Morgunblaðið - 12.06.2003, Blaðsíða 16

HÖFUÐBORGARSVÆÐIÐ
16 FIMMTUDAGUR 12. JÚNÍ 2003 MORGUNBLAÐIÐ
www.markid.is • Sími: 553 5320 • Ármúla 40
®
FRAMKVÆMDUM í Bankastræti
lýkur á næstu dögum. Höskuldur
Tryggvason á framkvæmdadeild
gatnamálastofu segir að verkið sé
unnið í tveimur áföngum. „Fyrri
áfanganum, sem nær frá Ingólfs-
stræti niður undir Skólastræti, á að
ljúka fyrir 17. júní. Síðari áfang-
anum, það er neðri hluti Banka-
strætis, meðfram Lækjargötu og út
á Hverfisgötu, á að vera lokið um
miðjan ágúst,“ segir hann. Hann
leggur áherslu á að framkvæmd-
irnar muni á engan hátt raska hefð-
bundnum hátíðarhöldum á þessu
svæði. „Endurbótum á Bergstaða-
stræti og Vegamótastíg verður
jafnframt lokið fyrir 17. júní.“
Signý Lind Heimisdóttir, versl-
unarstjóri í Hans Petersen í Banka-
stræti, segir að vissulega hafi fram-
kvæmdirnar haft áhrif á viðskiptin
en þó minna en hún hafi átt von á.
Hún segir að það verði allt annað líf
þegar þeim verði lokið, en telur
jafnframt að ótrúlegt sé að það tak-
ist að ljúka framkvæmdunum á til-
skildum tíma. Hún undirstrikar að
þetta sé afar vel gert hjá verk-
aðilum og aðgengilegt sé fyrir fólk
að komast leiðar sinnar.
Morgunblaðið/Júlíus
Fyrsta áfanga lokið fyrir 17. júní
Miðborg
BORGARRÁÐ staðfesti á fundi sín-
um á þriðjudag tillögu fræðsluráðs
um aukið framlag til einkaskóla.
Ennfremur samþykkti borgarráð að
fela borgarstjóra að ganga til samn-
inga við forráðamenn Ísaksskóla og
Tjarnarskóla um þátttöku borgar-
innar í að greiða niður að hluta upp-
safnaðan rekstrarvanda þessara
skóla. Borgarráð felur einnig borg-
arstjóra að ganga til samninga við
einkarekna grunnskóla um hækkun á
framlagi borgarinnar með fimm ára
börnum.
Í greinargerð er fylgdi tillögunni
segir að uppsafnaður rekstrarvandi
Ísaksskóla sé verulegur og þrátt fyr-
ir góða viðleitni forráðamanna skól-
ans sé ljóst að borgin verði að taka
þátt í að greiða upp skuldir hans eigi
þær ekki að valda verulegum rekstr-
arvandræðum. Er borgarstjóra falið
að gera tillögu til borgarráðs um upp-
hæð og fyrirkomulag styrks sem miði
að því að sameiginlegt framlag skól-
ans og borgarinnar nægi til að létta
þessum vanda af skólanum. Einnig
er talið að málefni Tjarnarskóla verði
könnuð með svipuðum hætti.
Þá segir að ljóst sé að framlag með
fimm ára börnum í einkareknum
grunnskólum þurfi að hækka til að
standa undir rekstrarkostnaði.
Samningur þar að lútandi verði end-
urskoðaður samtímis því að borgin
taki á uppsöfnuðum rekstrarvanda.
Mikilvægt að marka framsýna
tillögu til lengri tíma
Borgarráðsfulltrúar Sjálfstæðis-
flokks vísuðu til bókunar fulltrúa
flokksins í fræðsluráði, þar sem þeir
gagnrýndu meðal annars að fulltrúar
Reykjavíkurlistans hafi ekki fallist á
að greiða sambærilegt fjármagn með
hverjum nemanda óháð því hvort
hann gangi í einkarekinn eða borgar-
rekinn grunnskóla. Þá segir að til-
laga fræðsluráðs staðfesti það sem
fulltrúar Sjálfstæðisflokksins hafi
haldið fram að auka þurfi fjárframlög
til einkaskóla og er þeim áfangasigri
fagnað. Fulltrúarnir gagnrýna hve
tillagan hafi verið lögð seint fram og
segja að það hafi sett mark sitt á
starfið í skólunum sem annars eigi að
einkennast af bjartsýni og gleði í lok
skólaársins. Þá sé mikilvægt að
marka framsýna tillögu til lengri
tíma þar sem tryggt sé að nemendum
verði ekki mismunað eftir því hver
rekstraraðili skólans sé.
Fulltrúar Reykjavíkurlistans í
fræðsluráði lögðu fram bókun þess
efnis að með tillögum sínum í
fræðsluráði og greinargerð um mál-
efni svonefndra einkaskóla hafi
Reykjavíkurlistinn tekið ábyrga af-
stöðu með skýra heildarsýn. Rekstur
einkaskóla sé tryggður með sann-
gjörnum hætti en um leið sé ítrekuð
sú afstaða að meginskylda borgar-
innar felist í almennu grunnskóla-
kerfi og jafnrétti allra til náms.
Borgin greiði niður
hluta rekstrarvandans
Reykjavík
AUÐHUMLA, félag mjólkurfram-
leiðenda í Eyjafirði og Þingeyjar-
sýslu, greiddi í síðasta mánuði um-
samið kaupverð á 67% hlut Kaldbaks
ehf. í Norðurmjólk en skrifað var
undir kaupsamninginn í fyrrasumar.
Hins vegar hefur ekki verið gengið
frá greiðslu vaxta frá kaupdegi til
greiðsludags og þar greinir aðila
máls á, að sögn Stefáns Magnússonar
formanns stjórnar Auðhumlu og er
sá þáttur málsins fyrir gerðardómi.
