Morgunblaðið - 20.05.2006, Blaðsíða 44

44 LAUGARDAGUR 20. MAÍ 2006 MORGUNBLAÐIÐ
UMRÆÐAN
SJÁLFSTÆÐISMENN á Seltjarnarnesi munu leggja til að öll börn og
ungmenni á aldrinum 6-18 ára fái árlega úthlutað 25.000 kr. í formi sér-
stakra tómstundastyrkja til að sinna uppbyggilegu tómstundastarfi. Styrk-
urinn mun nýtast í hverskyns íþrótta-, lista- og tóm-
stundaiðkun á höfuðborgarsvæðinu.
Jafnrétti og raunveruleg kjarabót
Markmiðið er að gera öllum á aldrinum 6-18 ára kleift að
taka þátt í íþróttastarfi eða öðrum tómstundum óháð efna-
hag fjölskyldunnar. Þetta fyrirkomulag verður stórt skref í
átt að auknum stuðningi við barnafjölskyldur og raunveru-
leg kjarabót. Sjálfstæðismenn á Seltjarnarnesi munu ganga
lengra en önnur sveitarfélög með því að bjóða hærri upphæð og hækka
aldurinn.
Það er staðreynd að Seltjarnarnesbær styður vel við bakið á íþrótta-
félaginu og veitir hvað mestu fé til íþrótta- og æskulýðsmála af öllum sveit-
arfélögum á höfuðborgarsvæðinu. Bærinn mun halda áfram að styðja fé-
lagið og ekki verður dregið úr styrkjum til íþróttafélagsins þrátt fyrir
tómstundastyrkina.
Við eigum eftir að njóta ávaxtanna af því að veita tómstundastyrki.
Þetta verður öflug forvörn í verki og kemur í veg fyrir neyslu á vímuefnum
og dregur úr brottfalli t.d. vegna efnahags foreldra.
Sjálfstæðismenn hafa á kjörtímabilinu eflt íþróttastarf og bætt verulega
aðstöðu til íþróttaiðkunar á Seltjarnarnesi með uppbyggingu öflugrar
íþróttamiðstöðvar og miklum endurbótum á sundlauginni sem er að ljúka.
Gerð glæsilegs gervigrasvallar ásamt minni æfingavelli er á lokasprett-
inum auk minni sparkvalla víðar um bæinn. Markmiðið er að aðgengi að
íþrótta- og útivistaraðstöðu verði með því besta sem gerist á landinu. Öll
aðstaða til útvistar og heilsueflingar hefur verið bætt til muna með frá-
gangi á skipulögðum útvistarsvæðum, göngu- og hjólastígum. Ókeypis
verður í Sundlaug Seltjarnarness fyrir eldri Seltirninga. Samstarf leik-
skóla og íþróttahreyfingar verður aukið og markvisst.
Stefna okkar
Samstarf skóla og íþróttafélags verður eflt betur í tengslum við samfelldan
skóladag. Upphitaður sparkvöllur verður á skólalóð Mýrarhúsaskóla.
Stefnt er að því að sparkvöllur við Eiðismýri verði endurbættur, byggð
verði glæsileg líkams- og heilsuræktarstöð í samvinnu við fagaðila, hlaupa-
braut og áhorfendastúka verði byggð við nýja gervigrasvöllinn og að
byggð verði innilaug við sundlaugina fyrir sundkennslu og ungbarnasund.
Áfram verður stutt við bakið á íþróttafélögum í bænum, svo sem Gróttu,
Nesklúbbinn og Trimmklúbb Seltjarnarness, með sérstökum þjónustu-
samningum. Kannaðir verða möguleikar á gerð æfingavallar fyrir golf-
áhugamenn og púttvallar fyrir eldri borgara á útivistarsvæðum utan hins
friðlýsta svæðis. Skólahúsnæði verður opið fyrir klúbbastarfsemi og ung-
lingahljómsveitir utan skólatíma.
