Morgunblaðið - 06.09.2002, Qupperneq 14

SUMARIÐ hefur verið heldur enda-
sleppt hjá þeim félögum Júlíusi
Tryggvasyni og Hlyni Jóhannssyni
knattspyrnumönnum í KA. Í stað
þess að berjast með félögum á
knattspyrnuvellinum hafa Júlíus og
Hlynur barist við að ná aftur heilsu
eftir smávægilegar hnéaðgerðir
fyrr í sumar á Fjórðungssjúkrahús-
inu á Akureyri. Báðir fengu þeir
sýkingu í hnéð tveimur dögum eftir
aðgerðirnar og hafa þeir þurft að
liggja í rúma 40 daga á sjúkrahús-
inu í kjölfarið, Júlíus í 25 daga og
Hlynur í 16 daga.
Júlíus sagði að svona hnéspeglun
eins og hann og Hlynur fóru í, væri
ekki stór aðgerð og hefði aðeins átt
að halda þeim frá fótboltanum í 10–
14 daga. Hins vegar hafi hann þurft
í fjórar aðgerðir til viðbótar eftir að
sýkingin kom upp og Hlynur í þrjár
aðgerðir til viðbótar. Hlynur fór í
aðgerð 28. júní en Júlíus 23. júlí sl.
Hvorugur hefur getað hafið æfing-
ar, Júlíus gengur enn við hækjur og
getur ekki sinnt vinnu en Hlynur
var frá vinnu í heilan mánuð sumar.
„Þetta hefur komið sér mjög illa, ég
er í námi og ætlaði að nota sumarið
til að afla mér tekna,“ sagði Hlynur.
Gæti skrifað heila bók
um mína sjúkrasögu
Aðspurðir um af hverju þessi
sýking hefði komið upp, sögðu þeir
félagar, að fátt hefði verið um svör
en talað um að þar hefðu áhrif
margir samverkandi þættir. Þeim
væri þó ljóst að skurðaðgerð fylgdi
ákveðin hætta „en maður gerði sér
ekki grein fyrir því hversu alvar-
legt það er að fá sýkingu,“ sagði
Hlynur. „Það er líka alveg sár-
grætilegt að hafa misst af fótbolt-
anum í sumar, ég ætlaði rétt að
skjótast í þessa aðgerð og hlaupa
svo út af sjúkrahúsinu aftur,“ sagði
Júlíus.
Enn liggur ekki ljóst fyrir hvern-
ig þeim félögum reiðir af eftir sum-
arið en báðir eru þeir ýmsu vanir
og hafa fengið sinn skammt af
meiðslum í gegnum tíðina. „Ég gæti
skrifað heila bók um mína sjúkra-
sögu,“ sagði Júlíus, sem hefur leik-
ið með Þór, Leiftri, Stryn í Noregi
og KA. Hlynur hefur einnig komið
víða við og leikið með Víði, Kefla-
vík, Leiftri og KA.
Þessi atvik hafa komið illa við þá
félaga fjárhagslega og sagði Júlíus
að tryggingamálin væru hreinn
frumskógur og því alls óvíst hvern-
ig þau mál enduðu. KA-menn hafa
staðið sig vel á knattspyrnuvell-
inum í sumar og framundan er leik-
ur í undanúrslitum bikarkeppn-
innar gegn Fylki. Hlynur og Júlíus
verða þá að gera sér að góðu að
sitja uppi í stúku, eins og lengst af í
sumar „en við verðum bara klárir í
Evrópukeppnina á næsta ári,“ sagði
Hlynur.
Tveir knattspyrnumenn í KA fengu sýkingu eftir smávægilegar hnéaðgerðir
Lágu á sjúkra-
húsi í samtals
um 40 daga
Morgunblaðið/Kristján
Júlíus Tryggvason, t.v., og Hlynur Jóhannsson halla sér upp að stöng
norðurmarksins á Akureyrarvelli. Þeir félagar hafa ekki getað leikið
knattspyrnu undanfarna mánuði og alls óvíst er með framhaldið.
AKUREYRI
14 FÖSTUDAGUR 6. SEPTEMBER 2002 MORGUNBLAÐIÐ
www.islandia.is/~heilsuhorn
Hver tafla inniheldur yfir
1 milljarð L-Bulgaris, L-Acido
og L-Bytidus.
