Morgunblaðið - 12.10.2001, Qupperneq 6

FRÉTTIR
6 FÖSTUDAGUR 12. OKTÓBER 2001 MORGUNBLAÐIÐ
HÆSTIRÉTTUR staðfesti í gær úr-
skurð héraðsdóms um að maður
skyldi sæta átta mánaða fangelsi og
greiða stúlku, sem hann beitti kyn-
ferðislegu ofbeldi, 400.000 krónur í
skaðabætur. Í úrskurði Hæstaréttar
segir að þegar litið sé til tveggja
myndbanda af viðtölum við stúlkuna
og annarra gagna í málinu, þyki það
hafið yfir skynsamlegan vafa að
maðurinn, sem er föðurbróðir stúlk-
unnar, hafi gerst brotlegur gagnvart
henni. Gunnlaugur Claessen hæsta-
réttardómari lagði fram sératkvæði,
taldi hann að ekki væri hjá því kom-
ist að sýkna ákærða þar sem sak-
argiftir á hendur honum væru ein-
göngu studdar við frásögn ætlaðs
brotaþola og varhugavert væri að
byggja á þeirri frásögn einni saman.
Lögmaður ákærða, Björgvin Þor-
steinsson hæstaréttarlögmaður,
lagði fram ómerkingarkröfu en
Hæstarétti þótti ekki efni til að taka
hana greina. Ómerkingarkrafan var
byggð á því að dómur héraðsdóms
hafi byggst á framburði stúlkunnar í
öðru dómsmáli, þ.e. vegna kæru á
hendur bróður stúlkunnar um kyn-
ferðisbrot gagnvart henni. Einnig að
hún hafi neitað að tjá sig fyrir dómi
um sakarefnið og að sálfræðilegar
athuganir hafi skort bæði á stúlk-
unni og ákærða.
Í rökstuðningi í dómi Hæstaréttar
segir að gögnin úr máli stúlkunnar á
hendur bróður hennar hafi verið lögð
fram án athugasemdar verjanda
mannsins. Þá geti það ekki leitt til
ómerkingar dóms þó stúlkan hafi
verið ófús um að tjá sig að ráði um
efni myndbands af rannsóknarviðtali
sem tekið var við hana í Barnahúsi
þegar hún var tæplega sjö ára, í lok
desember 1998. Einnig segir í dómn-
um að maðurinn hafi aldrei komið til
viðtals hjá sálfræðingi líkt og hann
hafi verið beðinn um til að unnt væri
að rannsaka geðhagi hans. Þá hafi
legið fyrir skýrsla sálfræðings um
stúlkuna eftir að upp kom að bróðir
hennar hafði notað hana kynferðis-
lega.
Í dómi Héraðsdóms Reykjavíkur
kemur fram að brot föðurbróður
stúlkunnar áttu sér stað á árunum
1997 og 1998 þegar stúlkan, sem er
fædd 1992, dvaldi um helgar hjá föð-
ur sínum á heimili hans og bróður
hans. Manninum var gert að sök að
hafa „snert kynfæri stúlkunnar og
endaþarm með getnaðarlim sínum
og látið hana fróa sér“, að því er seg-
ir í dómi héraðsdóms.
Dóminn kváðu upp hæstaréttar-
dómararnir Guðrún Erlendsdóttir,
Haraldur Henrysson, Hrafn Braga-
son, Pétur Kr. Hafstein og Gunn-
laugur Claessen, sem skilaði sérat-
kvæði. Sigríður Jósefsdóttir
saksóknari sótti málið fyrir hönd
ákæruvaldsins.
Kynferðisbrotamaður dæmdur
í 8 mánaða fangelsi auk sektar
SETTUR umboðsmaður Alþingis,
Friðgeir Björnsson, dómstjóri í
Héraðsdómi Reykjavíkur, hefur
skilað af sér áliti í máli sex íbúa í
nágrenni Landspítalans við Hring-
braut sem kvörtuðu yfir úrskurði
úrskurðarnefndar skipulags- og
byggingarmála. Nefndin hafnaði
þeirri kröfu íbúanna að fella úr gildi
byggingarleyfi fyrir nýbyggingu
Barnaspítalans og samkvæmt áliti
setts umboðsmanns var nefndinni
heimilt að gefa byggingarleyfið út,
enda hafi byggingin fallið undir
skilyrði laga um „óverulegar breyt-
ingar“ þrátt fyrir stóra og viða-
mikla framkvæmd.
Settur umboðsmaður gerir hins
vegar nokkrar athugasemdir við
málsmeðferð úrskurðarnefndarinn-
ar. Umboðsmaður Alþingis,
Tryggvi Gunnarsson, vék sæti í
þessu máli og því setti forseti Al-
þingis Friðgeir til að skila áliti.
