Tímarit kaupfjelaga og samvinnufjelaga - 01.06.1907, Blaðsíða 64
121
Ennfremur er þess óskað, að sem flestir sendi tímaritinu
ritgjörðir, skýrslur og smáathuganir um hvað eina er þeir
hyggja heppilegt til flutnings í ritinu og geti orðið samvinnu-
fjelagsskap hjer á landi til nytsemdar.
Flest dagblöð landsins hafa minnst á tímaritið og einróma
látið í ljós, að full þörf sje á því, að halda uppi riti með
því stefnumarki, sem þetta tímarit hefur sett sjer. Til þess að
ritið geti unnið hlutverk sitt viðunanlega er ómissandi að það
eigi greiðan kost á því, að fá skýrslur þær og upplýsingar,
sem óskað verður eptir, og að málaleitun í þeim efnum sje
ekki svarað með þögninni einni saman. Hjer er um opin-
beran og lögmætan fjelagsskap að ræða; upplýsingar um hann
er því frjálst fram að bera.
Auðvitað hafa forstöðumenn fjelaganna mörgu að sinna,
og reikningar verða opt síðbúnir, sem ekki er um að fást.
En af því forstöðumönnunum er, að sjálfsögðu, ant unr góð-
an þrifnað fjelaganna, má þar eigi neitt þýðingarmikið atriði
undir höfuð leggja. Og það hefur mikla þýðingu fyrir almenn
fjelagsþrif, að birtar sjeu rjettar og Ijósar skýrslur um fjelags-
skapinn á þeim stað, sem auðveldur og alþekktur aðgangur
er að.
Sá staður er sjálfkjörinn í þessu tímariti,
Tímaritið nær ekki tilgangi sínum, og hverfur þá innan
skamms úr sögunni, ef þau fjelög, sem það vill á allan hátt
styðja, gera því ekki svipuð skil.
í þessu atriði er fólgið eitt af samvinnuspursmálum vorunr,
og það getur verið alhnikið undir því komið, hvernig úr því
verður leyst.
ls/4 1907.
Sigurður Jónsson.