PÓSTSENDUM
Glerártorgi, Akureyri, sími 462 1889.
Fæst m.a. í Lífsins lind í Hagkaupum,
Árnesapóteki, Selfossi og
Yggdrasil, Kárastíg 1.
Nauðsynlegt fyrir
góða meltingu
FULLTRÚAR Samfylkingar og
L-lista gagnrýndu fyrirtækið
Mannafl, sem sá um að fara yfir og
greina umsóknir um stöðu deild-
arstjóra íþrótta- og tómstunda-
mála, á fundi bæjarstjórnar fyrr í
vikunni.
Ágúst Hilmarsson á L-lista
sagði þar að menn hefðu ekki
kynnt sér gögn umsækjenda til
fulls. „Það er alvarlegt að viður-
kennt ráðgjafafyrirtæki beri á
borð fyrir íþrótta- og tómstunda-
ráð gögn þar sem allt er ekki alls
kostar rétt,“ sagði Ágúst. Oktavía
Jóhannesdóttir, Samfylkingu,
sagði í Morgunblaðinu í gær að
rangar upplýsingar hefðu fylgt
gögnum en þær lúta að menntun
þess sem hlaut stöðuna.
Alls sóttu 34 um starfið og voru
4 valdir úr þeim hópi í starfsviðtal,
en þar af voru 3 taldir hæfastir;
Kristinn Svanbergsson, Soffía
Gísladóttir og Viðar Sigurjónsson.
Minnihluti íþrótta- og tóm-
stundaráðs gerði að tillögu sinn að
Soffía yrði ráðin í stöðuna, eftir
skoðun á greinargerð Mannafls um
hæfi umsækjenda og að teknu til-
liti til krafna sem settar voru fram
í auglýsingu um starfið og með
hliðsjón af jafnréttisáætlun bæj-
arins. Meirihlutinn greiddi Kristni
atkvæði sitt.
Samkvæmt auglýsingu um starf-
ið voru þær kröfur gerðar til um-
sækjenda að þeir hefðu menntun
sem nýttist í starfi, reynslu af
stjórnun og rekstri, þekkingu á
málaflokknum og hæfni í mann-
legum samskiptum.
Í greinargerð Mannafls kemur
fram að Kristinn hefur lokið námi í
íþróttafræði við Bosön íþróttahá-
skólann í Svíþjóð, Soffía er með
B.A.-próf í uppeldis- og mennt-
unarfræði frá HÍ og Viðar B.Ed.-
próf frá Kennaraháskóla Íslands
en að auki hafa öll lokið ýmsum
námskeiðum.
Gagnrýni Oktavíu og Ágústs
beinist að því að nám Kristins hafi
verið á lýðskólastigi og hafi þeir
sem fóru yfir umsóknir lagt það að
jöfnu t.d. við fjögurra ár nám við
hinn virta Íþróttaháskóla í Köln í
Þýskalandi. Slíkt sé fráleitt.
Jón Birgir Guðmundsson fram-
kvæmdastjóri Mannafls á Akur-
eyri sagðist ekki geta tjáð sig um
málið og hann kvaðst ekki skilja
hvernig fyrirtækið hefði blandast
inn í þessa umræðu.
Samfylking og L-listi
gagnrýna Mannafl
Segja gögn
um mennt-
un ekki rétt
MIKLAR umræður hafa verið að
undanförnu um hugsanlega sam-
einingu Norðurorku á Akureyri,
RARIK og Orkúbú Vestfjarða í eitt
orkufyrirtæki og sýnist sitt hverjum.
Franz Árnason, framkvæmdastjóri
Norðurorku á Akureyri, segir það
sína skoðun að það skipti öllu máli
fyrir Akureyringa hvert endanlegt
verðmat Norðurorku verður miðað
við hin fyrirtækin í því verðmætamati
sem nú fer fram á fyrirtækjunum.
Það er skoðun Franz að verðmæti
Norðurorku sé að lágmarki 40% af
samanlögðu verðmæti fyrirtækjanna
þriggja. Þessa skoðun sína byggir
hann að sögn á könnunum á verð-
mæti fyrirtækjanna sem Norðurorka
hefur látið gera og á öðrum fyrirliggj-
andi upplýsingum um málið.