Íbúarnir sex sendu inn kvörtun
til embættis umboðsmanns Alþingis
í lok árs 1999 í nokkrum liðum þar
sem þeir voru ósáttir við málsmeð-
ferð og vinnubrögð byggingar- og
skipulagsyfirvalda Reykjavíkur-
borgar.
Nánar tiltekið var kvartað yfir
framkvæmd grenndarkynningar og
málsmeðferð borgarinnar þar sem
ákvæði stjórnsýslulaga hefðu verið
virt að vettugi. Kvartað var yfir því
að óheimilt hefði verið að veita
byggingarleyfi fyrir Barnaspítalann
án þess að ótvírætt hefði legið fyrir
hvort staðfest deiliskipulag af lóð-
inni væri til eða ekki. Íbúarnir
töldu úrskurðarnefndina ekki hafa
tekið afstöðu til þess hvort sér-
uppdráttur af Landspítalalóðinni,
sem samþykktur var í borgarstjórn
árið 1976 og lagður til grundvallar í
málinu, væri gilt deiliskipulag. Í
þessu efni tekur settur umboðsmað-
ur Alþingis undir með íbúunum og
telur að úrskurðarnefndinni hafi
borið að taka afstöðu til þessa sér-
uppdráttar. Efni rökstuðnings
nefndarinnar að þessu leyti hafi
ekki samræmst ákvæðum stjórn-
sýslulaga. Hins vegar telur um-
boðsmaður að í ljósi fyrirliggjandi
gagna hefði grenndarkynningu
vegna spítalabyggingarinnar ekki
verið ábótavant.
Friðgeir Björnsson, settur um-
boðsmaður, gerir athugasemdir við
að fimm mánuðir hafi liðið frá því
að óskað var eftir ljósriti af gögnum
frá úrskurðarnefndinni þar til að
efnislegt svar barst frá henni. Telur
Friðgeir nefndinni ennfremur skylt,
samkvæmt stjórnsýslulögum, að af-
henda ljósrit af fundargerðum sín-
um sé þess óskað.
Sex nágrannar Barnaspítalans við Hringbraut
kvörtuðu til Umboðsmanns Alþingis
Byggingarleyfi heimilt
en meðferð ábótavant
VIÐ upphaf landsfundar Sjálfstæðisflokksins í gær
fylktu félagar í Sjúkraliðafélagi Íslands liði við and-
dyri Laugardalshallar. Vildu þeir með því minna á
baráttu sína fyrir bættum kjörum en á mánudag á
næsta þriggja daga verkfall félagsins að hefjast.
Samningafundur í kjaradeilu sjúkraliða og ríkisins
hefur ekki verið boðaður fyrr en að því loknu eftir
miðja næstu viku.
Morgunblaðið/Golli
Sjúkraliðar minntu á kjarabaráttu sína
SKIPTAR skoðanir eru á meðal
starfsmanna Ríkisútvarpsins um
hugmynd Björns Bjarnasonar
menntamálaráðherra þess efnis að
Rás 2 verði flutt til Akureyrar, en
viðmælendur fagna hugmyndum um
eflingu svæðisútvarpsins.
Menntamálaráðherra hefur óskað
eftir að hugmyndin verði könnuð
nánar og segist Markús Örn Antons-
son útvarpsstjóri búast við því að
hafist verði handa við þá athugun
fljótlega. Hann segist telja hug-
myndina athyglisverða og segir mik-
ilvægt í ljósi þeirrar umræðu sem
hefur staðið um framtíð Rásar 2 að
mótuð verði ákveðin stefna um hlut-
verk hennar í skipulagi Ríkisút-
varpsins. Meðal þess sem hefur verið
nefnt er að stöðin verði seld eða lögð
niður.
Útvarpsstjóri telur að með því að
flytja stöðina norður mætti leggja
aukna áherslu á dagskrárgerð á veg-
um svæðisstöðvanna á Akureyri,
Ísafirði og Egilstöðum sem og á Suð-
urlandi í samvinnu við Útvarp Suð-
urlands. Markús Örn segist oft hafa
saknað þess að Ríkisútvarpið væri
ekki með ríkulegt framboð af al-
mennu dagskrárefni frá svæðis-
stöðvunum. „Ef dagskrárstjórn yrði
norðan heiða er ég alveg sannfærður
um það að viðhorfin yrðu öðru vísi en
í höfuðstöðvunum í Efstaleitinu og
það yrði örugglega aukin áhersla á
framlag fólks utan höfuðborgar-
svæðisins til dagskrár Ríkisútvar-
spins, útvarps allra landsmanna.“
Sigurður Þór Salvarsson, deildar-
stjóri Ríkisútvarpsins á Akureyri,
segist fagna öllum góðum hugmynd-
um um að byggja upp starfsemina á
Akureyri en hann segist ekki vita
hvað felist nákvæmlega í hugmynd-
um menntamálaráðherra, hvort ver-
ið sé að tala um að flytja Rás 2, eins
og hún er nú, í heilu lagi norður eða
Rás 2 í breyttri mynd. Því síður viti
hann hvað gert sé ráð fyrir mörgu
starfsfólki en eftir fækkun í haust
starfi sex manns hjá fyrirtækinu fyr-
ir norðan.