Góður árangur sjálfstæðis-
manna í æskulýðsstarfi
á Seltjarnarnesi
Eftir Lárus B. Lárusson
Höfundur skipar 4. sæti á lista Sjálfstæðisflokksins á Seltjarnarnesi.
VINSTRI græn í Kópavogi vilja
að bærinn verði aftur félagshyggju-
bær. Og hvað þýðir það í raun?
Þýðir það að við ætlum að einblína
á þá sem eru veikir, fatlaðir, aldr-
aðir, fátækir, með
geðraskanir og
fíkniefnavanda? Það
væri kannski full
þörf á því, en auðvit-
að er í fleiri horn að
líta. Hins vegar vilj-
um við öðruvísi sam-
félag en það sem við
höfum í dag, við viljum samfélag
þar sem réttur fólks er jafn, sam-
félag án aðgreiningar þar sem allir
taki þátt hver eftir sinni getu, þar
sem þjónustan er löguð að ein-
staklingum, en ekki einstakling-
arnir að þjónustunni. Við viljum
samfélag þar sem heilbrigði og vel-
ferð er í fyrirrúmi. Þar skiptir að-
gengi miklu máli, aðgengi að þjón-
ustunni og aðgengi að upplýsingum
um hana. Notendur þjónustunnar
eiga að vera með í að móta hana og
þróa og einnig fagfólkið sem vinnur
við hana. Þannig tryggjum við vel-
ferð og raunverulegt lýðræði.
Undanfarin ár hefur verið lögð
mikil áhersla á heilsurækt og hvað
fólkið sjálft geti gert til þess að
halda heilsunni með líkamsrækt og
mataræði, en nú hefur hugtakið
geðrækt bæst við og kjörorðið „það
er engin heilsa án geðheilsu“ þýðir
að geðrækt sé jafnmikilvæg og lík-
amsrækt og þyki jafn mikilvæg og
hin atriðin. Með geðrækt er ekki
látið nægja að takast á við geðrask-
anir heldur er markvisst hlúð að
geðheilsunni og því bægt frá sem
ætla má að stefni henni í voða.
Mikilvægt er að við séum meðvituð
um eigið geðheilbrigði en stundum
er það ekki nóg. Margir þættir í
umhverfinu eru geðheilsunni í óhag
þrátt fyrir að við séum svo lánsöm
að búa við frið í ríku samfélagi.
Láglaunastefnan og á stundum
gríðarlegar kröfur til launþega
kalla á langan vinnudag. Lítil börn
eru með langan vinnudag og við-
veru í leikskólanum. Streitan er
mikil, áreitið líka og því miður búa
allt of margir við ofbeldi af ýmsum
toga. Við tölum mikið um rétt okkar
til frelsis og hamingju, við tölum
um velferðina en í raun er þörf á
viðhorfsbreytingum, þar sem réttur
barna er í forgangi, þau þurfa meiri
tíma með foreldrunum. Vöggu-
stofur eða stærri leikskólar eru
engin töfralausn. Að gefa for-
eldrum kost á að vera meira með
börnum sínum er besta fjárfest-
ingin og forvörnin.
Alþjóða heilbrigðisstofnunin
(WHO) hefur bent á, að árið 2020
verði þunglyndi annað stærsta heil-
brigðisvandamál í heiminum. Eins
og geðheilbrigðisþjónustan þróast
má búast við að meðferð og end-
urhæfing flytjist í auknum mæli til
sveitafélaga og nærsamfélagsins.
Alþjóða heilbrigðisstofnunin hefur
líka bent á að nú sé runnin upp öld
forvarna, við vitum orðið svo mikið
um orsakir geðraskana að nú sé
tímabært að vinna öllum árum að
því að fyrirbyggja þær. Það getum
við gert meðal annars með því að
setja fram stefnu í málaflokknum,
efla og samhæfa þjónustu við fólk,
bæta skipulag og stórefla forvarnir.
Vinstri græn í Kópavogi ætla að
setja fram stefnu í þessum mála-
flokki, á því er þörf, það eru hreinar
línur. X-V 27. maí.