„Það er jafnframt nauðsynlegt að
tryggja að ríkissjóður verði ekki
meirihlutaeigandi í nýju fyrirtæki og
er eðlilegt að Akureyringar taki það
hlutverk að sér. Þetta mundi tryggja
að höfuðstöðvar fyrirtækisins verði á
Akureyri. Þá þarf að sjá til þess við
stofnun slíks fyrirtækis að ekki þurfi
að hækka raforkuverð á Akureyri
vegna þess.“ Franz sagði ekki rétt að
gera að því skóna að mikið af nýjum
störfum flytjist til Akureyrar þótt
höfuðstöðvar nýs fyrirtækis yrðu þar.
Spurður um samlegðaráhrif samein-
aðs fyrirtækis sagði Franz að þau
yrðu einhver en að menn yrðu lítið
varir við þau áhrif í raforkutöxtunum.
Umhverfi raforkufyrirtækja
þarf að vera ljóst
„Til þess að fá rétt verðmat á þessi
fyrirtæki tel ég eðlilegast að bæði
RARIK og Norðurorka verði gerð að
hlutafélögum. Þá er hægt að fá fram
markaðsvirði þeirra vilji eigendur
það. Einnig er líka nauðsynlegt, áður
en hugsanlegt fyrirtæki verður til, að
ríkið taki af öll tvímæli um það hvert
framlag þess til jöfnunar raforku-
verðs í landinu eigi að vera. Að auki
verður umhverfi raforkufyrirtækja
að vera ljóst,“ sagði Franz. Fyrir Al-
þingi liggur frumvarp til nýrra raf-
orkulaga, sem felur í sér töluverðar
breytingar á lagalegu umhverfi orku-
fyrirtækja. Franz sagði í það minnsta
óheppilegt að stofna til nýs fyrirtækis
fyrr en sá lagarammi liggi fyrir. Þeg-
ar hefur verið ákveðið að breyta
Norðurorku í hutafélag og fyrir Al-
þingi liggur frumvarp um að breyta
RARIK í hlutafélag.
Franz sagði það sína skoðun þrátt
fyrir þær hugmyndir sem nú eru
uppi, að Norðurorka sé ein og sér
ágætis rekstrareining og komi til með
að standa sig ágætlega, þótt lagaum-
hverfi orkufyrirtækja taki einhverj-
um breytingum.
Páll Tómasson, stjórnarformaður
Norðurorku, sagði að sérstakur
starfshópur væri með málefni fyrir-
tækjanna í vinnslu. Starfshópurinn
muni skila af sér skýrslu um málið,
sem byggist á verðmætamati fyrir-
tækjanna frá ráðgjafafyrirtækinu
Deloitte&Touche. Páll sagði að stjórn
Norðurorku hefði ekki tekið málið til
efnislegrar meðhöndlunar en muni að
sjálfsögðu gera það þegar skýrslan
liggi fyrir. „Hins vegar er ljóst að það
er stefna Norðurorku að bjóða eitt
lægsta raforkuverð landsins til heim-
ila og atvinnulífs í sveitarfélaginu.“
Sitt sýnist hverjum
um ágæti sameiningar
Öll fyrirtækin þrjú voru rekin með
tapi á síðasta ári. Heildartekjur
RARIK á síðasta ári námu um 5,3
milljörðum króna en tap á rekstrin-
um nam um 380 milljónum króna.
Tekjur Norðurorku námu um 1.250
milljónum króna í fyrra en tap á
rekstrinum nam 28 milljónum króna.
Heildartekjur Orkubús Vestfjarða
voru um 920 milljónir króna í fyrra og
nam tap á rekstrinum tæpum 113
milljónum króna.
Eins og áður er getið sýnist sitt
hverjum um ágæti þess að sameina
fyrirtækin þrjú. Fjórðungsþing Vest-
firðinga, sem haldið var í Bolungarvík
um síðustu helgi, skoraði á iðnaðar-
og viðskiptaráðherra að falla frá
áformum sínum um sameiningu
RARIK, Orkubús Vestfjarða og
Norðurorku með höfuðstöðvar á Ak-
ureyri. „Nái þessi áform ráðherra
fram að ganga má telja líklegt að
störfum að orkumálum fækki á Vest-
fjörðum þrátt fyrir samkomulag við
ríkisstjórn Íslands um eflingu þess-
arar starfsemi í fjórðungnum,“ segir í
ályktun þingsins.
