Morgunblaðið - 20.09.2002, Blaðsíða 13

AKUREYRI
MORGUNBLAÐIÐ FÖSTUDAGUR 20. SEPTEMBER 2002 13
UNDANFARNA daga hefur verið
unnið að því að setja þorskseiði
úr seiðaeldisstöð Útgerðarfélags
Akureyringa á Hauganesi út í
sjókvíar við Þórsnes, en í það
heila verða sett um þrjú þúsund
seiði í kvíarnar í ár. Seiðaeld-
isstöðin á Hauganesi tók við
þorskseiðum frá Hafrannsókn-
arstofnun í Grindavík á liðnum
vetri og hefur vöxtur þeirra verið
mjög góður og samkvæmt áætl-
unum, segir á heimasíðu ÚA.
Reiknað er með að ný seiði komi
í stöðina eftir um það bil einn
mánuð.
Gert er ráð fyrir að taka um
fimmtán þúsund seiði í stöðina,
sem er meira en tvöföldun frá því
í vetur. Einhverjum tugum tonna
af þorski og ýsu úr sjókvíunum
verður slátrað fyrir jól. ÚA er
með 50–60 tonn af þorski í kvíun-
um og 30–40 tonn af ýsu. Þetta
er fiskur sem hefur verið í eldi í
sjókvíunum frá því í vor og sum-
ar og hefur hann dafnað vel.
Þorskurinn er fóðraður á heilli
loðnu en ýsan er fóðruð á þurr-
fóðri, að sögn Óttars Más Ingva-
son, verkefnisstjóra fiskeldis hjá
ÚA.
Morgunblaðið/Kristján
Starfsmenn ÚA vinna við að setja þorskseiði úr seiðaeldisstöðinni á Hauganesi í sjókvíar við Þórsnes norðan
Akureyrar. Skammt frá landi dólar trillukarl á báti sínum með veiðistöng að vopni.
Þorskseiði úr seiðaeld-
isstöð ÚA í sjókvíar
ATVINNUÞRÓUNARFÉLAG
Eyjafjarðar, AFE, vinnur nú að
markaðssetningu fyrirtækja í Eyja-
firði vegna fyrirhugaðra stóriðju-
framkvæmda á Austurlandi. Í
tengslum við það verkefni verður
farin kynnisferð austur á land á
vegum AFE, í dag, föstudag 20.
september, til að skoða fyrirhug-
aðar stóriðjuframkvæmdir eystra.
Farið verður beint upp að Kára-
hnjúkum þar sem þær framkvæmd-
ir verða kynntar en eftir hádegi
verður farið að álverslóðinni í Reyð-
arfirði.
Síðastliðinn vetur var haldinn
kynningarfundur á Akureyri um
fyrirhugaðar stóriðjuframkvæmdir
á Austurlandi. Eitt af markmiðum
fundarins var að hvetja fyrirtækin
á svæðinu til að nýta sér þau tæki-
færi sem fyrirhugaðar stórfram-
kvæmdir munu hafa og undirbúa
sig undir þau víðtæku áhrif sem
fylgja í kjölfarið. Á tímabili var
óljóst hvert stefndi með fram-
kvæmdirnar en nú er undirbúning-
ur aftur kominn á fullt og miðast
verkefnið nú við álver Alcoa. Þetta
kemur fram á heimasíðu AFE.
Stóriðjuframkvæmdir
á Austurlandi
Eyfirskir
verktakar í
kynnisferð
STARFSEMI endurhæfingardeild-
ar FSA á Kristnesi er nú komin í
fullan gang að nýju eftir lokun síðla
sumars. Um eitt hundrað manns eru
á biðlista með meðferð á deildinni
um þessar mundir.
Nú nýlega hófst á deildinni starf-
semi svonefnds verkjaskóla, sem
ætlaður er fólki sem haldið er lang-
varandi verkjum af ýmsu tagi, en
bakverkir eru algengasta vanda-
málið sem fólk á við að etja. Talið er
að í hópi þeirra eitt hundrað manna
sem eru á biðlista geti verkjaskólinn
gagnast um 75 þeirra. Áætlað er að
tveir 6–7 manna hópar verði útskrif-
aðir úr verkjaskólanum fram til jóla
og að starfseminni verði svo haldið
áfram eftir áramót að því er fram
kemur á heimasíðu Fjórðungs-
sjúkrahússins á Akureyri. Þeir sem
sækja verkjaskólann koma af stóru
svæði, frá Skagafirði og að Vopna-
firði í austri, auk þess sem þess eru
dæmi að fólk búsett á Austfjörðum
sæki meðferð á endurhæfingardeild
FSA. Verkjaskóli hefur gefið góða
raun á Reykjalundi, en hefur ekki
verið settur upp á Kristnesi áður.
Endurhæfingardeild
FSA á Kristnesi
Verkjaskóli
gæti nýst
fólki á
biðlista
♦ ♦ ♦