Félagshyggjubærinn
Kópavogur
Eftir Guðbjörgu Sveinsdóttur
Höfundur er geðhjúkrunarfræð-
ingur og skipar 2. sæti V-lista
vinstri grænna í Kópavogi.
NOKKUÐ hefur verið rætt um uppbyggingu mið-
bæjarins í Garðabæ að undanförnu. Eins og svo oft
áður þegar um jafn stórt mál er að ræða fer umræðan
á flug og staðreyndir skolast til. Undir lok síðasta
kjörtímabils stóð Garðabær fyrir sam-
keppni um skipulag á nýjum miðbæ. Sú
hönnunarsamkeppni miðaðist eingöngu
við svæðið í kringum Garðatorg. Fram
komu afar áhugaverðar tillögur frá
nokkrum aðilum. Á íbúaþingi þar sem
málefni bæjarins í víðustu mynd voru
tekin til skoðunar voru hugmyndir
þessar skoðaðar. Eitt af þeim áherslu-
atriðum sem þar komu fram voru hugmyndir um
áherslu á uppbyggingu hrygglengju bæjarins frá Víf-
ilsstöðum til sjávar. Í ljósi þess komu fram skoðanir
um að miðbærinn einskorðaðist ekki eingöngu við
Garðatorg heldur flæddi niður að Hafnarfjarðarvegi.
Þess vegna voru tillögur í hönnunarsamkeppninni
ekki nýttar. Fyrir tveimur árum var ákveðið að efna
til samkeppni um samstarfsaðila um uppbyggingu
með nýjum forsendum. Gengið var til samninga við
fyrirtækið Klasa um að fyrirtækið gerði tillögur að
nýjum miðbæ í Garðabæ. Samkvæmt samningnum átti
Klasi að skila þessari vinnu við árslok 2005 en vegna
breytinga á eignarhaldi og m.a. hversu umfangsmikið
verkefnið er var ákveðið að framlengja tímamörk á
skilafresti fyrirtækisins fram til septemberloka 2006.
Við þekkjum sögu margra tilrauna hjá sveitarfélögum
þar sem reynt hefur verið að byggja upp miðbæ. Ég
nefni sem dæmi uppbyggingu Hamraborgar í Kópa-
vogi. Í Garðabæ eins og annars staðar höfum við séð
dæmi um aðila sem reynt hafa að byggja upp atvinnu-
og þjónustustarfsemi án þess að heppnast. Bæjaryf-
irvöld stýra ekki verslunar- og þjónustustarfsemi. Það
gerir markaðurinn. Tillögur Klasa frá upphafi hafa
snúist um blandaða byggð þar sem fyrirtækið hyggst
selja frá sér íbúðahúsnæði en halda eftir atvinnu-
húsnæðinu og setja inn þá verslunar- og þjónustu-
starfsemi sem fyrirtækið telur að komi til með að
ganga. Rétt er að taka fram að Garðabær er óbundinn
af þeim tillögum sem fyrirtækið kemur fram með.
Samkvæmt viðhorfskönnunum sem gerðar hafa ver-
ið leggja Garðbæingar mikla áherslu á að fá miðbæ
með ýmsa þjónustu og ég tek undir það.
Þegar tillögur Klasa koma fram verða þær skoð-
aðar gaumgæfilega með hagsmuni Garðbæinga að
leiðarljósi. Við þurfum að bera virðingu fyrir þeirri
starfsemi og þeim atvinnurekendum sem nú hafa
starfsemi á Garðatorgi og finna lausnir þar að lút-
andi. Síðast en ekki síst verðum við að halda áfram
með gott samráð við íbúa á svæðinu. Taka má undir
þau sjónarmið að þetta mál hafi tekið langan tíma.
Fyrir því gildar ástæður. Það er hinsvegar ekki rétt
sem fleygt hefur verið að Garðabær ætli sér að kaupa
upp húsnæði Vistors og Hagkaupa né heldur að
Garðabær muni gefa verðmætt byggingarland. Engar
ákvarðanir eða áherslur hafa komið fram af hálfu
sjálfstæðismanna hvað það varðar. Leggjum áherslu á
að hraða skipulagsvinnu varðandi nýjan miðbæ og
finnum samhljóm með íbúum og atvinnurekendum í
málinu og tökum ákvarðanir til heilla fyrir bæinn
okkar.
