Sjómannadagsblaðið - 07.06.1970, Qupperneq 27

Giftusamleg
björgun
________________
Það er tiltölulega fátítt að fá góðar myndir af björgun
úr sjávarháska, einkum á opnu hafi, en meðfylgjandi
myndir voru teknar í janúar s. 1. er gríska skipið „Filtric"
sökk í Biskayaflóa. Um morguninn hafði skipið sent frá
sér SOS neyðarmerki um að það væri kominn leki að
skipinu, þar sem það var statt um 6 mílur suður af Finis-
terre. Norska skipið „Black Prince“ kom til aðstoðar hálfri
klukkustund síðar.
„Filtric" var farið að hallast mjög mikið og skipverjar
höfðu ekki sett út björgunarbáta.
„Black Prince" setti strax út björgunarbát sem lagðist
um 10 metra frá flakinu, kastaði þar út björgunarbeltum
og baujum, og tókst að draga þannig til sín 16 menn,
sem köstuðu sér í sjóinn. Það var suðvestan hvassviðri
og þungur sjór, svo björgunarbátinn rak frá skipinu og
hélt svo að „Black Prince“ þar sem mennirnir voru hal-
aðir um borð á laushangandi „leiðurum“. Síðan fór björg-
unarbáturinn og sótti 10 menn í viðbót sem í millitíðinni
höfðu komizt um borð í spánskan fiskibát. Veðrið hafði
nú versnað mjög mikið, svo bátnum var haldið með lín-
um frá skipinu svo hann brotnaði ekki við skipshliðina
í veltingnum. Nokkra skipverja varð að draga í sjónum
áður en þeim tækist að ná í „leiðarann". Unglingsdreng-
ur féll út úr línuhringnum þegar hann ætlaði upp í leið-
arann og alda hreif hann nokkur hundruð metra frá,
áður en tækist að snúa skipinu til hans. Einn af stýri-
mönnum skipsins kastaði sér í bjargbauju í sjóinn til
þess að hjálpa honum.
Áhöfn björgunarbátsins tókst að lokum að komast um
borð á „leiðaranum" en björgunarbátinn var ekki hægt
að taka um borð aftur vegna sjógangs. Þannig lauk þess-
ari giftusamlegu björgun, við hinar verstu aðstæður, án
þess að nokkurn sakaði, en á meðan var hið gríska skip
sokkið.
SJÓMANNADAGSBLAÐIÐ 13