ingar í ár. Umræðunni er þó hvergi nærri Iokið.
Þessi hluti blaðsins, sem fjallar um íslenska stjórnarhætti, skiptist í þrjá hluta. I fyrsta hlut-
anum f jallar Vilhjálmur Bjarnason viðskiptafræðingur um upphaf íslenskra stjórnarhátta og gefur
ákveðna mynd af uppruna og þróun stjórna og stjórnarhátta hér á landi. I öðrum hluta, sem er jafn-
framt meginefni þessa kafla, er það sem kalla má „hringborð stjórnarformanna Islands“ en ritstjóri
Vísbendingar hafði samband við þungavigtarmenn í íslensku viðskiptalífi sem gegnt hafa stjórnar-
formannsstöðum í stærstu fyrirtækjum landsins og spurði þá nokkurra spurninga. Afraksturinn er
einkar áhugaverður. í þriðja hlutanum fjallar Benedikt Jóhannesson um aðgerðir stjórnar Skipaút-
gerðar ríkisins í grein sem nefnist „Endurminningar stjórnarformanns“.