Enn og aftur um miðbæ í Garðabæ
Eftir Stefán Konráðsson
Höfundur skipar 4. sæti á lista Sjálfstæðisflokksins
í Garðabæ.
ÍHALDIÐ hefur ekkert gert í at-
vinnumálum allt þetta kjörtímabil
ef frá er talið ofuráhersla bæj-
arstjórans á vík-
ingaþorp og stál-
pípuverksmiðju.
Íhaldið byrjaði á
að loka Markaðs- og
atvinnumálaskrif-
stofu Suðurnesja
(MOA), þar tapaðist
mikil þekking sem
gott hefði verið að hafa núna til að
hjálpa okkur að vinna okkur út úr
þeim vandamálum sem fylgja
brotthvarfi hersins. Sparnaður
Reykjanesbæjar við þessa lokun
var sama og enginn þar sem stór
hluti rekstrarkostnaðarins við
MOA var greiddur af Byggða-
stofnun.
Með þessari aðgerð voru allar
aðgerðir og þróun í atvinnumálum
af hálfu sveitarfélagsins færð inn á
borð eins manns og við súpum nú
seyðið af því, eða öllu heldur þeir
hátt í þúsund einstaklingar sem nú
eru að missa vinnuna.
Hér hefur ekkert verið gert til að
laða að flugsækna starfsemi af
hálfu sveitarfélagsins heldur er það
Flugstöð Leifs Eiríkssonar hf., í
eigu ríkisins, sem hefur staðið í
stórræðum undanfarin ár og skap-
að hundruð ný störf.
Ekki hefur verið gert neitt átak í
því að fá hefðbundin framleiðslu-
og þjónustufyrirtæki af höfuðborg-
arsvæðinu til að flytja sína kjarna-
starfsemi hingað í ljósi ofurverðs á
fasteignum í Reykjavík og nálægð-
ar okkar við Reykjavík. Þarna
liggja ómæld tækifæri sem íhaldið
hefur ekkert mátt vera að að sinna
vegna þess að allur krafturinn hef-
ur farið í víkingaþorp sem mun
kannski, ef vel gengur, veita 6–8
manns vinnu og stálpípuverksmiðju
sem kom en kom samt aldrei, eða
hvað?
A-listinn er með lausnir
A-listinn er með lausnir á þessu og
ætlum við að opna alvöru Nýsköp-
unarmiðstöð Suðurnesja í sam-
vinnu við ríkisstjórnina, peningar
verði fengnir með sölu hlutabréfa
ríkisins í Hitaveitu Suðurnesja og
þeim varið til atvinnuuppbyggingar
hér á Suðurnesjum. Þetta er ekki
óraunhæft eins og bæjarstjórinn
hefur sagt, heldur þvert á móti eru
til mörg dæmi um svona ráðstöfun
á fyrirtækjum sem ríkið hefur átt á
viðkomandi svæði sbr. steinullar-
verksmiðjuna í Skagafirði. En sölu-
andvirði hennar var varið til at-
vinnuuppbyggingar og til eflingar
háskólamenntun í Skagafirði.
Einnig þætti okkur áhugavert að
skoða með hvaða hætti hægt væri
að nýta eitthvað af þessum pen-
ingum til að draga úr því áfalli sem
fólk verður fyrir nú í haust við að
missa vinnuna. T.d. með endur-
menntunarúrræðum og stofnun
frumgreinadeildar við Fjölbrauta-
skólann sem er lánshæft nám. Þá
höfum við sagt að óskastaðan væri
sú að sveitarfélög eins og Hafnar-
fjörður, Garðabær og Kópavogur
keyptu hlut ríkisins en með því
myndi markaðssvæði hitaveitunnar
stækka og hún eflast.
