Morgunblaðið - 25.05.2004, Page 19

HÖFUÐBORGARSVÆÐIÐ
MORGUNBLAÐIÐ ÞRIÐJUDAGUR 25. MAÍ 2004 19
VINNA við gerð nýs leiðakerfis
strætisvagna á höfuðborgarsvæðinu
gengur vel, að sögn Ásgeirs Eiríks-
sonar, fram-
kvæmdastjóra
Strætó bs. Gert
er ráð fyrir að
nýja kerfið verði
tekið í notkun í
ágúst í sumar,
þannig að aðeins
eru um tveir mán-
uðir þar til miklar
breytingar verða
á almennings-
samgöngum á höfuðborgarsvæðinu.
Ásgeir segir mikla áherslu hafa verið
lagða á að hafa samráð við íbúa og
ýmsa hagsmunaaðila við útfærslu
leiðakerfisins. „Við höfum kynnt til-
lögur okkar og haft samráð við al-
menning og sveitarstjórnirnar. Bæði
höfum við haldið opna fundi og óskað
eftir ábendingum á heimasíðu okkar,
www.bus.is. Við gerum ráð fyrir því
að kerfið taki á sig endanlega mynd á
næstu tveimur til þremur vikum,“
sagði Ásgeir í samtali við Morgun-
blaðið.
Ásgeir segir nokkrar breytingar
verða frá þeim hugmyndum sem nú
má sjá á heimasíðunni. „Við vildum
einmitt fá viðbrögð og hugmyndir að
breytingum, og erum nú að vinna úr
þeim. Ekki verður um grundvallar-
breytingar að ræða, en þess í stað
fara leiðir um aðrar götur eða taka á
sig lítilsháttar króka,“ útskýrir Ás-
geir. Sem dæmi nefnir hann að
ákveðið hafi verið að láta leið, sem
átti að enda ferð sína í Kringlunni,
fara niður Sléttuveg og enda ferð
sína þar, og þjóna þar með því svæði
í leiðinni. „Breytingar af þessu tagi
eru minniháttar, en bæta nýtingu
leiðarinnar án þess að ferðinni
seinki.“
Kerfið einfaldað og frekar
ekið á stærri götum
Meginhugsun leiðakerfisins er að
sex stofnleiðir, leiðir 1 til 6, gangi
einungis á stofnbrautum gatnakerf-
isins og séu fljótar í ferðum á milli
helstu borgarhverfa. Þar til viðbótar
komi leiðir sem fari í gegnum íbúða-
hverfi, en þó helst ekki um götur þar
sem hámarkshraði er 30 kílómetrar
á klukkustund eða mikið er um
hraðahindranir. Einnig er gert ráð
fyrir auknum forgangi strætisvagna
í umferðinni. „Þessar grunnreglur
eru til þess ætlaðar að auðvelda ferð
vagnanna og stytta ferðatímann. Við
gerum okkur hins vegar grein fyrir
því að í einhverjum tilvikum lengist
leið íbúa frá heimili að biðstöð vagna,
en það er óhjákvæmilegt ef ná á að
auka afköst og virkni kerfisins. Á
móti kemur að þjónusta batnar og
ferðatími styttist,“ segir Ásgeir.
Ráðgera aukinn
sveigjanleika í áætluninni
Mun sveigjanlegri tímatafla er
ráðgerð með nýja leiðakerfinu, til
dæmis fleiri ferðir á álagstímum.
„Með þeim hætti náum við að koma
betur til móts við notendur vagn-
anna og stuðla að enn betri þjónustu.
Á álagstímum munu stofnleiðirnar
ganga á 10 mínútna fresti.“
Eins og áður kom fram er með-
vitað hugsað til þess í hönnun nýja
leiðakerfisins að láta leiðirnar helst
ekki ganga innan svonnefndra 30
kílómetra hverfa. Þar má nefna að
ekki er gert ráð fyrir að strætisvagn
gangi inn í Hlíðahverfi eða Teiga-
hverfi í nýja kerfinu.
„Við höfum þrátt fyrir þessa
stefnu haft í huga göngufjarlægðir
íbúa frá heimili að biðstöð, og er nú
miðað við 300 til 700 metra fjarlægð.
Styst verður á biðstöð í þéttbýlustu
hverfunum en í einbýlishúsabyggð
verður vegalengdin nokkuð lengri.“
Að sögn Ásgeirs er allt kapp lagt á
að skapa raunhæfan valkost fyrir
íbúa höfuðborgarsvæðisins hvað
varðar almenningssamgöngur.
