Morgunblaðið - 23.02.2002, Blaðsíða 55

FRÉTTIR
MORGUNBLAÐIÐ LAUGARDAGUR 23. FEBRÚAR 2002 55
MIKILVÆGT er að huga að for-
vörnum í sumarhúsa- og hjólhýsa-
byggðum og því gengst Rauði kross
Íslands fyrir námskeiði á næstunni
varðandi öryggismál í tengslum við
sumarbústaði og hjólhýsi.
Steingrímur Sigurjónsson, skipu-
leggjandi og umsjónarmaður nám-
skeiðsins ásamt Guðlaugi Leóssyni,
segir að mikilvægt sé að fólk kynni
sér hvernig það eigi að bregðast við
óhöppum og slysum og því hafi ver-
ið ákveðið að halda sérstakt nám-
skeið fyrir sumarbústaða- og hjól-
hýsaeigendur og aðra sem dvelja í
sumarbústöðum og hjólhýsum.
Meðal annars verður farið yfir
hvernig meta eigi ástand sjúklings
með tilliti til hjartaáfalls, höf-
uáverka, blæðinga, losts, astma-
kasts, krampa, brunasára og bein-
brota og hvort nauðsynlegt sé að fá
þyrlu til flutnings sjúklings eða
hvort sjúkrabifreið eða björg-
unarsveitarbifreið nægi. Jafnframt
verður farið yfir skipulag bústaðar
og hjólhýsis, umhverfið, aðkomu og
fleira.
Sambærilegt námskeið varðandi
móttöku þyrlu á slysstað var fyrst
haldið fyrir Ferðaklúbbinn 4x4 í
desember 1989, en Guðlaugur Leós-
son segir að reynslan sýni hve mik-
ilvægt sé að halda svona námskeið
fyrir alla sem áhuga hafa á málinu.
Námskeiðið fer fram í Múlabæ,
Ármúla 34, fimmtudaginn 28. febr-
úar og þriðjudaginn 5. mars frá
klukkan 20 til 23.30 bæði kvöldin.
Námskeið fyrir fólk í sumarhúsum og hjólhýsum
Forvarnir
mikilvægar
Morgunblaðið/Árni Sæberg
Guðlaugur Leósson og Steingrímur Sigurjónsson, leiðbeinendur á nám-
skeiði Rauða krossins um öryggismál sumarhúsa- og hjólhýsaeigenda.
MORGUNBLAÐINU hefur borist
eftirfarandi ályktun frá hópi áhuga-
manna um bættar samgöngur milli
lands og Eyja:
„Við lítum svo á að góðar sam-
göngur séu undirstaða búsetu í
Vestmannaeyjum og algjört grund-
vallaratriði að stórefla samgöngur
ef snúa á við þeirri stöðugu fólks-
fækkun sem átt hefur sér stað í Eyj-
um frá árinu 1994 og sér ekki fyrir
endann á.
Það er kunnara en frá þurfi að
segja að fólk sættir sig almennt ekki
lengur við að búa á stöðum þar sem
ekki eru greiðar og öruggar sam-
göngur og nútíma atvinnurekstur
þrífst ekki án góðra samgangna.
Vaxtarmöguleikar ferðaþjónustunn-
ar eru miklir í Vestmannaeyjum en
nú sem fyrr eru slakar samgöngur
sá flöskuháls sem hindrar eðlilegan
vöxt greinarinnar.
Við vekjum athygli á kaflanum
um Vestmannaeyjar í þingsályktun-
artillögu ríkisstjórnarinnar um
stefnu í byggðamálum 2002–2005.
Þar segir m.a.:
,,Leita þarf allra leiða til að bæta
samgöngur milli lands og Eyja.
Greiðar samgöngur eru forsenda
þess að hægt sé að auka fjölbreytni í
atvinnulífi og treysta byggðina.“
Við teljum að nýlegt samkomulag
um fjölgun ferða með Herjólfi gegn
hækkun fargjalda sé engan veginn
nóg og ítrekum kröfur bæjarbúa um
tvær ferðir á dag allan ársins hring.
Við fögnum því að til stendur að
hefja rannsókn á ferjuaðstöðu á
Landeyjasandi og teljum afar brýnt
að hefjast handa sem fyrst í því
máli.