Íhaldið hefur ekki
staðið sig í Reykjanesbæ
Eftir Eystein Jónsson
Höfundur skipar 2. sæti
á A-listanum í Reykjanesbæ.
AFSTAÐAN til samgöngustefnu Reykjavíkurborgar
kristallar muninn á félagshyggjuflokkunum sem bjóða
fram til borgarstjórnar og Sjálfstæðisflokknum sem
kennir sig réttilega við einstaklings-
hyggju. Í borgarstjórn 16. maí var sam-
þykkt ný samgöngustefna sem kallar á
jafnrétti milli mismunandi samgöngu-
kosta. Sjálfstæðismenn samþykktu ekki
stefnuna þar sem þeir vildu auka tillit
til einkabílsins og taka meira land undir
umferðarmannvirki. Í dag fer 50% af
landi borgarinnar undir götur og bíla-
stæði og þykir mér og mörgum borgarbúum að komið
sé nóg.
Grátt umhverfi Sjálfstæðisflokksins
Malbikið er grátt, steypan er grá og svifrykið er grátt.
Ef það á að taka frekari tillit til einkabílsins og miða
stærð samgöngumannvirkja við umferð á háannatíma
þá er víst að grænu svæðin verða að víkja fyrir malbiki
og steypu. Aukinn akstur leiðir til aukins svifryks og
því má álykta að sjálfstæðismenn vilji gera umhverfið
grárra komist þeir til valda. Það er þó ekki síður verra
að gera lítið úr öryggisþætti samgöngustefnunnar.
Sem dæmi þá valdi Guðlaugur Þór borgarfulltrúi Sjálf-
stæðisflokksins að gera grín að reiðhjólanámskeiðum í
skólum, að það þyrfti ekki að kenna skólabörnum að
hjóla. Reiðhjólanámskeiðin eru þó í þeim tilgangi að
auka öryggi hjólandi barna, kenna þeim öruggar hjóla-
leiðir, að viðhalda og laga bremsur og tileinka sér önn-
ur öryggisatriði á hjólunum eins og að nota hjálmanna
rétt.
Strætó er svarið, líka í Árborg
Aukin notkun almenningsvagna er umhverfinu í hag
og ekki síður heilsunni þar sem notkunin dregur úr
loftmengun. Það er ekki að ástæðulausu að mælt er
með því að almenningssamgöngur njóti a.m.k. jafn-
réttis á við aðra samgöngumáta í nánustu framtíð. Til
að svo geti orðið þarf að auka forgang strætó í umferð-
inni og verður unnin framkvæmdaáætlun þess efnis á
þessu ári. Þá þarf að efla ímynd strætó og er nú góður
tími til þess þegar sátt hefur náðst um nýtt leiðakerfi.
Jákvæð ímynd Strætó bs. eykst á sama tíma og strætó-
samgöngur verða almennari á öllu stór höfuðborg-
arsvæðinu. Nú þegar er keyrt á Akranes við mikla
ánægju bæjarbúa, og viðræður eru við Reykjanesbæ,
Hveragerði og Árborg. Íbúar Árborgar geta því án
einkabílsins verið og þurfa ekki á skutli aðstandenda
að halda.
Sjálfstæðismenn vilja stuðla að heilnæmu umhverfi í
borginni í orði, en vilja samt taka meira tillit til einka-
bílsins. Þetta gengur ekki upp frekar en „velferðar-
stefnan“ fyrir kosningar á sama tíma og Sjálfstæð-
isflokkur í ríkisstjórn og nokkrum stærri sveitar-
félögum sýnir viljann í verki gagnvart þeim sem þurfa
á velferðarsamfélagi að halda.
Ég vil búa í heilnæmri borg þar sem ekki verður tek-
ið meira landrými en 50% undir bíla. Þess vegna þakka
ég Reykjavíkurlistanum fyrir þessa stefnu sem er eitt
af mörgum verkum okkar í borgarstjórn.
Grátt umhverfi sjálfstæðismanna
Eftir Björk Vilhelmsdóttur
Höfundur er borgarfulltrúi, í 4. sæti á lista
Samfylkingarinnar.