Þrátt fyrir óvissuna segir Sigurð-
ur Þór að verði hugmyndin að veru-
leika efli hún starfsemi Ríkisút-
varpsins á Akureyri gífurlega sem
og aðra starfsemi fyrirtækisins úti á
landi.
Hugmynd ráð-
herra kom á óvart
Jón Ásgeir Sigurðsson, formaður
starfsmannasamtaka Ríkisútvarps-
ins, segir að hugmynd ráðherra hafi
komið á óvart og hvorki starfsmenn
RÚV né þingmenn, sem hann hafi
rætt við á göngum Alþingis í fyrra-
dag, hafi heyrt af þessu fyrr en við
umræðuna um fjárhagsvanda Ríkis-
útvarpsins á Alþingi á miðvikudag. Í
umræðunum hafi menntamálaráð-
herra m.a. sagt að reksturinn væri á
ábyrgð stjórnenda Ríkisútvarpsins
og í mesta lagi bæri Alþingi ábyrgð á
rekstrinum, stæði hann illa, en alls
ekki hann sjálfur.
Samt kæmi hann með svona
ákveðna hugmynd um reksturinn,
sem væri óhugsuð að öllu leyti,
vegna þess að Rás 2 væri umræðu-
vettvangur og ekki væri hægt að
flytja hann til Akureyrar. „Það veit
enginn í raun og veru hvernig á að
flytja Rás 2 norður og hvað á að
flytja,“ segir hann.
Hins vegar segir Jón Ásgeir það
ágæta hugmynd hjá menntamála-
ráðherra að efla svæðisútvarpið.
„Megi það lifa sem allra lengst,“ seg-
ir hann en bætir við að óvissa ríki hjá
starfsfólki. „Nú fá menn kannski
uppsagnir næstu daga ef ráðist verð-
ur í að framkvæma það sem ráðherra
stingur upp á,“ segir hann.
Skiptar skoðanir
um flutning Rásar
2 til Akureyrar
ÞRIGGJA milljóna króna í beinhörð-
um peningum í eigu Landsbanka Ís-
lands er saknað í Þýskalandi og hafa
lögregluyfirvöld í Frankfurt tekið að
sér rannsókn málsins, þar sem grun-
ur er um þjófnað.
Peningasendingin fór frá Lands-
bankanum til Þýskalands í síðustu
viku og átti að komast í hendur
banka í Frankfurt, sem pantað hafði
peningana. Sendingin komst hins
vegar aldrei á leiðarenda og sætir
málið nú rannsókn. Landsbankinn er
tryggður hérlendis fyrir tjóninu og
mun fá það bætt.
Peningarnir voru flokkaðir sem
verðmætasending, en auk rannsókn-
ar í Þýskalandi hefur þarlend póst-
þjónusta lagt fram beiðni til Íslands-
pósts um að málið verði kært til
íslenskra lögregluyfirvalda, þ.e. til
sýslumannsins á Keflavíkurflugvelli.
Formleg kæra hafði þó ekki borist
sýslumanni fyrri huta dags í gær.
Grunur um
þjófnað á 3
milljónum
LÖGREGLAN í Reykjavík hefur
tekið til rannsóknar innbrot á skrif-
stofu Sýslumannsins í Reykjavík við
Skógarhlíð.
Innbrotið var framið í fyrrinótt og
tilkynnt til lögreglunnar á fimmta
tímanum í gærmorgun. Brotin var
rúða í kjallara en stolið var tölvu og
15 tomma skjá. Ekki er vitað hverjir
voru að verki.
Innbrot á
sýsluskrifstofu
♦ ♦ ♦
♦ ♦ ♦
SNJÓKOMA var á Holtavörðuheiði í
gærkvöld og fór bíll út af um kl. 20.
Var það fólksbíll á sumardekkjum en
enginn slasaðist og litlar sem engar
skemmdir urðu á bílnum. Hélt hann
áfram leiðar sinnar eftir að dráttar-
bíll úr Borgarnesi hafði kippt honum
upp á veginn á ný.
Lögreglan í Borgarnesi sagði að
vegurinn um heiðina hefði verið háll
og varasamur í gærkvöld en ekki
hefði frést um önnur óhöpp. Var
heiðin þokkalega fær og aðeins nauð-
synlegt að fara um hana með gát.
Bíll út af á
Holtavörðu-
heiði