Kaupverð Auðhumlu og sam-
starfsaðila í mjólkuriðnaði á 67%
hluta Kaldbaks er rúmar 550 millj-
ónir króna en fyrir átti félagið þriðj-
ungs hlut í Norðurmjólk. Ekki náðist
samkomulag um verðmæti Norður-
mjólkur í upphafi og meirihluti sér-
staks gerðardóms mat heildarverð-
mæti félagsins á 824 milljónir króna.
Áður höfðu dómkvaddir matsmenn
komist að því að heildarverðmæti
Norðurmjólkur væri 931 milljón
króna, eða 107 milljónum króna
meira. Forsvarsmenn Kaldbaks
sættu sig ekki við niðurstöðu mats-
mannanna og töldu verðmæti félags-
ins meira. Málið fór því fyrir gerð-
ardóm og var niðurstaða hans
heildarverðmæti upp á 824 milljónir
króna, bindandi fyrir báða aðila.
Kaldbakur fékk því mun minna verð
fyrir sinn hlut en forsvarsmenn fé-
lagsins vonuðust eftir.
Auðhumla á nú 40% í Norðurmjólk
eftir að hafa selt 60% hlut til sam-
starfsaðila sinna, Mjólkursamsalan á
16%, Mjólkurbú Flóamanna 16%,
KEA 13%, Osta- og smjörsalan 12%
og KS 3%.
Stefán Magnússon sagði að ýmsar
hugmyndir væru uppi um breytingar
á rekstri Norðurmjólkur en engar
ákvarðanir hafi verið teknar í þeim
efnum. Sjálfur rekstur félagsins
hefði gengið vel en menn væru að
burðast með erfið fjármagnsgjöld.
„Það verður byrjað á því að gera
reksturinn í dag eins hagkvæman og
frekast er unnt. Síðan verður hægt
að gera reksturinn enn hagstæðari
með frekari samvinnu og verkaskipt-
ingu innan mjólkuriðnaðarins. Miðað
við það sem er að gerast í mjólkuriðn-
aðinum í nágrannalöndunum hlýtur
stefnan hér að vera sú að sameina
enn frekar mjólkursamlögin hér á
landi. Þar erum við reyndar komin
inn á samkeppnismál og því ekki séð
fyrir endann á þeim málum,“ sagði
Stefán.
Auðhumla hefur greitt fyrir 67% hlut
Kaldbaks í Norðurmjólk
Kaupverðið
rúmar 550
milljónir króna
TÆKNIVÆÐING í hinum ýmsu
greinum sjávarútvegs er í mikilli
þróun, ef marka má upplýsingar
sem fram komu í máli sérfræðinga
sem voru á málþingi sem haldið var
í matsal ÚA í vikunni. Þar komu
meðal annars fram áhugaverðar
upplýsingar um nýjustu hugmyndir
um fiskiskip, veiðitækni, fiskeldi og
kræklingaeldi.
Þar voru fjórir sérfræðingar á
sviði nýsköpunar í sjávarútvegi og
fiskeldi frá Sintef Fiskeri og Hav-
bruk, Karl A. Almås, Håvard Røs-
vik, Marit Aursand og Jostein Stor-
oy.
Sintef er stærsta rannsóknar-
stofnun Noregs og sú þriðja
stærsta í Evrópu, með 1.700 starfs-
menn og veltu upp á 18 milljarða.
Sintef Fiskeri og Havbruk starfar á
sviði sjávarútvegs og skiptist starf-
semin í fimm deildir, líftækni,
skipa- og veiðitækni, framleiðslu-
tækni, eldistækni og strand- og haf-
tækni.
Karl A. Almås, forstjóri Sintef
Fiskeri og Havbruk, sagði að
ástæðan fyrir því þau væru stödd
hér væri sú að staða Akureyrar í
fiskiðnaði væri ein sú besta í Norð-
ur-Evrópu. „Rannsóknarstofan okk-
ar er aðeins fjögurra ára gömul en
samt höfum við þróað mikið af
nýrri tækni fyrir iðnaðinn og því
var ákveðið að koma til Akureyrar,
kynna starfsemi okkar og sýna
hvað við höfum verið að gera. Von-
andi mun langtímasamstarf skapast
af þessari heimsókn á milli Sintef
Fiskeri og Havbruk, Háskólans á
Akureyri og fyrirtækja.“ Karl sagði
að sér litist mjög vel á það sem Ís-
lendingar hafa verið að gera í sjáv-
arútvegi, að við séum tæknilega séð
mjög framarlega og að skilvirknin í
greininni sé mjög góð. „Ég held oft
fyrirlestra í Noregi og segi hlust-
endum að fylgjast með Íslending-
um, stefnu þeirra og framgöngu á
alþjóðamarkaði. Það sem vantar í
Noregi er að hafa jafn góða stefnu
og er hér á landi.“
Guðbrandur Sigurðsson, fram-
kvæmdastjóri ÚA, sagði sér hefði
litist vel á margt sem norsku sér-
fræðingarnir höfðu fram að færa.
„Það sem getur skipt sköpum fyrir
Íslendinga er yfirfærslan úr olíu-
iðnaðinum yfir í hönnun á sjókvíum,
því þar er mikil reynsla sem hefur
safnast saman og hluti af henni er
nú að koma til baka í fiskeldið. Það
er nauðsynlegt að fylgjast vel með
og skoða hvað verið er að gera í
þessum málum.“
Morgunblaðið/Kristján
Norsku gestirnir sem fluttu erindi á málþingi Brims. F.v.: Karl A. Almås,
Jostein Storoy, Håvard Rösvik og Marit Aursand.
Málþing um rann-
sóknir og nýsköpun
AKUREYRI