Við fögnum einnig fram kominni
þingsályktunartillögu um notkun
svifnökkva til fólks- og vöruflutn-
inga milli lands og Vestmannaeyja
og lýsum furðu okkar á að sam-
gönguyfirvöld skuli ekki nú þegar
hefja könnun á þeim möguleika
sem fram kemur í tillögunni. Tíðar
ferðir með svifnökkva frá Eyjum
að Markarfljótsbrú yrðu tvímæla-
laust sú samgöngubylting sem
krafist er af samgönguyfirvöldum
og í anda stefnu ríkisstjórnarinn-
ar.“
Góðar samgöngur
undirstaða búsetu
MORGUNBLAÐINU hefur borist
eftirfarandi ályktun frá Starfs-
mannafélagi ríkisstofnana:
„Trúnaðarmannaráðsfundur
Starfsmannafélags ríkisstofnana
(SFR), haldinn miðvikudaginn 20.
febrúar kl. 13, samþykkir eftirfar-
andi ályktun vegna lífeyrissjóðsrétt-
ar opinberra starfsmanna.
Á undanförnum vikum hefur orðið
töluverð umræða um lífeyrisréttindi
opinberra starfsmanna og viðbótar-
lífeyrissparnað, sem stéttarfélög rík-
isstarfsmanna sömdu um við fjár-
málaráðherra í síðustu
kjarasamningum.
Sveitarfélögin, sem eru viðsemj-
endur bæjarstarfsmannafélaganna,
höfnuðu því hins vegar að semja um
hið sama við sína starfsmenn.
Ástæða þeirrar höfnunar var útskýrð
þannig að með því væri verið að jafna
rétt opinberra starfsmanna og
starfsmanna á hinum almenna mark-
aði. Undir þessi rök hafa ákveðnir
forystumenn stéttarfélaga innan ASÍ
tekið og hrósað samningamönnum
sveitarfélaganna fyrir það.
Trúnaðarmannaráð bendir á:
1. Að lífeyrissjóðsréttur opinberra
starfsmanna er hluti af starfskjörum
þeirra, sem opinberir starfsmenn
hafa staðið vörð um og barist fyrir.
2. Opinberir starfsmenn hafa aldr-
ei staðið gegn því að aðrir starfshóp-
ar semdu um sams konar rétt og þeir.
3. Trúnaðarmannaráð SFR unir
því ekki að einstakir forystumenn
stéttarfélaga innan ASÍ og forystu-
menn í kjarasamningsgerð sveitarfé-
laganna ákveði hvort ríkisstarfs-
menn geti samið um framlag til
viðbótarlífeyrissparnaðar eða yfir-
leitt hvað stéttarfélög opinberra
starfsmanna semja um við sína við-
semjendur.
Stéttarfélög eiga að sækja fram
fyrir sína félagsmenn, bæta kjör
þeirra og standa vörð um áunnin
réttindi. Stéttarfélög eiga ekki að
virka hamlandi á aukinn rétt til fé-
lagsmanna annarra félaga.“
Ályktun SFR vegna
lífeyrissjóðsréttar
HVERJAR eru þarfir ungs fólks á
okkar dögum? Er skipulagt ung-
lingastarf kirkjunnar að mæta
þessum þörfum? Hver er árangur
af starfi kirkjunnar í þessum ald-
urshópi?Þessum spurningum verð-
ur reynt að svara á málþingi sem
haldið verður í Grensáskirkju
mánudaginn 25. febrúar kl. 17 –
21, undir yfirskriftinni „Er æsku-
lýðsstarf tímaskekkja?“ Málþing
þetta er haldið á vegum fræðslu-
sviðs Biskupsstofu.
Á ráðstefnunni verða framsögu-
erindi, umræður í hópum og hring-
borðsumræður. Einnig verða
æskulýðsfélög kirkjunnar með
kynningu á starfi sínu og munu
fulltrúar frá æskulýðsfélögunum
verða á staðnum til þess að svara
spurningum. Ráðstefnan er öllum
opin og allir velkomnir. Hægt er
að skrá sig í síma eða með því að
senda tölvubréf á netfangið stef-
an@biskup.is, segir í fréttatil-
kynningu.
Er æsku-
lýðsstarf
tíma-
skekkja?