„Við gerð nýja kerfisins höfðum
við hinn almenna notanda í huga,
ekki einungis þá sem ekki hafa tök á
að nýta sér önnur farartæki. Við ger-
um okkur grein fyrir því að til þess
að fá fleiri til að nýta sér strætó þarf
ferðatíminn að vera lágur og kerfið
að vera skilvirkt. Rannsóknir okkar
benda til þess að notendur vilji
ganga örlítið lengra í strætó til að
eiga styttri ferð fyrir höndum. Þetta
snýst um viðhorf, og almenningur
þarf að gefa þessum samgöngumáta
tækifæri.“
Miðast við þarfir sem flestra
Ekki er miðað sérstaklega við
þarfir einstakra hópa í samfélaginu
við hönnun nýja leiðakerfisins. „Við
erum að skapa nýtt almenningssam-
göngukerfi sem á að miðast við þarf-
ir sem flestra. Það er hins vegar
ákveðið framtíðarviðfangsefni fyrir
okkur að koma til móts við þá not-
endur sem telja nýja kerfið henta sér
verr en núverandi kerfi. Það er til
dæmis augljóst að gönguvegalengd
að biðstöð mun lengjast á nokkrum
stöðum,“ segir Ásgeir. Til grundvall-
ar staðsetningu nýrra biðstöðva hef-
ur verið notað ákveðið hermilíkan
sem bæði tekur til ferðatíma í vagni
og til og frá biðstöðinni, sem og
ferðavenjukönnun sem framkvæmd
var fyrir tveimur árum. Segir Ásgeir
nýja leiðakerfið taka mið af þessari
könnun og með þeim hætti sé tryggt
að þjónusta batni með nýju kerfi.
Veigamestu
breytingar frá 1970
Leiðakerfi strætisvagna á höfuð-
borgarsvæðinu hefur tekið nokkrum
breytingum frá því að byggðasam-
lagið Strætó tók til starfa árið 2001,
en nú er loks gengið frá heildstæðu
leiðakerfi fyrir allt höfuðborgar-
svæðið. „Þetta eru miklar breyting-
ar, þær langmestu frá 1970, þegar
leiðakerfinu í Reykjavík var umbylt
og margar núverandi leiðir urðu til í
upprunalegri mynd. Í meginatriðum
verða sömu biðstöðvar notaðar
áfram, en eðlilega koma nýjar bið-
stöðvar á götur sem strætisvagnar
hafa ekki ekið áður, og aðrar leggj-
ast af í staðinn. Megin skiptistöðv-
arnar verða þær sömu. Hlemmur
verður aðalendastöð kerfisins, og
Lækjartorg aðeins viðkomustaður.
Við munum leggja áherslu á kynn-
ingu á nýja kerfinu, og munum til
dæmis búa til einfalt leiðakort fyrir
nýju leiðirnar og dreifa til almenn-
ings,“ segir Ásgeir að lokum.
Undirbúningsvinnu fyrir nýtt leiðakerfi nær lokið hjá Strætó bs.
Ekið helst um stofnbrautir
Morgunblaðið/Árni Torfason
Með nýju leiðakerfi sem taka á í notkun í ágúst munu strætisvagnar ganga síður í hverfum þar sem 30 km há-
markshraði er. Mun strætisvagn til dæmis hætta að ganga um Hamrahlíð.
Ásgeir Eiríksson
TENGLAR
.....................................................
www.bus.is
Vesturbær | Níundi bekkur V í
Hagaskóla ákvað á dögunum að
styrkja götubarnaheimili í Mós-
ambík um sextíu þúsund krónur, en
bekknum hlotnaðist féð í verðlaun í
samnorrænu stærðfræðikeppninni
KappAbel.
Bekkurinn tók í vetur þátt í Kapp-
Abel-keppninni, en í síðasta mánuði
réðust úrslit í Íslandshluta keppn-
innar og hafnaði 9.V í Hagaskóla í
þriðja sæti auk þess sem bekkurinn
var verðlaunaður sérstaklega fyrir
besta bekkjarverkefnið. Þema
keppninnar þetta árið var stærð-
fræði og tónlist og fjallaði bekkjar-
verkefni 9.V um tónlist á talnaás þar
sem sett var fram rannsóknarspurn-
ingin hvort fegurð stærðfræðinnar
endurspeglaðist í fegurð tónlistar.
Fyrir glæsilegan árangur í keppn-
inni fékk bekkurinn auk verðlauna-
skjala 60.000 krónur í verðlaun.
Verðlaunaafhending fór fram síð-
asta þriðjudag og tilkynntu fulltrúar
bekkjarins þá að ákveðið hefði verið
að gefa upphæðina til styrktar götu-
barnaheimili í Maputo, höfuðborg
Mósambík. Nína Helgadóttir,
fulltrúi hjá Rauða krossi Íslands,
veitti gjöfinni viðtöku í lífsleiknitíma
hjá unga fólkinu og kynnti um leið
samtökin.
Níundi bekkur V í Hagaskóla í Reykjavík styður við hjálparstarf í Mósambík. Létu þau verðlaunafé sitt úr sam-
norrænu stærðfræðikeppninni KappAbel renna til verkefnisins í höfuðborginni Maputo.
Unglingar styrkja götu-
barnaheimili í Mósambík