Þá skorar ársþing Sambands sveit-
arfélaga á Norðurlandi vestra á iðn-
aðarráðherra og þingmenn Norð-
vesturkjördæmis, að beita sér fyrir
því að sveitarfélögum á starfssvæði
RARIK verði tryggður 60% eignar-
hlutur í fyrirtækinu ef RARIK verð-
ur breytt í hlutafélag. Ársþingið lýsti
andstöðu sinni við að viðræður séu
hafnar um sameiningu RARIK,
Orkubús Vestfjarða og Norðurorku
án þess að fyrrgreindu skilyrði sé
fullnægt. Málið var einnig til umræðu
á aðalfundi Samtaka sunnlenskra
sveitarfélaga, þar sem Hjálmar
Árnason alþingismaður benti m.a. á
að Norðlendingar hefðu sýnt ákveðið
frumkvæði um að fá til sín höfuð-
stöðvar RARIK. Á fundinum var
samþykkt ályktun þar sem sveitar-
félög á starfsvæðinu og í kjördæminu
öllu eru hvött til að huga að samein-
ingu orkufyrirtækja í eitt öflugt fyr-
irtæki.
„Jafnframt verði hafnar viðræður
við ríkisvaldið um kaup á þeim hluta
RARIK sem starfandi er í nýju Suð-
urkjördæmi. Með þessu verði til sam-
eiginlegur öflugur bakhjarl íbúa og
atvinnulífs á Suðurlandi.“
Hins vegar varð það niðurstaðan á
aðalfundi Eyþings, Samtaka sveitar-
félaga í Eyjafirði og Þingeyjarsýslum
um síðustu helgi, að álykta ekki um
þetta mál.
Framkvæmdastjóri Norðurorku um hugsanlega
sameiningu þriggja orkufyrirtækja
Nauðsynlegt að tryggja
að ríkissjóður verði
ekki meirihlutaeigandi RÍKISKAUP hafa sent erindi til
kærunefndar útboðsmála og óskað
eftir því að kærunefndin staðfesti
þá skoðun Ríkiskaupa að tilboð Ís-
taks og Nýsis í byggingu rann-
sókna- og nýsköpunarhús við Há-
skólann á Akureyri sé ógilt.
Júlíus S. Ólafsson, forstjóri Rík-
iskaupa, sagði að þar á bæ teldu
menn að tilboð Ístaks væri ógilt út
frá sömu forsendum og lagðar
voru til grundvallar ógildingu til-
boðs frá Íslenskum aðalverktök-
um.
Júlíus sagði að í skipulagsskil-
málum væri áskilið að meginbygg-
ingar hússins væru 5–7 hæðir.
Eins og fram hefur komið bárust
tvö tilboð í bygginguna að und-
angengnu lokuðu forvali, annars
vegar frá Ístaki og Nýsi og hins
vegar Íslenskum aðalverktökum,
ISS á Íslandi og Landsafli. Sér-
stök valnefnd valdi tilboð ÍAV, ISS
og Landsafls. Í kjölfarið kærðu Ís-
tak og Nýsir útboðið til kæru-
nefndar útboðsmála.
Líflegt í lögfræðinni og
ekkert byggt á meðan
Kærunefndin lagði til í úrskurði
sínum að Ríkiskaup höfnuðu til-
boðinu sem varð fyrir valinu, sem
ógildu. Jafnframt var mat nefnd-
arinnar um bygginguna, á lausnum
í tilboðum bjóðenda fellt úr gildi.
Íslenskir aðalverktakar hafa í kjöl-
farið stefnt Ríkiskaupum, Ístaki
og Nýsi fyrir héraðsdóm til að
reyna að fá úrskurði kærunefndar
útboðsmála hnekkt.
„Það er mikið líf í lögfræðinni í
þessu en á meðan líður tíminn og
ekkert er byggt á meðan,“ sagði
Júlíus. Hann sagði óvíst hvað þetta
ferli tæki langan tíma en ef úr-
skurðarnefndin lýsti tilboð Ístaks
ógilt, gæti það flýtt ferlinu. Þá
gæti opnast möguleiki á nýju ferli,
þar sem einn kosturinn væri að
bjóða verkið út að nýju í einhverju
formi, eins og Júlíus orðaði það.
Bygging rannsókna-
og nýsköpunarhúss
við HA
Tilboð Ís-
taks ógilt
að mati
Ríkiskaupa