Málþing um unglinga-
starf þjóðkirkjunnar
HIÐ íslenska náttúrufræðifélag
(HÍN) heldur fræðsluerindi mánu-
daginn 25. febrúar, kl. 20.30, í stofu
101, Lögbergi, húsi Háskóla Íslands.
Hreggviður Norðdahl, jarðfræðing-
ur á Raunvísindastofnun Háskólans
flytur erindi sem hann nefnir „Hval-
ir á fjöllum. Gildi beinafunda í jarð-
lögum fyrir jarðsögu síðjökultíma á
Íslandi.“
Í erindinu verður sagt frá fundi
hvalbeina á Íslandi og fjallað um
rannsóknir á þeim og setlögum sem
beinin hafa varðveist í. Rannsókn-
irnar hafa aukið við þekkingu manna
á aldri, útbreiðslu og dýpt hins forna
sjávarumhverfis hér við land og
einnig hafa þær varpað nýju ljósi á
hörfun ísaldarjökulsins í lok ísaldar
fyrir um 10.000 árum.
Fræðsluerindi HÍN eru einkum
ætluð almenningi og er aðgangur
ókeypis og öllum heimill, segir í
fréttatilkynningu.
Erindi um hvali
á fjöllum
FYRSTA skíðaganga vetrarins
verður farin sunnudaginn 24. febr-
úar. Haldið verður upp Hellisheiði
og hefst gangan við slysavarnaskýl-
ið á heiðinni og verður gengið það-
an að Tröllagíg og niður að Vota-
bergi. Þetta er um 3 – 4 tíma
ganga. Fararstjóri er Gestur Krist-
jánsson. Verð kr 1.500/1.800. Brott-
för frá BSÍ kl. 10.30 með viðkomu í
Mörkinni 6, segir í fréttatilkynn-
ingu.
Gönguskíðaferð
KVENNALANDSLEIKUR í skák
mun fara fram á Netinu milli Íslands
og Noregs sunnudaginn 24 febrúar
kl. 18 í Turninum í Ráðhúsi Garða-
bæjar (7 hæð). Keppnin er haldin í
samvinnu Skáksambandsins og Tafl-
félags Garðabæjar. Leikurinn ber
nafnið Hreint loft. Teflt verður í
gegnum skákþjóninn www.chess-
club.com.
Við upphaf landsleiksins hefst á
sama stað einvígi bæjarstjórans í
Garðabæ, Ásdísar Höllu Bragadótt-
ur og Guðlaugar Þorsteinsdóttur,
fyrrverandi Norðurlandsmeistara.
Þær munu tefla tvær skákir.
Reyklaus.is og Garðabær bjóða
öllum sem áhuga hafa á landsleikinn
og vilja með leiknum minna á mik-
ilvægi þess að hafa hreint loft. Skað-
semi óbeinna reykinga er eins og
menn vita mikil og hafa reyklaus.is
og TG tekið höndum saman til að
vinna gegn þeim, segir í fréttatil-
kynninu.
Kvenna-
landsleik-
ur í skák
LÖGREGLAN í Reykjavík lýsir
eftir ökumanni á blárri Mitsubishi
Colt bifreið sem stakk af frá vett-
vangi eftir að hafa valdið skemmd-
um á bifreið sem í var fatlaður öku-
maður og gat af þeim sökum ekki
komist út til að tala við ökumann
Coltsins. Atvikið átti sér stað á bif-
reiðastæði fyrir utan Mál og menn-
ingu í Síðumúla þann 8. febrúar sl.
kl. 16.
Tildrögin voru þau að hurð Colts-
ins var skellt utan í hægri hurð
hinnar bifreiðarinnar og var það
gert svo harkalega að skemmdir
hlutust af. Sá sem skemmdunum
olli fór af vettvangi án þess að gera
frekari grein fyrir sér þrátt fyrir að
honum mátti vera ljóst að skemmd-
ir hefðu orðið.
Coltinn er með númerinu OZ-395,
blár að lit. Sá sem þetta gerði eða
aðrir sem geta gefið frekari upplýs-
ingar eru beðnir að snúa sér til um-
ferðardeildar lögreglunnar í
Reykjavík.
Fatlaður ökumað-
ur skilinn eftir
með skemmdan bíl
HINN 20. febrúar sl. á tímabilinu frá
kl. 8 til 16.30 var ekið á bifreiðina
DZ-621, sem er Suzuki Baleno dökk-
græn fólksbifreið. Sá sem það gerði
fór af vettvangi án þess að tilkynna
það hlutaðeiganda eða lögreglu. Er
talið að þetta hafi átt sér stað annað
hvort við Bíldshöfða 12 eða Bónus-
verslunina við Spöng í Grafarvogi.
Tjónvaldur eða aðrir sem geta gefið
frekari upplýsingar eru beðnir að
snúa sér til umferðardeildar lögregl-
unnar í Reykjavík.
Lýst eftir vitnum
EKKI hefur tekist að upplýsa
skemmdarverk á fjórum bílum á
Hvolsvelli sem framin voru að
morgni sunnudagsins 10. febrúar
sl. Tveir þeirra eyðilögðust í eld-
inum. Einnig var borinn eldur að
sófa í sólstofu einbýlisshúss og
hleypt úr dekkjum á jeppa.
Gils Jóhannsson varðstjóri biður
alla þá sem búa yfir upplýsingum
um málið að hafa samband við lög-
reglu. Allar ábendingar sem hugs-
anlega geta komið að gagni við
rannsókn málsins eru vel þegnar.
Upplýsingar vegna
brennuvarga
SÝNIKENNSLA verður haldin hjá
Salon Veh í Húsi verslunarinnar
mánudaginn 25. febrúar kl. 9 – 13 á
hárlínum sem kynntar voru í París
um síðustu helgi. Allir eru velkomn-
ir.
Leiðbeinendur eru Elsa Haralds
og Kristjana Guðmundsdóttir.
Upplýsingar og skráning er á net-
fanginu salonveh@islandia.is.
Sýnikennsla
á hárlínum
NEMENDUR í hagnýtri fjölmiðlun
við Háskóla Íslands munu reka há-
skólaútvarp vikuna 25. febrúar til 2.
mars. Útvarpið hefur verið árviss
viðburður undanfarið sem hluti af
námskeiðinu ljósvakamiðlun en þar
læra nemendur vinnubrögð við
hljóðvarp og sjónvarp. Heiti út-
varpsins í ár er Stúdvarp og verður
útsendingartíðni FM 89,0.
Hópur sautján nemenda skiptir
með sér verkum við dagskrárgerð
og tæknistjórn en útsendingar
verða á tímabilinu kl. 10-17 alla
dagana. Meðal efnis Stúdvarpsins
má nefna fréttir á fjórum tungu-
málum, málfarspistlana Ambögur
dauðans, ítarlega umfjöllun um
ýmsar tónlistarstefnur auk viðtals-
og fræðsluþátta um íþróttir, stúd-
entapólitík, kynferðisafbrot o.fl.
Dagskrána má finna á heimasíðu
Stúdvarpsins, www.heimanet.is/
studvarp.
Hagnýt fjölmiðlun er starfsmiðað
viðbótarnám ætlað þeim sem stefna
á fjölmiðlastörf. Námið tekur að
jafnaði eitt ár en umsækjendur
skulu hafa grunnháskólapróf eða
reynslu af fjölmiðlastörfum, segir í
fréttatilkynningu.
Stúdvarp FM 89,0
MÁLSTOFA verður haldin á veg-
um Rannsóknarstofnunar í hjúkr-
unarfræði mánudaginn 25. febrúar
kl. 12.15 í stofu 6 á 1. hæð í Eir-
bergi, Eiríksgötu 34. Málstofan er
öllum opin.
Guðrún Kristjánsdóttir prófessor
og Helga Bragadóttir, hjúkrunar-
fræðingur MS, sviðsstjóri við LSH,
flytja fyrirlesturinn: Rannsókn á
ánægju foreldra og þörfum þeirra á
Barnaspítala Hringsins. Greint
verður frá fyrstu niðurstöðum rann-
sóknar á þörfum foreldra, upplifun
þeirra á því hvernig þörfum þeirra
er mætt á barnadeildum LSH og
ánægju þeirra með heilbrigðisþjón-
ustuna á deildinni, segir í frétta-
tilkynningu.
Málstofa í
hjúkrunarfræði